Read KITAB SUCI ZABUR INJIL YAHYA 12 Bible Online

YAHYA 12 - KITAB SUCI ZABUR INJIL bible

YAHYA 12

¹Enem jelo sendéqman Hari Raye Paskah, Deside Isa lumbar ojok Betania. Lazarus saq sampun teidupang siq Deside Isa léman tengaq-tengaq dengan ninggal, ndot léq taoq nike.

²Léq derike Deside Isa tejamu siq ie pade dait Marta éndah milu nulung ie pade. Lazarus dait temué-temué bareng melinggih medaran kance Deside Isa.

³ Beterus dateng Mariam, jauq kire-kire setenge liter minyak sengéh narwastu saq mahel gati. Ie noléngang minyak nike léq cokor Deside Isa, dait osokne kadu bulune. Selapuq balé nike jari sengéh siq ambu minyak nike.

⁴Laguq Yudas Iskariot, salaq sopoq pengiring Deside Isa -- saq selanjutne behianat léq Ie -- bebase,

⁵“Kembéq minyak sengéh nike ndéq tejual doang siq aji telu ratus képéng perak, dait képéngne tesedekahang tipaq dengan miskin?”

⁶Yudas bebase maraq nike ndéqne lantaran ie merhatiang dengan miskin, laguq lantaran ie pemalingan. Ie kereng bait képéng kas saq tesimpen léq ie.

⁷Laguq Deside Isa bemanik, “Alurang dengan nine nike! Ie ngelaksaneang hal niki jari jelo pemakaman Tiang.

⁸ Dengan miskin tetep araq léq antare side pade, laguq Tiang ndéq.”

⁹Luwéq dengan Yahudi dengah bahwe Deside Isa araq léq Betania, jari ie pade lumbar ojok derike. Ie pade lumbar ndéq cume lantaran Deside Isa, laguq éndah ie pade mélé serioq Lazarus saq sampun teidupang siq Deside Isa léman tengaq-tengaq dengan ninggal.

¹⁰Keranaq nike imam-imam kepale éndah mélé nyematéq Lazarus;

¹¹séngaq ie jari penyebap luwéq dengan Yahudi bilin ie pade dait percaye léq Deside Isa.

¹²Léq jelo jemaqne, dengan luwéq saq sampun dateng jari ngerayeang Paskah dengah bahwe Deside Isa kenyeke dalem pemargian ojok Yerusalem.

¹³ Ie pade bait daun-daun palem beterus lumbar nyambut Ie, sambil besurak-surakan, “Hosana! Teberkahin Ie saq rauh dalem peséngan Tuhan, Raje Israel!”

¹⁴Deside Isa ndait sopoq bagal saq masih odaq, terus Ie taék léq atasne. Make telaksane saq tetulis dalem Kitab Suci:

¹⁵ “Ndaq takut, putri Sion! Pade serioq Rajende rauh, nunggang sopoq bagal saq masih odaq!”

¹⁶Waktu nike pengiring-pengiring Deside Isa ndéqman ngerti selapuqne nike. Laguq sesampun Deside Isa temulieang, baruq ie pade inget bahwe selapuq saq telaksane léq Deside Isa nike sampun tetulis léq Kitab Suci, maraq nike éndah selapuq hal saq sampun ie pade laksaneang tipaq Deside Isa.

¹⁷Dengan-dengan saq araq waktu Deside Isa ngemanikang Lazarus sugul léman kubur dait ngidupang ie léman ninggal, terus ngebéng kesaksian mengenai hal nike.

¹⁸Keranaq nike dengan luwéq nike lumbar ojok Deside Isa séngaq ie pade dengah bahwe Deside Isa saq miaq keajaipan nike.

¹⁹Make dengan-dengan Parisi bebase sopoq kance saq lainne, “Ite ndéq bau piaq napi-napi! Silaq serioq, seantéro dunie lumbar turut Ie!”

²⁰Léq antare dengan-dengan saq lumbar ibadah ojok Yerusalem waktu perayaan nike araq éndah pire dengan Yunani.

²¹Ie pade dateng ojok Pilipus dait bebase, “Paq, lamun bau tiang pade melét bedait kance Deside Isa.” (Pilipus asalne léman Betsaida léq Galilea.)

²²Beterus Pilipus lumbar nyampéang hal nike tipaq Andreas, deduaqne nyampéang tipaq Deside Isa.

²³Deside Isa bemanik léq ie pade, “Sampun waktune Bije Manusie temulieang.

²⁴Tiang badaq side: Setetune lamun setolang gandum ndéq tetalet léq dalem tanaq dait maté, ie gen tetep araq setolang. Laguq lamun tolang gandum nike maté, baruq ie bau ngasilang luwéq gandum.

²⁵ Dengan saq tunah nyawene gen kélangan nyawene. Laguq dengan saq meriq léq nyawene léq dunie niki, gen meliharaq ie jari idup sejati dait kekel.

