Read KITAB SUCI ZABUR INJIL YAHYA 13 Bible Online

YAHYA 13 - KITAB SUCI ZABUR INJIL bible

YAHYA 13

¹Sejelo sendéqman Hari Raye Paskah, Deside Isa wikan bahwe sampun waktune Ie bilin dunie niki jari tulak tipaq Bapa-Ne. Ie ngasihin dengan-dengan saq jari dowé-Ne léq dunie, dait Ie tetep ngasihin ie pade jangke penutuq.

²Sewaktu Deside Isa dait pengiring-pengiring-Ne kenyeke medaran, Belis sampun tamaqang niat léq dalem até Yudas bije Simon Iskariot jari behianat léq Deside Isa.

³Deside Isa wikan bahwe Bapa sampun nyerahang selapuq kekuasean tipaq Ie. Ie wikan éndah bahwe Ie rauh léman Allah dait gen tulak tipaq Allah.

⁴Keranaq nike Ie ngadeg, lekaq jubah-Ne terus bebet-Ne kain lénen léq kéng-Ne.

⁵Sesampun nike, Ie isiq aiq ojok dalem tepaq, beterus mulai bisoq naén pengiring-pengiring-Ne dait lapne kadu kain lénen saq tebebet léq kéng-Ne nike.

⁶Sewaktu giliran naén Simon Petrus tebisoq, ie matur léq Deside Isa, “Junjungan Saq Mulie, Pelungguh gen bisoq naén tiang?”

⁷Jawab Deside Isa, “Mangkin side ndéq ngerti napi saq Tiang laksaneang niki, laguq éraq side gen ngerti.”

⁸Jawab Petrus léq Deside Isa, “Junjungan Saq Mulie, sampunang gati Junjungan Saq Mulie bisoq naén tiang!” Laguq jawab Deside Isa, “Lamun Tiang ndéq bisoq naénde, side ndéq mauq bagian bareng Tiang.”

⁹Simon Petrus matur, “Lamun maraq nike, Junjungan Saq Mulie, sampunang cume naén tiang laguq ime dait ulu tiang éndah!”

¹⁰Manik Deside Isa léq Petrus, “Dengan saq sampun mandiq, sampun bersi selapuqne Ie ndéq perlu tepersiq malik; kecuali naéne. Side pade sampun bersi, laguq ndéq selapuqne.” (

¹¹Deside Isa sampun wikan sai saq gen behianat léq Ie. Keranaq nike Ie bemanik, “Side pade sampun bersi, laguq ndéq selapuqne.”)

¹² Sesampun Deside Isa bisoq naén ie pade, Ie kadu malik jubah-Ne dait melinggih. Terus Deside Isa bemanik léq ie pade, “Napi side pade ngerti saq Tiang laksaneang léq side?

¹³Side pade ngempoh Tiang Guru dait Junjungan Saq Mulie. Dait mule maraq nike setetune.

¹⁴Lamun Tiang jari Junjungan Saq Mulie dait Gurunde sampun bisoq naén side, side pade wajib éndah saling bisoqang naé.

¹⁵Tiang ngebéng teladan niki léq side pade, adéq side pade laksaneang éndah napi saq sampun Tiang laksaneang léq side.

¹⁶ Mule kenaq manik Tiang niki: Sopoq hambe ndéqne beléqan léman majikanne, dait sopoq utusan ndéqne beléqan léman saq ngutus ie.

¹⁷Lamun side pade sampun nenaoq selapuqne niki, side pade gen bahagie lamun ngelaksaneang hal nike.

¹⁸ Napi saq Tiang sampéang niki ndéqne mengenai side pade selapuq. Tiang nenaoq sai-sai saq sampun Tiang piléq. Laguq napi saq tetulis dalem Kitab Suci, harus telaksane, ‘Dengan saq iring Tiang medaran, gen ngelawan Tiang.’

