Read KITAB SUCI ZABUR INJIL LUKAS 6 Bible Online

LUKAS 6 - KITAB SUCI ZABUR INJIL bible

LUKAS 6

¹ Léq sopoq jelo, waktu nike jelo Sabat, Deside Isa kance pengiring-pengiring-Ne bemargi léq lendang gandum. Pengiring-pengiring-Ne pade bau gandum. Ie pade osok gandum nike kadu imene, terus ie pade kelorang.

²Dengan-dengan Parisi bebase, “Kembéq side pade piaq hal saq ndéq tekanggo telaksaneang léq jelo Sabat?”

³ Jawab Deside Isa, “Napi side pade ndéq uwah bace napi saq telaksaneang Daud, sewaktu ie dait dengan-dengan saq ngiring ie lapah?

⁴ Daud tame ojok dalem Gedéng Allah terus bait ruti saq sampun teaturang tipaq Allah, terus kelorangne dait béngne tipaq pengiring-pengiringne, padahal ruti nike ndéq kanggo tekelor kecuali siq imam-imam?”

⁵Terus Deside Isa bemanik, “Bije Manusie nike Penguase jelo Sabat!”

⁶Léq jelo Sabat saq lain, Deside Isa lumbar ojok balé ibadah terus ngajahang. Léq derike araq dengan saq ime kananne maté setowéq.

⁷Ahli-ahli Taurat dait dengan Parisi mélé boyaq kesalaqan Deside Isa adéqne bau ngelaporang Ie. Jari ie pade tetep merhatiang napi Ie gen nyelahang dengan léq jelo Sabat.

⁸Laguq Deside Isa wikan pikiran ie pade. Make Deside Isa bemanik léq dengan saq maté setowéq imene nike, “Silaq nganjeng léq deriki léq julu!” Dengan nike ures, terus nganjeng léq derike.

⁹Beterus Deside Isa beketuan léq dengan-dengan saq araq léq derike, “Mbé saq tekanggoang léq jelo Sabat, solah atao gawéq hal saq jahat, nyelametang nyawe dengan atao nyematéq dengan?”

¹⁰Deside Isa cingakin sekelining ie pade selapuq, terus bemanik tipaq dengan nike, “Ulurang imende.” Dengan nike ngulurang imene, terus imene jari selah.

¹¹Laguq ahli-ahli Taurat dait dengan-dengan Parisi nike sili gati, terus ie pade berunding, napi saq gen ie pade bau laksaneang tipaq Deside Isa.

¹²Léq waktu nike Deside Isa taék ojok sopoq bukit jari bedo'e. Léq derike Ie bedo'e tipaq Allah sekeleman.

¹³Sesampun menah, Ie ngemanikang pengiring-pengiring-Ne, terus piléq due olas dengan léman ie pade, Deside Isa aranin due olas dengan nike rasul-rasul. Aran dengan-dengan nike:

¹⁴Simon (saq Ie sebut éndah Petrus), dait Andreas semetonne Simon; Yahya dait Yakub, Pilipus, Bartolomeus,

¹⁵Matius dait Tomas, Yakub bijene Alpeus, dait Simon (saq tesebut dengan Zelot),

¹⁶Yudas bijene Yakub dait Yudas Iskariot saq beterus jari penghianat.

¹⁷Beterus Deside Isa turun léman bukit nike teiring siq rasul-rasul nike, terus mentelah dait nganjeng léq sopoq taoq saq lendek. Léq derike araq éndah luwéq pengiring-pengiring-Ne saq lain dait luwéq dengan saq dateng léman selapuq wilayah Yudea, Yerusalem dait kote-kote Tirus dait Sidon saq léq sedin segare.

¹⁸Ie pade dateng jari dengahang Deside Isa, dait jari teselahang léman penyakit-penyakit ie pade. Ie pade saq tekuasein siq roh jahat dateng éndah dait teselahang.

¹⁹Selapuq dengan berusahe jamah Deside Isa, séngaq araq kuase saq sugul léman diriq-Ne saq nyelahang ie pade selapuq.

²⁰Deside Isa perhatiang pengiring-pengiring-Ne terus bemanik, “Bahagie side pade dengan-dengan miskin, séngaq side pade saq dowéang Kerajaan Allah!

²¹Bahagie side pade saq lapah mangkin; side pade gen tepuasang! Bahagie side pade saq nangis mangkin; side pade gen keleléq!

²² Bahagie side pade, lamun lantaran Bije Manusie side pade temeriq, tetolaq, tehine dait tepitnah!

²³ Nabi-nabi jaman laéq teperlakuang maraq nike éndah. Lamun hal nike telaksane, side pade harus terimaq secare ihlas, dait tetep besukecite, séngaq upaq side pade beléq léq sorge.

²⁴Laguq celake side pade saq sugih mangkin niki; séngaq side pade sampun ngalamin kenikmatan!

²⁵Celake side pade saq besuh mangkin niki; séngaq side pade gen kelapahan! Celake side pade saq keleléq mangkin niki; séngaq side pade gen aséq dait nangis!

²⁶Celake side pade lamun selapuq dengan puji side pade; séngaq maraq nike éndah leluhur ie pade sampun perlakuang nabi-nabi palsu.”

