Read KITAB SUCI ZABUR INJIL LUKAS 8 Bible Online

LUKAS 8 - KITAB SUCI ZABUR INJIL bible

LUKAS 8

¹Ndéq ngonéq sesampun nike, Deside Isa lumbar ojok kote-kote dait kampung-kampung jari beriteang Kabar Solah mengenai Kerajaan Allah. Due olas pengiring Deside Isa éndah milu ngiring Ie.

² Maraq nike éndah pire dengan nine saq sampun teselahang léman kuase roh jahat dait penyakit. Aran dengan-dengan nine nike, Mariam saq tesebut Magdalena (saq tebébasang léman pituq roh jahat);

³Yohana, seninene Kuza, pegawé istane Herodes; Susana, dait luwéq malik dengan nine lain. Siq biaye mésaq, ie pade nulung Deside Isa dait pengiring-pengiring-Ne.

⁴Dengan-dengan terus doang dateng tipaq Deside Isa léman kote-kote saq lain. Dait sesampun luwéq dengan pade bekumpul, Deside Isa nyeriteang ie pade perumpamean niki:

⁵“Araq sopoq dengan lumbar sawur binéq. Sewaktu ie sawur binéq nike, araq binéq saq geriq léq langan. Separo teicaq siq dengan dait saq lainne tekaken siq kedit.

⁶Araq éndah saq geriq léq taoq bebatu-batu. Léq waktu suli-suline sugul taletan nike layu séngaq tanaqne gero.

⁷Araq éndah binéq saq geriq léq tengaq bebenes beduwi. Bebenes beduwi nike tiwoq bareng binéq nike, dait gepitne jangke maté.

⁸Laguq araq éndah binéq saq geriq léq tanaq saq subur, terus tiwoq dait ngasilang buaq satus kali lipet.” Sesampun nyeriteang perumpamean nike, Deside Isa bemanik, “Sai-sai bedowé kentok jari dedengah, harus ie dengahang!”

⁹Pengiring-pengiring Deside Isa metakén léq Deside Isa mengenai arti perumpamean nike.

¹⁰ Jawab Deside Isa, “Side pade sampun teicanin paice jari nenaoq rahasie Kerajaan Allah. Laguq dengan-dengan lain teajah kadu perumpamean, adéq timaq ie pade serioq, laguq ie pade ndéq perhatiang; dait ie pade dengah laguq ndéq ngerti.”

¹¹“Niki arti perumpamean nike: Binéq nike Manik Allah.

¹²Binéq saq geriq léq langan, ibarat dengan-dengan saq dengah manik nike. Laguq Belis dateng dait ngerampas manik nike léman até ie pade, adéq ie pade ndaq percaye dait teselametang.

¹³Binéq saq geriq léq taoq saq bebatu-batu ibarat dengan saq sewaktu dengah manik nike, nerimaq siq seneng angenne. Laguq manik nike ndéq berakah léq até ie pade. Ie pade percaye seberaq doang, dait léq waktu dateng cobe, ie pade murtat.

¹⁴Binéq saq geriq léq tengaq bebenes beduwi ibarat dengan saq dengah manik nike, laguq kuatir mengenai idup ie pade; dait melét idup méwah dait seneng léq dalem dunie niki. Selapuqne nike saq gepit ie pade sehingge ndéq ngasilang buaq saq masak.

¹⁵Binéq saq geriq léq tanaq saq subur ibarat dengan saq dengah manik nike, terus simpenne léq dalem até saq solah dait jujur. Ie pade bau tahen jangke ngasilang buaq.”

¹⁶ “Ndéq araq dengan saq nyaleang dilah terus kudungne kadu tepaq, atao toloqne léq bawaq lasah. Ie gen toloq dilah nike léq naén dilah, adéq dengan saq tame bau serioq menahne.

¹⁷ Ndéq araq saq teseboq saq ndéq gen penggitan; dait ndéq araq saq terahasieang saq ndéq gen tebungkar dait tetaoq.

¹⁸ Keranaq nike, perhatiang solah-solah berembé entane side pade dedengah. Séngaq dengan saq sampun bedowé, gen teican luwéqan malik; laguq dengan saq ndéq bedowé, sekediq saq masih araq léq ie gen tebait éndah.”

