Read KITAB SUCI ZABUR INJIL LUKAS 4 Bible Online

LUKAS 4 - KITAB SUCI ZABUR INJIL bible

LUKAS 4

¹Deside Isa tekuasein siq Roh Suci léq waktu Ie bilin Kokoq Yordan terus Ie tepimpin siq Roh Suci nike ojok padang gurun.

²Léq derike Deside Isa tecobe siq Belis petang dase jelo ngonéqne. Sengonéq nike, Ie nénten daharang napi-napi. Beterus Ie jari seduk.

³Belis matur léq Deside Isa, “Lamun Pelungguh Bije saq asalne léman Allah, manikang batu niki jari ruti.”

⁴ Jawab Deside Isa, “Araq tetulis léq dalem Kitab Suci bahwe: ‘Manusie ndéqne cume idup léman ruti doang.’ ”

⁵Terus Belis jauq Deside Isa ojok taoq saq atas, dait araq sepengkejep doang Belis petitoqang Deside Isa selapuq kerajaan léq dunie.

⁶Beterus Belis matur tipaq Deside Isa, “Selapuq kekuasean dait kesugihan niki gen tiang aturin tipaq Pelungguh, séngaq selapuqne sampun teserahang ojok tiang dait tiang bau ngebéng léq sai juaq saq tiang mélé béng.

⁷Selapuqne nike gen jari dowén Pelungguh, lamun Pelungguh sujut nyembah tiang.”

⁸ Jawab Deside Isa, “Léq dalem Kitab Suci araq tetulis, ‘Pade sembah Allah, Tuhan side dait tipaq Ie doang side beribadah.’ ”

⁹Beterus Belis jauq Deside Isa ojok Yerusalem dait toloq-Ne léq atas buwung Gedéng Allah. Belis matur léq Deside Isa, “Lamun Pelungguh Bije saq asalne léman Allah, cobaq Pelungguh nimproh léman deriki.

¹⁰ Séngaq araq tetulis léq dalem Kitab Suci, ‘Allah gen mréntahang malaékat-malaékat-Ne jari jagaq Pelungguh.’

¹¹Dait éndah, ‘Malaékat-malaékat gen sangklap Pelungguh kadu ime ie pade, adéq cokor Pelungguh nénten kedantuk léq batu.’ ”

¹² Jawab Deside Isa, “Léq dalem Kitab Suci tetulis, ‘Ndaq Side cobe Allah, Tuhan side!’ ”

¹³Sesampun Belis engkah cobe Deside Isa kadu segale macem care, ie bilin Deside Isa dait ngantih waktu saq tepat.

¹⁴Siq kuase Roh Allah Deside Isa tulak ojok Galilea. Berite mengenai Deside Isa nyebar ojok selapuq daérah nike.

¹⁵Deside Isa ngajahang léq balé-balé ibadah, dait selapuq dengan muji Ie.

¹⁶Deside Isa lumbar éndah ojok Nazaret, taoq Ie tebeléqang. Léq jelo Sabat maraq biasene Ie lumbar ojok balé ibadah. Deside Isa nganjeng jari bace Kitab Suci,

¹⁷terus Ie teaturin kitab Nabi Yesaya. Deside Isa bukaq gulungan kitab nike, terus dait-Ne ayat niki,

¹⁸ “Roh Tuhan araq léq Tiang, séngaq Allah sampun nyuciang dait ngesahang Tiang jari beriteang Kabar Solah tipaq dengan miskin. Allah ngutus Tiang jari ngumumang tipaq dengan tawanan bahwe ie pade gen tebébasang dait tipaq dengan bute bahwe ie pade gen tao nyerioq malik; jari bébasang dengan saq tejajah,

¹⁹jari beriteang taun rahmat Tuhan sampun rauh.”

²⁰Deside Isa gulung malik kitab nike, dait tulakang-Ne ojok petugas, beterus melinggih. Selapuq dengan léq dalem balé ibadah nike perhatiang Ie.

²¹Terus Deside Isa mulai bebaos léq ie pade maraq niki, “Léq jelo niki, ayat-ayat Kitab Suci niki sampun telaksane sewaktu side pade dengahang ayat-ayat nike.”

²²Selapuq saq Ie ucapang bagus gati, sehingge ie pade takjub dait muji Ie. Ie pade bebase, “Tekan Ie bije Yusup?”

