Read KITAB SUCI ZABUR INJIL YAHYA 15 Bible Online

YAHYA 15 - KITAB SUCI ZABUR INJIL bible

YAHYA 15

¹Deside Isa bemanik malik, “Tiang lolo anggur saq sejati, dait Bapa Tiang nike penggarapne.

²Sebilang pémpang saq araq léq Tiang saq ndéq bebuaq, peleng-Ne dait sebilang pémpang saq bebuaq tekurangin daunne dait persiq-Ne adéq luwéqan malik buaqne.

³Side pade sampun bersi lantaran manik saq Tiang sampéang léq side pade.

⁴Tetep ndot léq dalem Tiang dait Tiang éndah tetep ndot léq dalem side pade. Pade maraq pémpang ndéqne iniq bebuaq léman diriqne mésaq, kecuali lamun ie tetep léq lolone. Maraq nike éndah halne side pade ndéq gen bebuaq, lamun side pade ndéq ndot léq dalem Tiang.

⁵Tiang niki lolo anggur, dait side pade pémpang-pémpangne. Dengan saq tetep ndot léq dalem Tiang, dait Tiang léq dalem ie, ie bebuaq luwéq; séngaq lamun ndéq léq dalem Tiang, side ndéq tao piaq napi-napi.

⁶Dengan saq ndéq tetep ndot léq dalem Tiang, gen tetetéh maraq pémpang, beterus jari gero. Pémpang-pémpang saq maraq nike gen tekumpulang dait tetetéh ojok dalem api, beterus tesedut.

⁷Lamun side pade ndot léq dalem Tiang dait manik Tiang ndot léq dalem side, pade tunas napi juaq saq side mélé, dait side gen nerimaq ie.

⁸Lamun side pade bebuaq luwéq, Bapa Tiang temulieang; dait siq care nike side tetu-tetu pengiring Tiang.

⁹Maraq Bapa ngasihin Tiang, maraq nike éndah Tiang ngasihin side pade, pade ndot léq dalem kasih Tiang nike.

¹⁰Lamun side pade turut préntah-préntah Tiang, side pade gen ndot léq dalem kasih Tiang, pade maraq Tiang sampun turut préntah-préntah Bapa Tiang dait ndot léq dalem kasih-Ne.

¹¹Selapuqne niki Tiang sampéang tipaq side pade, adéq sukecite Tiang araq léq dalem aténde, dait sukecitende jari sempurne.

¹² Niki préntah Tiang: Pade kasihin sopoq kance saq lain, pade maraq Tiang ngasihin side pade.

¹³Ndéq araq kasih saq beléqan léman kasih sopoq dengan saq réde nyerahang nyawene umaq sahabat-sahabatne.

¹⁴Side pade sahabat-sahabat Tiang lamun side pade ngelaksaneang napi saq Tiang préntahang tipaq side pade.

¹⁵Side pade ndéq Tiang sebut hambe malik, séngaq hambe ndéq nenaoq napi saq tepiaq siq majikanne. Side pade Tiang sebut sahabat, séngaq selapuq saq Tiang dengah léman Bapa Tiang, sampun Tiang sampéang léq side pade.

¹⁶Ndéq side pade saq miléq Tiang. Laguq Tiang saq miléq side pade dait Tiang sampun netepang side pade lumbar dait ngasilang buaq dait buaqde nike ndéq iniq binase, adéq napi saq side tunas tipaq Bapa kadu aran Tiang, icanin-Ne tipaq side.

¹⁷Niki préntah Tiang léq side: Pade kasihin sopoq kance saq lain.”

¹⁸“Lamun dunie meriq léq side pade, pade inget bahwe Tiang sampun juluan temeriq siq dunie.

¹⁹Seandéne side pade léman dunie side pade gen tekasihin siq dunie jari dowéne. Laguq Tiang sampun piléq side pade léman dunie niki, jari side pade ndéqne malik dowén dunie. Keranaq nike dunie meriq léq side pade.

²⁰ Pade inget napi saq sampun Tiang sampéang léq side pade, ‘Hambe ndéqne beléqan léman majikanne.’ Lamun ie pade sampun nganiaye Tiang, make ie gen nganiaye side pade. Lamun ie pade turut manik Tiang, make ie pade éndah gen turut basen side pade.

²¹Laguq selapuqne nike gen ie pade laksaneang léq side pade lantaran aran Tiang, séngaq ie pade ndéq kenal Allah saq sampun ngutus Tiang.

²²Seandéne Tiang ndéq dateng dait ndéq nyampéang léq ie pade, make ie pade ndéq bedose. Laguq mangkin ie pade ndéq bedowé alasan malik siq dose ie pade.

²³Dengan saq meriq léq Tiang, ie éndah meriq léq Bapa Tiang.

²⁴Seandéne Tiang ndéq ngelaksaneang karye léq tengaq-tengaq ie pade maraq saq ndéq uwah telaksaneang siq dengan lain, pasti ie pade ndéq bedose. Laguq mangkin timaq ie pade sampun serioq selapuqne nike, tetep doang ie pade meriq léq Tiang dait Bapa Tiang.

²⁵ Laguq manik saq sampun araq tetulis léq dalem Kitab Suci Taurat ie pade harus telaksane, ‘Ie pade ndéq bedowé alasan napi-napi ie meriq léq Tiang.’

²⁶Tiang gen ngutus tipaq side Penulung saq asalne léman Bapa, nike Roh Kebenaran saq dateng léman Bapa. Lamun Roh nike dateng, Ie gen besaksi mengenai Tiang.

²⁷Dait side pade éndah harus besaksi mengenai Tiang, séngaq side pade sampun bareng kance Tiang léman penembéqne.