¹⁹Mamiq bini dait sanak-sanak Deside Isa rauh tipaq Deside Isa, laguq ie pade ndéq bau dateng tipaq Ie séngaq luwéq gati dengan.

²⁰Beterus araq sopoq dengan saq matur léq Deside Isa, “Paq, mamiq bini dait sanak-sanak Pelungguh araq léq luah. Ie pade melét bedait kance Pelungguh.”

²¹Laguq Deside Isa bemanik léq ie pade, “Dengan-dengan saq dengah manik Allah dait ngelaksaneang ie, ie pade saq jari inaq dait semeton-semeton Tiang.”

²²Léq sopoq jelo Deside Isa kance pengiring-pengiring-Ne taék ojok perau. “Silaq ite belayar ojok itoqan danao,” manik Deside Isa léq ie pade. Make ie pade berangkat.

²³Sewaktu ie pade kenyeke belayar, Deside Isa ketindoqan. Selung-selung angin pusut nimpe danao nike. Aiq mulai tame ojok dalem perau, sehingge bahayeang ie pade selapuq.

²⁴Pengiring-pengiring-Ne lumbar ojok Deside Isa dait tangiang Ie. Ie pade matur, “Paq Guru, Paq Guru, ite celake!” Deside Isa metangi terus semprak-Ne angin dait umbak saq kenyeke ngamuk nike. Angin dait umbak nike engkah terus danao jari tenang.

²⁵Beterus Deside Isa bemanik léq pengiring-pengiring-Ne, “Kembéq side pade ndéq percaye léq Tiang?” Ie pade jari bengaq dait takut. Dait ie pade saling ketuan sopoq kance saq lain, “Sai setetune dengan niki, sehingge angin dait umbak taat léq préntah-Ne!”

²⁶Deside Isa dait pengiring-pengiring-Ne terus belayar jangke ojok daérah dengan Gerasa léq itoqan Danao Galilea.

²⁷Sewaktu Deside Isa turun ojok darat, Ie tedatengin sopoq dengan mame saq tekuasein siq sétan. Dengan nike léman kote. Sampun ngonéq ie ndéq bekelambi dait ndéq mélé ndot léq balé. Ie cume mélé ndot léq goe-goe taoq ngubur jenazah.

²⁸Sewaktu serioq Deside Isa, ie nyurak terus sujut léq arepan Deside Isa dait bekuih, “Deside Isa, Bije saq asalne léman Allah Saq Maheagung! Gen Pelungguh kumbéqang tiang niki? Tiang tunas sampunang siksaq tiang!”

²⁹Dengan nike matur maraq nike séngaq Deside Isa préntah sétan nike sugul léman ie. Sampun rimpes gati ie tekuasein siq roh jahat nike sehingge timaq ime dait naéne sampun tebécang kadu ranté dait ie tejagaq pacu-pacu, ie masih doang bau pegatang ranté nike terus tejauq siq roh jahat ojok taoq-taoq saq sepi.

³⁰Deside Isa beketuan léq dengan nike, “Sai arande?” “Aran tiang ‘Legiun’,” jawab dengan nike -- séngaq araq luwéq sétan saq sampun tame ojok dalem diriqne.

³¹Sétan-sétan nike tunas léq Deside Isa adéq ie pade ndéq tesediq ojok dalem jurang maut.

³²Dékét taoq nike araq luwéq gati bawi saq kenyeke boyaq kakenan léq tembéréng gunung. Sétan-sétan nike tunas léq Deside Isa adéq teijinang tame ojok dalem bawi-bawi nike. Petunasan ie pade tekabulang siq Deside Isa.

³³Make sétan-sétan nike sugul léman dengan nike dait tame ojok dalem bawi-bawi nike. Beterus bawi-bawi nike pelai dait nimproh léman sedin jurang ojok dalem danao, beterus ketelep.

³⁴Penjage-penjage bawi nike serioq napi saq sampun telaksane. Make ie pade pelai nuturang hal nike léq kote dait léq dése sekiterne.

³⁵Beterus dengan-dengan sugul jari serioq napi saq telaksane. Ie pade dateng tipaq Deside Isa, dait léq derike ie pade ndait dengan saq sampun bébas léman sétan-sétan nike kenyeke tokol dékét cokor Deside Isa. Ie sampun bekelambi malik dait sampun waras pikiranne. Ie pade jari takut.