¹⁹Hal nike mangkin Tiang sampéang léq side pade, sendéqman telaksane, adéq lamun laun hal nike telaksane, side pade gen percaye bahwe Tiang niki Ie.

²⁰ Setetune kenaq manik Tiang niki: Sai nerimaq dengan saq Tiang utus, ie nerimaq Tiang. Dait sai saq nerimaq Tiang, nerimaq Ie saq ngutus Tiang.”

²¹Sesampun Deside Isa bemanik maraq nike, Ie jari aséq gati. Beterus Ie bemanik, “Tiang badaq side, setetune salaq sopoq léq antare side pade gen behianat léq Tiang.”

²²Pengiring-pengiring-Ne saling éngat sopoq kance saq lain dait jari bingung, séngaq ie pade ndéq nenaoq sai saq temaksut siq Deside Isa.

²³Salaq sopoq pengiring saq tekasihin siq Deside Isa tokol léq dékét Deside Isa.

²⁴Simon Petrus ngebéng isarat léq ie adéq ie metakén léq Deside Isa sai saq temaksut nike.

²⁵Beterus pengiring Deside Isa nike ngerapetin Deside Isa, dait metakén, “Junjungan Saq Mulie, sai dengan nike?”

²⁶Jawab Deside Isa, “Dengan saq Tiang béng ruti sesampun Tiang telep ruti nike ojok dalem jembung, ie dengan saq Tiang maksut.” Make Deside Isa bait sepeleng ruti, telepangne ojok dalem jembung; beterus icanin-Ne tipaq Yudas, bije Simon Iskariot.

²⁷Sesampun Yudas nerimaq ruti nike, Belis tame ojok dalem aténe. Beterus Deside Isa bemanik léq ie, “Becat laksaneang napi saq mélé side laksaneang.”

²⁸Ndéq araq sopoq dengan juaq léq antare ie pade saq tokol bekelor léq derike ngerti kembéq Deside Isa bemanik maraq nike léq Yudas.

²⁹Araq saq paran bahwe Deside Isa manikang Yudas beli napi-napi saq teperluang léq perayaan nike, atao ngicanin képéng tipaq dengan miskin -- séngaq Yudas nike jari bendahare léq antare ie pade.

³⁰Sesampun Yudas nerimaq ruti nike, ie langsung sugul. Waktu nike sampun peteng.

³¹Sesampun Yudas lumbar, Deside Isa bemanik, “Mangkin Bije Manusie temulieang dait Allah temulieang langan Ie.

³²Lamun Allah temulieang langan Ie, Ie éndah gen temulieang siq Allah langan diriq-Ne. Malahan Allah gelis gen ngemulieang Ie.

³³ Bije-bije Tiang, Tiang ndéq gen ngonéq malik ndot kance side pade. Side pade gen boyaq Tiang, laguq maraq saq sampun Tiang badaq léq dengan-dengan Yahudi, maraq nike éndah Tiang badaq side pade; ojok taoq saq Tiang laiq, side pade ndéq bau dateng.

³⁴ Tiang ngebéng préntah baru léq side: Pade kasihin sopoq kance saq lain. Pade maraq Tiang ngasihin side pade, maraq nike éndah side pade harus saling kasihin.

³⁵Lamun side pade saling kasihin, selapuq dengan gen nenaoq bahwe side pade pengiring-pengiring Tiang.”

³⁶Simon Petrus metakén léq Deside Isa, “Junjungan Saq Mulie, Pelungguh gen lumbar ojok mbé?” Jawab Deside Isa, “Ojok mbé lain Tiang, side ndéq bau milu mangkin. Side gen turut Tiang éraq.”

³⁷Petrus metakén malik, “Junjungan Saq Mulie, kembéq tiang nénten bau turut Pelungguh mangkin? Tiang réde maté demi Pelungguh!”

³⁸Jawab Deside Isa, “Napi tetu side réde maté demi Tiang? Tiang badaq side pacu-pacu, laun sendéqman manuk ngungkung, side sampun telu kali tilas Tiang!”