Read KITAB SUCI ZABUR INJIL YAHYA 16 Bible Online

YAHYA 16 - KITAB SUCI ZABUR INJIL bible

YAHYA 16

¹Selapuqne nike Tiang sampéang léq side pade, adéq side pade ndéq murtat.

²Side pade gen tesugulang léman balé-balé ibadah. Dait gen dateng waktune bahwe dengan saq nyematéq side pade gen paran diriqne ngabdi léq Allah.

³Ie pade laksaneang hal nike léq side, séngaq ie pade ndéqman kenal Bapa dait Tiang.

⁴Laguq mangkin Tiang sampéang hal nike léq side, adéq éraq lamun hal nike telaksane, side pade inget bahwe sampun Tiang sampéang tipaq side pade.” “Hal niki ndéq Tiang sampéang léq side pade léman penembéqne, séngaq Tiang masih araq bareng kance side pade.

⁵Laguq mangkin Tiang gen lalo ojok Ie saq ngutus Tiang; dait ndéq sopoq dengan juaq léq antare side pade saq beketuan ojok mbé lain Tiang.

⁶Malahan mangkin side pade aséq, lantaran Tiang sampéang hal nike léq side pade.

⁷Laguq Tiang sampéang hal saq kenaq léq side pade: Solahan umaq side pade lamun Tiang lalo; séngaq lamun Tiang ndéq lalo, Penulung nike ndéq gen dateng ojok side pade. Laguq lamun Tiang lalo, Tiang gen ngutus Penulung nike ojok side pade.

⁸Lamun Penulung nike dateng, Ie gen nyatayang tipaq dunie mengenai dose, mengenai kebenaran, dait mengenai penghakiman.

⁹Mengenai dose, séngaq ie pade tetep ndéq percaye léq Tiang;

¹⁰mengenai kebenaran, séngaq Tiang lalo ojok Bapa dait side pade ndéq gen serioq Tiang malik;

¹¹mengenai penghakiman, séngaq penguase dunie niki sampun tehukum.

¹²Luwéq malik saq mélé Tiang sampéang tipaq side, laguq mangkin niki side ndéqman sanggup nerimaq hal nike.

¹³Laguq lamun Roh nike dateng, nike Roh kebenaran, Ie gen bimbing side pade jari nenaoq selapuq saq kenaq; séngaq Ie ndéq gen bemanik léman diriq-Ne mésaq, laguq selapuq hal saq Ie pireng, nike saq gen Ie sampéang dait Ie gen beriteang tipaq side hal-hal saq gen dateng.

¹⁴Ie gen mulieang Tiang, séngaq napi saq Ie sampéang tipaq side pade Ie terimaq léman Tiang.

¹⁵Selapuq saq araq léq Bapa nike dowén Tiang. Keranaq nike, Tiang badaq bahwe napi saq tesampéang siq Roh tipaq side pade, Ie terimaq léman Tiang.”

¹⁶“Karing semendaq side pade ndéq gen serioq Tiang malik, dait karing semendaq éndah side pade gen serioq Tiang.”

¹⁷Pire dengan pengiring Deside Isa saling ketuan sopoq kance saq lainne, “Napi maksutne Ie bemanik léq ite: ‘Karing semendaq side pade ndéq gen serioq Tiang, dait karing semendaq éndah side pade gen serioq Tiang’? Napi éndah maksut-Ne bemanik, ‘Tiang gen parek ojok Bapa’?”

¹⁸Ie pade beketuan terus, “Napi artine, ‘semendaq’? Ite ndéq ngerti Ie bebaos mengenai napi!”

¹⁹Deside Isa wikan bahwe ie pade mélé metakén léq Ie, make Ie bemanik, “Baruq Tiang sampéang, ‘Karing semendaq doang side pade ndéq gen serioq Tiang, dait karing semendaq éndah side pade gen serioq Tiang.’ Napi nike saq jari persoalan léq antare side pade?

²⁰Setetune Tiang badaq side, side pade gen nangis dait aséq, laguq dunie gen gembire. Side pade gen susah, laguq kesusahande nike gen berobah jari sukecite.

²¹Lamun sopoq dengan nine gen nganak, ie susah séngaq mule sampun wayene ie menderite. Laguq sesampun anakne sugul, ie lupaq léq penderiteanne lantaran cemohne bahwe sopoq manusie sampun teanakang ojok dalem dunie.

²²Maraq nike éndah side pade: Mangkin side pade susah, laguq Tiang gen bedait malik kance side pade, make angende gen jari sukecite; dait ndéq araq sopoq dengan juaq saq bau bait sukecite nike léman aténde.

²³Léq jelo nike, side pade ndéq gen beketuan napi-napi malik léq Tiang. Tiang badaq side: Setetune napi doang saq side pade tunas léq Bapa kadu aran Tiang, nike gen tekabulang siq Bapa.

²⁴Jangke mangkin niki side pade ndéqman tunas napi-napi kadu aran Tiang. Pade tunas, make side pade gen nerimaq, adéq sukecitende jari sempurne.”

²⁵“Selapuqne niki Tiang sampéang léq side pade kadu perumpamean. Laguq gen dateng waktune, Tiang ndéq gen kadu perumpamean malik, laguq gen nyampéang secare terus-terang léq side pade mengenai Bapa.

²⁶Léq waktu nike side pade gen bedo'e tipaq Bapa kadu aran Tiang. Dait ndéq Tiang badaq side, bahwe Tiang gen tunasang side pade léq Bapa,

²⁷séngaq Bapa mésaq ngasihin side pade. Ie ngasihin side pade lantaran side pade ngasihin Tiang, dait percaye bahwe Tiang dateng léman Allah.

²⁸Mule Tiang asalne léman Bapa, dait sampun dateng ojok dalem dunie. Laguq mangkin Tiang bilin dunie jari tulak ojok Bapa.”

²⁹Beterus pengiring-pengiring Deside Isa matur léq Deside Isa, “Mangkin niki Junjungan Saq Mulie bemanik secare terus-terang, nénten kadu perumpamean,

³⁰dait tiang pade nenaoq bahwe Junjungan Saq Mulie wikan selapuqne. Nénten araq sopoq dengan juaq saq perlu ketuanang napi-napi tipaq Junjungan Saq Mulie. Keranaq nike tiang pade percaye bahwe Pelungguh rauh léman Allah.”

³¹Jawab Deside Isa tipaq ie pade, “Jari, napi side pade percaye mangkin?

³²Inget! Waktune gen dateng, malahan sampun dateng, side pade gen bekelin sopoq kance saq lain. Side pade gen uléq ojok balénde mésaq dait bilin Tiang mésaq-mésaq. Laguq Tiang ndéq mésaq-mésaq séngaq Bapa araq bareng Tiang.

³³Selapuqne niki Tiang sampéang adéq side pade mauq damé sejahtere léq dalem Tiang. Léq dunie niki side pade gen menderite. Laguq teguqang aténde! Tiang sampun ngalahang dunie!”