Read KITAB SUCI ZABUR INJIL LUKAS 24 Bible Online

LUKAS 24 - KITAB SUCI ZABUR INJIL bible

LUKAS 24

¹Léq jelo Ahad, kelémaq aru gati, dengan-dengan nine nike lumbar ojok makam jauq ramuan-ramuan saq sampun ie pade siepang.

²Léq makam, ie pade ndait batu pengimpet lawang makam nike sampun tealih.

³Terus ie pade tame ojok dalem makam nike, laguq ndéq araq daitne jenazah Junjungan Saq Mulie Deside Isa léq derike.

⁴Sewaktu ie pade kenyeke nganjeng léq derike dait bingung mikirang hal nike, selung-selung araq due dengan kadu kelambi saq putéq ngempor dateng ngerapetin ie pade.

⁵Ie pade takut gati jangke ie pade nunduk, laguq kedue dengan nike bebase léq ie pade, “Kembéq side pade boyaq dengan saq idup léq taoq dengan ninggal?

⁶ Ie ndéq araq léq deriki, Ie sampun idup malik! Ingetang napi saq Ie manikang léq side sewaktu Ie masih léq Galilea,

⁷bahwe, ‘Bije Manusie harus teserahang ojok ime dengan-dengan bedose, terus tepakuq léq kayuq salib, dait léq jelo saq ketelu Ie gen idup malik.’ ”

⁸Beterus dengan-dengan nine nike inget napi saq sampun temanikang siq Deside Isa.

⁹Sesampun tulak léman makam nike, ie pade tuturang selapuq peristiwe nike léq kesolas pengiring-pengiring Deside Isa dait selapuq pengiring saq lain.

¹⁰Dengan-dengan nine saq nyampéang selapuq hal nike tipaq rasul-rasul aranne: Mariam Magdalena, Yohana dait Mariam inaqne Yakub dait dengan-dengan nine lainne saq bareng kance ie pade.

¹¹Laguq rasul-rasul nike paran dengan-dengan nine nike cume nyeriteang saq ndéq-ndéq. Ie pade ndéq percaye siq cerite dengan-dengan nine nike.

¹²Timaq maraq nike, Petrus ures dait pelai ojok makam. Waktu ie nidok ojok dalem makam, serioqne cume kain putéq léq derike. Petrus bengaq gati, terus uléq dait beketuan-tuan dalem angenne napi setetune saq sampun telaksane.

¹³ Léq jelo nike éndah, due pengiring Deside Isa kenyeke bekelampan ojok sopoq dése aranne Emaus, kire-kire solas kilo jaoqne léman Yerusalem.

¹⁴Sambil lampaq ie pade ngeraosang selapuq peristiwe saq sampun telaksane nike.

¹⁵Sewaktu ie pade ngeraos dait saling tukah pikiran, Deside Isa rauh dait bareng lampaq kance ie pade.

¹⁶Ie pade serioq Deside Isa, laguq araq sopoq hal saq miaq ie pade ndéq tandaq Deside Isa.

¹⁷Beterus Deside Isa bemanik, “Napi saq side pade raosang léq tengaq kelampan niki?” Ie pade mentelah, dait muene sedih.

¹⁸Terus salaq sopoq léq antare ie pade aranne Kleopas, metakén léq Deside Isa, “Napi Side sopoq-sopoqne dengan pendateng léq Yerusalem, saq ndéq nenaoq peristiwe saq telaksane baruq-baruq niki?”

¹⁹“Peristiwe napi nike?” manik Deside Isa. “Peristiwe mengenai Deside Isa, dengan léman Nazaret nike,” jawab ie pade. “Ie nabi. Ucapan dait perbuatan-Ne penoq siq kuase léq arepan Allah, dait léq arepan selapuq bangse.

²⁰Imam-imam kepale dait pemimpin-pemimpin bangsente nyerahang Ie jari tehukum maté, terus Ie tepakuq léq kayuq salib!

²¹Padahal tiang pade beharep Ie saq gen bébasang Israel! Dait jelo niki jelo saq ketelu léman peristiwe nike telaksane.

²²Dait dengan-dengan nine léq antare tiang pade sampun piaq tiang pade tinjot: Kelémaq aru gati ie pade lumbar ojok makam,

²³laguq ie pade ndéq ndait jenazah Deside Isa léq derike. Beterus ie pade tulak dait bebadaq léq tiang pade bahwe ie pade serioq malaékat, dait malaékat-malaékat nike bebase bahwe Deside Isa idup malik.

²⁴Araq batur-batur tiang saq lumbar ojok makam, terus daitne napi saq teceriteang siq dengan-dengan nine nike mule tetu, laguq ie pade ndéq serioq Deside Isa.”

²⁵Beterus Deside Isa bemanik léq ie pade, “Side pade mule bodo! Ngonéq gati side pade percaye napi saq sampun tesampéang siq nabi-nabi!

