Read KITAB SUCI ZABUR INJIL YAHYA 10 Bible Online

YAHYA 10 - KITAB SUCI ZABUR INJIL bible

YAHYA 10

¹“Tiang badaq side: Setetune dengan saq tame ojok baren dombe liwat lambah, dait ndéq liwat lawang, dengan nike maling dait perampok.

²Laguq dengan saq tame liwat lawang, ie pengarat dombe nike.

³Penjage bare bukaqang ie lawang, dait dombe-dombe turut suarene sewaktu ie ngempoh aranne sopoq-sopoq, dait ie pade tedéndén ojok luah.

⁴Sesampun dombe-dombe nike tejauq ojok luah, pengarat nike lampaq léq julu, dait dombe-dombe nike turut ie séngaq ie pade tandaq suarene.

⁵Dombe-dombe nike ndéqne mélé turut dengan lain, malahan gen pelai léman dengan nike, séngaq ndéqne tandaq suarene.”

⁶Deside Isa nyeriteang perumpamean nike, laguq ie pade ndéq ngerti napi maksut-Ne.

⁷Beterus Deside Isa bemanik karing sekali, “Tiang badaq side setetune Tiang niki lawang umaq dombe nike.

⁸Selapuq saq dateng sendéqman Tiang, nike maling dait perampok, dait dombe-dombe ndéq mélé dengahang suare ie pade.

⁹Tiang niki lawang. Sai-sai tame langan Tiang gen selamet; ie sugul tame dait mauq keloran.

¹⁰Maling dateng cume jari memaling, nyematéq dait jari nyenyédaq. Laguq Tiang dateng adéq manusie mauq idup -- idup belimpah-limpah.

¹¹Tiang niki pengarat saq solah. Pengarat saq solah nyerahang nyawene umaq dombe-dombene.

¹²Dengan saq teupaq dait saq ndéq pengarat dait ndéqne éndah épén dowé dombe-dombe nike, gen pelai bilin dombe-dombe lamun ie serioq serigale dateng. Make dombe-dombe nike gen tecakrah dait tepiaq buyar siq serigale nike.

¹³Dengan saq teupaq nike pelai, séngaq ie begawéan jari boyaq upaq. Ie ndéq ngerunguq dombe-dombe nike.

¹⁴ Tiang niki pengarat saq solah. Pade maraq Bapa kenal kance Tiang dait Tiang kenal kance Bapa, maraq nike éndah Tiang kenal dombe-dombe Tiang dait ie pade éndah kenal Tiang. Tiang nyerahang nyawe Tiang umaq ie pade.

¹⁶Masih araq dombe-dombe lain saq jari dowén Tiang éndah, laguq ndéq tame itungan dombe-dombe saq luwéq niki. Ie pade éndah harus Tiang jauq dait ie pade gen dengahang suare Tiang. Ie pade selapuq gen jari sopoq kumpulan siq sopoq pengarat.

¹⁷Bapa ngasihin Tiang lantaran Tiang nyerahang nyawe Tiang jari bait ie malik.

¹⁸Ndéq araq sopoq dengan juaq saq bau bait ie léman Tiang. Tiang nyerahang ie siq keméléq Tiang mésaq. Tiang bekuase nyerahang ie, dait bekuase bait ie malik. Nike tugas saq Tiang terimaq léman Bapa Tiang.”

¹⁹Lantaran Deside Isa bemanik maraq nike, dengan-dengan Yahudi mulai betungkasan.

²⁰Luwéq saq bebase, “Ie tekuasein siq sétan! Ie jogang! Kembéq side pade dengah Ie?”

²¹Laguq araq éndah saq bebase, “Dengan saq tekuasein siq sétan ndéq ngeraos maraq nike! Napi bau sétan piaq dengan bute tao nyerioq?”

²²Léq Yerusalem dengan-dengan kenyeke ngerayeang Hari Raye Peresmian Gedéng Allah. Waktu nike musim telih.

²³Deside Isa kenyeke bemargi léq Sesangkok Sulaiman léq dalem Gedéng Allah,

²⁴sewaktu dengan-dengan Yahudi dateng bekumpul léq sekelining Deside Isa. Ie pade matur, “Jangke piran Pelungguh alurang tiang pade bimbang? Manikang secare terus terang, lamun Pelungguh tetu-tetu Almasih.”

²⁵Jawab Deside Isa, “Sampun Tiang badaq side, laguq side pade ndéq percaye. Karye-karye saq Tiang laksaneang dalem peséngan Bapa Tiang, nike ngebéng bukti mengenai Tiang.

²⁶Side pade ndéq percaye séngaq side pade ndéq tame itungan dombe-dombe Tiang.

²⁷Dombe-dombe Tiang dengahang suare Tiang. Tiang kenal ie pade, dait ie pade turut Tiang.

²⁸Tiang ngebéng idup sejati dait kekel tipaq ie pade dait ie pade pasti ndéq gen binase selaéq-laéqne. Ndéq araq sopoq dengan juaq saq bau ngerampas ie pade léman imen Tiang.

²⁹Bapa Tiang, saq sampun ngicanin ie pade léq Tiang, beléqan léman selapuqne. Dait ndéq sopoq dengan juaq bau ngerampas ie pade léman Bapa.

³⁰Tiang dait Bapa sopoq.”

³¹Beterus dengan-dengan Yahudi bait malik batu jari meléwas Deside Isa.

³²Laguq manik Deside Isa léq ie pade, “Side pade sampun serioq Tiang ngelaksaneang luwéq karye saq solah, saq tetugasang siq Bapa léq Tiang. Saq mbé léq antare karye nike saq jari penyebap side pade mélé meléwas Tiang?”

³³ Jawab dengan-dengan Yahudi nike, “Nénten lantaran karye-karye Pelungguh saq solah nike tiang pade mélé meléwas Pelungguh kadu batu, laguq lantaran Pelungguh menghine Allah. Pelungguh manusie biase, laguq padeang diriq kance Allah?”

³⁴ Beterus jawab Deside Isa, “Tekan araq tetulis léq dalem Kitab Suci Taurat, Allah bemanik, ‘Side pade déwe’?

³⁵Jari, lamun ie pade tesebut déwe lantaran Manik Allah tesampéang tipaq ie pade -- padahal Kitab Suci ndéqne bau tebatalang --,

³⁶napi masih side pade bebase tipaq Ie saq tesuciang dait teutus ojok dunie siq Bapa: Side menghine Allah! Séngaq Tiang sampun bemanik, Tiang Bije saq asalne léman Allah?

³⁷Lamun Tiang ndéq ngelaksaneang karye-karye Bapa Tiang, ndaq percaye léq Tiang.

³⁸Laguq lantaran Tiang ngelaksaneang hal nike, pade percaye léq napi saq Tiang laksaneang nike, timaq side pade ndéq mélé percaye léq Tiang. Adéq side pade nenaoq dait ngerti bahwe Bapa léq dalem Tiang, dait Tiang léq dalem Bapa.”

³⁹Ie pade berusahe malik bau Deside Isa, laguq Deside Isa luput léman ie pade.

⁴⁰ Deside Isa tulak ojok itoqan Kokoq Yordan, léq taoq Yahya laéq baptis dengan, terus meneng léq derike.

⁴¹Luwéq dengan parek ojok Deside Isa. Ie pade matur, “Yahya nénten ngelaksaneang keajaipan-keajaipan, laguq selapuq saq ie sampéang mengenai dengan niki mule kenaq.”

⁴²Beterus luwéq dengan léq derike percaye léq Deside Isa.