²³Make Deside Isa bemanik léq ie pade, “Pasti side pade gen kadu sesenggak niki léq Tiang, ‘Tabib, selahang diriq-De mésaq. Dait silaq piaq léq kampung asal Pelungguh mésaq keajaipan saq tiang pade dengah Pelungguh piaq léq Kapernaum!’ ”

²⁴ Deside Isa bemanik malik, “Tiang badaq side, setetune ndéq araq nabi saq tehormatin léq kampung asalne mésaq.

²⁵ Laguq dengahang: léq jaman Nabi Elia, sewaktu ndéq turun ujan telu taun enem bulan ngonéqne, araq musibah kelapahan léq selapuq negeri. Léq waktu nike luwéq bebalu léq Israel.

²⁶ Timaq maraq nike Allah nénten ngutus Nabi Elia lumbar ojok salaq sopoq bebalu-bebalu nike laguq cume tipaq sopoq bebalu léq Sarpat léq daérah Sidon.

²⁷ Maraq nike éndah léq jaman Nabi Elisa, araq luwéq dengan saq sakit kusta léq Israel, laguq dengan-dengan nike ndéq araq saq teselahang, kecuali Naaman dengan Siria nike.”

²⁸Selapuq dengan léq balé ibadah nike sili gati sewaktu dengah hal nike.

²⁹Ie pade nganjeng beterus tundungne Deside Isa ojok luah kote dait jauqne Deside Isa ojok tembéréng gunung, saq araq léq luah kote nike. Ie pade beniat jelek Deside Isa ojok dalem jurang.

³⁰Laguq Deside Isa nerobos dengan luwéq nike, terus lumbar.

³¹Beterus Deside Isa lumbar ojok kote Kapernaum léq Galilea. Léq derike Deside Isa ngajahang dengan-dengan léq jelo Sabat.

³² Ie pade takjub dengahang pengajahan Deside Isa, séngaq ucapan-ucapan-Ne penoq kuase.

³³Léq dalem balé ibadah nike, araq sopoq dengan saq tekuasein siq roh jahat. Dengan nike bekuih-kuih siq suare saq keras,

³⁴“Deside Isa, dengan Nazaret, napi saq gen Pelungguh piaq léq tiang pade? Napi Pelungguh rauh jari binaseang tiang pade? Tiang nenaoq sai setetune Pelungguh: Pelungguh Saq Suci léman Allah!”

³⁵Laguq Deside Isa semprak roh jahat nike, “Tedoq sugul léman dengan niki!” Beterus roh jahat nike timpak dengan nike léq julu ie pade selapuq, terus sugul léman dengan nike dait ndéq nyakitin ie.

³⁶Selapuq dengan bengaq, dait bebase sopoq kance saq lain, “Luar biase manik-Ne. Siq wibawe dait kuase, Ie mréntahang roh-roh jahat sugul, dait ie pade éndah sugul!”

³⁷Make kabar mengenai Deside Isa nyebar léq selapuq wilayah nike.

³⁸Deside Isa bilin balé ibadah nike, beterus lumbar ojok gedéng Simon. Mentoaq nine Simon kenyeke sakit telih panas, dait dengan-dengan tunas léq Deside Isa adéq nulung ie.

³⁹Beterus Deside Isa nganjeng léq dékét mentoaq Simon nike, terus Ie bemanik siq suare saq beléq jari nyelahang penyakit telih panas nike. Penyakit nike telang, dait mentoaq Simon langsung ures dait ngelayanin ie pade.

⁴⁰Sewaktu serep jelo, selapuq dengan pade jauq tipaq Deside Isa semeton-semetonne saq ngidap macem-macem penyakit. Deside Isa noloq gading-Ne léq atas ie pade sopoq-sopoq dait selahang ie pade.

⁴¹Roh-roh jahat éndah sugul léman luwéq dengan, sambil bekuih-kuih, “Pelungguh Bije saq asalne léman Allah!” Laguq Deside Isa semprak ie pade dait nénten ngijinang ie pade ngeraos, séngaq ie pade nenaoq bahwe Deside Isa nike Almasih.

⁴²Sewaktu mulai tiwoq jelo, Deside Isa bilin kote nike beterus lumbar ojok sopoq taoq saq sepi. Dengan-dengan mulai boyaq Ie, terus waktu ie pade ndait Deside Isa, ie pade berusahe adéq Deside Isa sampunang bilin ie pade.

⁴³Laguq Deside Isa bemanik, “Kabar Solah mengenai Kerajaan Allah harus Tiang sampéang éndah léq kote-kote lain, séngaq jari hal nike Allah ngutus Tiang ojok dunie.”

⁴⁴Keranaq nike Deside Isa nyampéang Kabar Solah léman Allah léq selapuq balé-balé ibadah léq Yudea.