²⁷“Laguq tipaq side pade saq dengahang Tiang mangkin niki, Tiang sampéang pesen niki: Kasihin musuh-musuhde, dait laksaneang saq solah tipaq dengan saq meriq léq side.

²⁸Berkahin dengan saq ngutuk side, dait do'eang dengan saq aniaye side.

²⁹Lamun dengan nempélék sangképde saq sopoq, alurang ie nempélék sangképde saq sopoqne éndah. Lamun jubahde terampas, béng éndah kelambinde.

³⁰Lamun araq dengan saq nunas léq side, béng ie; dait lamun dowénde terampas, ndaq lakoq ie malik.

³¹ Perlakuang dengan lain maraq side pade melét teperlakuang siq ie pade.

³²Lamun side pade ngasihin dengan-dengan saq ngasihin side pade, napi saq gen jari upaqde? Dengan bedose éndah ngasihin dengan-dengan saq ngasihin ie pade!

³³Dait lamun side pade solah tipaq dengan-dengan saq solah léq side, napi upaqde? Dengan bedose éndah piaq maraq nike!

³⁴Dait lamun side pade nyinggaqang képéng cume tipaq dengan-dengan saq bau nulakang, napi upaqde? Dengan bedose éndah nyinggaqang képéng tipaq dengan bedose, terus ie tagih malik!

³⁵Seharusne ndéq maraq nike! Sebalikne side pade harus ngasihin musuhde dait solah léq ie pade. Side pade harus béng nyinggaq, dait ndaq harepang tetulakang malik. Lamun maraq nike, upaqde gen beléq dait side pade gen jari bije-bije dowén Allah Saq Maheagung. Séngaq Allah nike murah até léq dengan saq ndéq tao betampi asih, dait tipaq saq jahat éndah.

³⁶Side pade harus murah até, pade maraq Bapa side murah até.”

³⁷“Ndaq side pade hakimin dengan lain, make side pade ndéq gen tehakimin. Ndaq side pade hukum dengan lain, make side pade ndéq gen tehukum; ampunin dengan lain dait side pade gen teampunin.

³⁸Pade béng tipaq dengan lain, dait side pade gen tebéng: Sopoq takahan saq solah, saq tepadetang, saq tegerik dait saq tumpah ojok luah gen tebéng tipaq side pade. Séngaq ukuran saq side pade kadu léq dengan lain, nike éndah gen tekadu siq Allah léq side pade.”

³⁹ Beterus Deside Isa nyampéang malik tipaq ie pade sopoq perumpamean: “Lamun dengan bute pimpin dengan bute saq lain, pasti deduaqne gen geriq ojok longkak.

⁴⁰ Sopoq murit ndéqne beléqan léman gurune, laguq murit saq sampun tamat gen jari pade maraq gurune.

⁴¹Kembéq side pade pedaseng bubuk kayuq léq dalem penenteng semetonde, padahal balok léq dalem penentengde, ndéq side pade perhatiang?

⁴²Berembé side pade bau bebase léq semetonde, ‘Tunas, semeton, tiang sugulang bubuk kayuq léq penentengde nike,’ padahal dalem penentengde mésaq araq balok saq ndéq side pade serioq? Hai dengan munapik! Sugulang juluq balok saq araq léq penentengde mésaq, baruq side pade pedas serioq dait bau nyugulang bubuk kayuq léman penenteng semetonde.”

⁴³“Lolo saq solah ndéqne mungkin ngasilang buaq saq ndéq solah. Maraq nike éndah lamun lolo nike ndéq solah, ndéqne mungkin ngasilang buaq saq solah.

⁴⁴ Sebilang lolo tetaoq léman buaqne. Bebenes saq beduwi ndéq ngasilang buaq are, dait pupaq saq beduwi ndéq ngasilang buaq anggur.

⁴⁵ Dengan saq solah nyugulang hal-hal saq solah séngaq aténe penoq siq hal-hal saq solah. Dengan saq jahat nyugulang hal-hal saq jahat séngaq aténe penoq siq hal-hal saq jahat. Séngaq napi saq teucapang siq biwih tetentuang siq isi aténe.”

⁴⁶“Kembéq side pade ngempoh Tiang, ‘Junjungan Saq Mulie, Junjungan Saq Mulie,’ laguq ndéq ngelaksaneang napi saq Tiang manikang léq side?

⁴⁷Kance sai bau ite padeang dengan saq dateng tipaq Tiang dait dengahang manik Tiang terus ie laksaneang manik nike? -- Tiang badaq side pade --.

⁴⁸Ie pade maraq dengan saq kenyeke penganjeng balé, kaliqne dalem-dalem, terus miaq dasar balé nike kadu batu. Waktu araq belabur dait aiq kokoq dateng babar balé nike, balé nike ndéq iniq inggur, séngaq tepenganjeng léq atas dasar saq kuat.

⁴⁹Laguq dengan saq dengah manik Tiang dait ndéq ie laksaneang, pade maraq dengan saq penganjeng balé ndéq kadu dasar. Waktu tebabar siq belabur, balé nike becat ruk; dait luwéq gati sédene!”