²⁶Tekan Almasih harus ngalamin juluq penderitean nike, jari tame ojok dalem kemuliean-Ne?”

²⁷Beterus Deside Isa jelasang léq ie pade napi saq tetulis léq dalem selapuq Kitab Suci mengenai diriq-Ne, mulai léman kitab Musa jangke kitab nabi-nabi.

²⁸Sewaktu ie pade gen rauh léq dése saq ie pade laiq, Deside Isa maraqne gen bemargi terus,

²⁹laguq ie pade segah Deside Isa dait matur, “Silaq mererepan léq deriki, mangkin sampun serep jelo, dait karing seberaq peteng.” Beterus Deside Isa tame dait mererepan léq taoq ie pade.

³⁰Sewaktu Deside Isa melinggih medaran kance ie pade, Ie bait ruti, terus ngucapang syukur tipaq Allah, dait peleng-peleng-Ne ruti nike kadu gading-Ne, terus ngicanin ie pade.

³¹Beterus ie pade sadar bahwe nike Deside Isa. Laguq Deside Isa telang léman tengaq-tengaq ie pade.

³²Ie pade bebase sopoq kance saq lain, “Onéq kan ite besemanget gati, sewaktu Ie bebaos kance ite léq tengaq kelampan, dait jelasang ite isi Kitab Suci?”

³³Waktu nike éndah ie pade nganjeng terus tulak ojok Yerusalem. Léq derike daitne solas pengiring Deside Isa kenyeke bekumpul bareng saq lain.

³⁴Ie pade saq araq léq Yerusalem nike bebase léq deduaqne, “Mule tetu Junjungan Saq Mulie sampun idup malik! Ie sampun nyatayang diriq-Ne léq Simon!”

³⁵Beterus kedue pengiring Deside Isa saq baruq dateng nike nyeriteang pengalaman ie pade léq tengaq kelampanne, dait berembé entan ie pade nandaq Deside Isa waktu Ie peleng-peleng ruti.

³⁶Léq waktu ie pade masih betutur, selung-selung Deside Isa araq léq tengaq-tengaq ie pade, dait ngucapang salam tipaq ie pade.

³⁷Ie pade tinjot dait takut gati, séngaq ie pade paran serioq hantu.

³⁸Laguq Deside Isa bemanik, “Kembéq side pade takut? Kembéq side pade jari bimbang?

³⁹Serioq imen Tiang dait naén Tiang. Tiang niki Isa. Silaq demak dait perhatiang, séngaq hantu ndéq bedowé isi atao tolang maraq saq side pade serioq léq Tiang.”

⁴⁰Sambil bemanik maraq nike Deside Isa petitoqang ie pade gading-Ne dait cokor-Ne.

⁴¹Dait sewaktu ie pade ndéqman percaye lantaran seneng gati dait bengaq, Deside Isa bemanik léq ie pade, “Napi léq deriki side pade bedowé keloran?”

⁴²Ie pade aturin Deside Isa sepeleng empaq goréng.

⁴³Deside Isa bait empaq nike, terus daharangne léq julu ie pade.

⁴⁴Sesampun nike, Deside Isa bemanik malik léq ie pade, “Hal niki saq sampun Tiang sampéang léq side pade sewaktu Tiang masih bareng kance side pade: Bahwe selapuq hal saq tetulis mengenai Tiang léq dalem Kitab Taurat Musa, Kitab Nabi-nabi dait léq Kitab Zabur, harus telaksane.”

⁴⁵Beterus Deside Isa bukaq pikiran ie pade, sehingge ie pade iniq ngerti maksut Kitab Suci.

⁴⁶Deside Isa bemanik malik léq ie pade, “Léq dalem Kitab Suci tetulis bahwe Almasih harus menderite, dait idup malik léman tengaq-tengaq dengan ninggal léq jelo saq ketelu.

⁴⁷Dait dalem peséngan Almasih nike éndah harus tekabarang tipaq selapuq bangse mengenai pertobatan dait pengampunan dose. Berite nike harus tekabarang mulai léman Yerusalem.

⁴⁸Side pade jari saksi léman selapuq hal nike.

⁴⁹ Dait Tiang mésaq gen ngirimang side pade napi saq sampun tejanjiqang siq Bapa. Laguq side pade harus tetep ngantih léq kote niki jangke kuase léman Allah turun kuasein side pade.”

⁵⁰Sesampun nike Deside Isa jauq ie pade ojok luah kote jangke rapet Betania. Léq derike Deside Isa ngangkat gading-Ne, terus ngicanin ie pade berkah.

⁵¹Sewaktu Deside Isa ngelaksaneang hal nike, Ie kerangkatan ojok sorge, terus bekelin kance ie pade.

⁵²Ie pade sujut nyembah Deside Isa, terus tulak ojok Yerusalem siq angen saq seneng gati,

⁵³dait ie pade tetep araq léq Gedéng Allah dait mulieang Allah.