³⁶Ie pade saq nyaksiang mésaq peristiwe nike nyeriteang tipaq dengan-dengan berembé dengan nike teselahang.

³⁷Beterus selapuq penduduk daérah Gerasa nike tunas adéq Deside Isa bilin taoq nike, séngaq ie pade selapuq takut gati. Jari Deside Isa taék perau terus mantuk.

³⁸Dengan saq sampun tebébasang léman sétan-sétan nike tunas léq Deside Isa adéq ie teijinang milu. Laguq Deside Isa suruq ie lumbar, manik-Ne,

³⁹“Uléq dait ceriteang napi saq Allah sampun laksaneang léq side.” Make dengan nike lumbar nyeriteang ojok mbé-mbé léq selapuq kote, napi saq Deside Isa sampun laksaneang léq ie.

⁴⁰Sewaktu Deside Isa tulak léman itoqan danao, Ie tesambut siq dengan luwéq, séngaq ie pade kenyeke ngantos Ie.

⁴¹Beterus dateng sopoq kepale balé ibadah aranne Yairus. Ie sujut léq arepan Deside Isa, dait sanget siqne tunas adéq Deside Isa rauh ojok gedéngne,

⁴²séngaq sopoq-sopoqne bijene saq nine beumur due olas taun jaqne milinang. Sewaktu Deside Isa bemargi ojok gedéng Yairus, Ie tedesek-desek siq dengan luwéq.

⁴³Araq sopoq dengan nine saq sampun due olas taun sakit pendarahan dait ndéq bau teselahang siq sai-sai.

⁴⁴Dengan nine nike ngerapetin Deside Isa léman mudi, terus kintur poton jubah-Ne. Waktu nike éndah pendarahanne engkah.

⁴⁵Deside Isa beketuan, “Sai saq kintur Tiang?” Selapuq dengan ndéq araq saq ngaku. Beterus Petrus matur, “Paq Guru, araq luwéq gati dengan léq sekelining Pelungguh; ie pade desek-desek Pelungguh!”

⁴⁶Deside Isa bemanik, “Laguq araq dengan saq kintur Tiang. Tiang taoq nike, séngaq araq kuase saq sugul léman Tiang!”

⁴⁷Dengan nine nike sadar bahwe perbuatanne sampun tewikanang, ie parek sambil ngijik terus sujut léq arepan Deside Isa. Ie nyeriteang léq julun selapuq dengan, kembéq ie kintur Deside Isa, dait berembe penyakitne langsung selah.

⁴⁸Deside Isa bemanik léq ie, “Dénde, imande sampun miaq side selah, silaq lumbar dalem damé.”

⁴⁹Léq waktu Deside Isa masih bebaos, sopoq pelayan dateng léman gedéng Yairus. Ie matur léq Yairus, “Bijende sampun ninggal. Sampunang pelungguh nyusahang Bapaq Guru malik.”

⁵⁰Sewaktu Deside Isa pirengang hal nike, Ie bemanik léq Yairus, “Ndaq takut. Percaye doang, bijende gen selah.”

⁵¹Sesampun rauh léq gedéng Yairus, Deside Isa nénten ngijinang sopoq dengan tame kance Ie kecuali Petrus, Yahya, Yakub dait inaq amaq kanak nike doang.

⁵²Selapuq dengan kenyeke nangis dait éroq aséq séngaq kanak nike milinang. Laguq Deside Isa bemanik, “Ndaq nangis. Kanak nike ndéq milinang, ie cume tindoq!”

⁵³Ie pade ngeleléqang Deside Isa, séngaq ie pade nenaoq kanak nine nike sampun milinang.

⁵⁴Beterus Deside Isa tegel ime kanak nike dait bemanik, “Dénde, silaq ures!”

⁵⁵Nyawe kanak nike tulak ojok ie, dait waktu nike éndah ie ures. Sesampun nike, Deside Isa manikang ie pade ngebéng kanak nike bekelor.

⁵⁶Dengan toaq kanak nike bengaq gati. Laguq Deside Isa balaq ie pade nyeriteang peristiwe nike tipaq sai-sai.