²⁶Dengan saq mélé ngelayanin Tiang harus turut Tiang, dait léq mbé Tiang araq léq derike éndah pelayan Tiang araq. Dengan saq ngelayanin Tiang gen tehormatin siq Bapa Tiang.”

²⁷“Angen Tiang kuatir; napi saq harus Tiang ucapang mangkin? Napi Tiang harus ngucapang, ‘Bapa, selametang Tiang mulai mangkin?’ Laguq malahan Tiang dateng jari ngalamin penderitean niki.

²⁸Bapa, mulieang peséngan Deside!” Make kedengahan suare léman langit, “Tiang sampun mulieang Ie, dait Tiang gen mulieang Ie malik.”

²⁹Dengan luwéq saq araq léq derike dengah suare nike. Ie pade bebase, “Nike guntur!” Laguq araq éndah saq bebase, “Ndéq ie! Malaékat bebaos léq Ie!”

³⁰Beterus Deside Isa bemanik léq ie pade, “Suare nike kedengahan, ndéq jari kepentingan Tiang, laguq jari kepentingan side.

³¹Mangkin sampun waktune dunie tehakimin; mangkin penguase dunie niki gen tetetéh ojok luah.

³²Laguq Tiang niki, lamun Tiang tetaékang léman gumi, Tiang gen antuq selapuq dengan dateng ojok Tiang.”

³³Deside Isa bemanik maraq nike jari nyatayang berembé entane Ie gen ninggal.

³⁴ Dengan luwéq nike bebase léq Ie, “Menurut Hukum Taurat tiang pade, Almasih gen idup selaéq-laéqne. Berembé Pelungguh bau bebaos bahwe Bije Manusie harus tetaékang léman gumi? Sai Bije Manusie nike?”

³⁵Jawab Deside Isa, “Cume semendaq doang terang nike araq léq antare side pade. Jari, pade lampaq semasih terang nike araq, adéq peteng nike ndaq nguasein side pade. Dengan saq lampaq léq tengaq peteng ndéqne taoq ojok mbé aningne.

³⁶Pade percaye léq terang nike, semasih terang nike araq léq side, adéq side pade jari bije-bije terang.” Sesampun bemanik maraq nike, Deside Isa lumbar nyeboq léman ie pade.

³⁷Timaq sampun luwéq keajaipan saq tepiaq siq Deside Isa léq julu ie pade, ie pade ndéq percaye léq Deside Isa.

³⁸ Siq care nike telaksane napi saq tesampéang siq nabi Yesaya, “Tuhan, sai saq percaye léq berite tiang pade? Léq sai kuase Tuhan tenyatayang?”

³⁹Keranaq nike ie pade ndéq iniq percaye, séngaq Yesaya sampun bebase éndah,

⁴⁰ “Ie sampun buteang penenteng dait miaq até ie pade jari pagah; adéq ie pade ndaq serioq siq penenteng, dait pikiran ie pade ngerti, terus betobat, sehingge Tiang nyelahang ie pade.”

⁴¹Yesaya bebase maraq nike séngaq ie sampun serioq kemuliean Deside Isa, dait bebase mengenai Ie.

⁴²Timaq maraq nike, malahan luwéq dengan léq antare penguase Yahudi percaye léq Deside Isa. Laguq ie pade ndéq bani akuq nike secare terus terang, séngaq ie pade takut ndaq-ndaq dengan Parisi ndéq ngijinang ie pade tame balé ibadah.

⁴³Ie pade demenan mauq pujian léman manusie ketimbang pujian léman Allah.

⁴⁴Beterus Deside Isa bemanik siq suare saq beléq, “Dengan saq percaye léq Tiang, ndéq léq Tiang ie percaye, laguq léq Ie saq ngutus Tiang.

⁴⁵Dait dengan saq serioq Tiang, serioq Ie saq ngutus Tiang.

⁴⁶Tiang dateng ojok dunie jari terang, adéq selapuq dengan saq percaye léq Tiang ndaq ndot léq dalem peteng.

⁴⁷Dengan saq dengahang pengajahan Tiang, laguq ndéq taat -- ndéqne Tiang saq hukum ie. Séngaq Tiang dateng ndéq jari hakimin dunie niki, laguq jari nyelametang ie.

⁴⁸Dengan saq nolaq Tiang dait ndéq dengahang manik Tiang, sampun araq saq hakimin ie. Manik saq Tiang sampéang, nike saq gen hakimin ie léq ahir jaman.

⁴⁹Séngaq Tiang ndéq bemanik léman keméléq Tiang mésaq; Bapa saq ngutus Tiang, Ie saq préntah Tiang napi saq harus Tiang ucapang dait Tiang sampéang.

⁵⁰Dait Tiang nenaoq bahwe préntah-Ne nike ngicanin idup sejati dait kekel. Make Tiang nyampéang maraq saq teajahang Bapa léq Tiang.”