Read KITAB SUCI ZABUR INJIL YAHYA 17 Bible Online

YAHYA 17 - KITAB SUCI ZABUR INJIL bible

YAHYA 17

¹Sesampun bemanik maraq nike, Deside Isa bedo'e andang langit, “Bapa, mangkin sampun dateng waktune. Mulieang Bije Deside adéq Bije Deside éndah mulieang Deside.

²Deside sampun ngicanin tipaq Bije Deside kuase tipaq selapuq umat manusie, adéq Ie ngicanin idup sejati dait kekel tipaq selapuq dengan saq Deside icanin tipaq Ie.

³Niki idup sejati dait kekel; bahwe dengan kenal kance Deside, jari sopoq-sopoqne Allah saq kenaq, dait kenal kance Deside Isa Almasih saq sampun Deside utus.

⁴Tiang sampun mulieang Deside léq gumi siq care nyeleséang karye saq Deside serahang tipaq Tiang jari Tiang laksaneang.

⁵Keranaq nike, Bapa, mangkin mulieang Tiang bareng-bareng kance Deside siq kemuliean saq sampun jari dowén Tiang dait dowén Deside sendéqman dunie niki tecipteang.

⁶Tiang sampun nyatayang peséngan Deside tipaq dengan-dengan léq dunie saq sampun Deside icanin tipaq Tiang. Ie pade nike jari dowén Deside, dait Deside sampun ngicanin ie pade tipaq Tiang dait ie pade sampun turut manik Deside.

⁷Mangkin ie pade nenaoq bahwe selapuq saq Deside icanin tipaq Tiang asalne léman Deside.

⁸Sampun Tiang sampéang tipaq ie pade manik saq Deside icanin tipaq Tiang; dait ie pade sampun nerimaq manik nike. Ie pade nenaoq bahwe Tiang tetu-tetu dateng léman Deside dait ie pade percaye bahwe Deside saq ngutus Tiang.

⁹Tiang do'eang ie pade. Tiang nénten do'eang dunie laguq jari dengan-dengan saq sampun Deside icanin tipaq Tiang, séngaq ie pade dowén Deside.

¹⁰Selapuq saq jari dowén Tiang, jari dowén Deside éndah. Dait selapuq dowén Deside jari dowén Tiang éndah. Tiang temulieang léq antare ie pade.

¹¹Mangkin Tiang parek ojok Deside. Tiang nénten ndot malik léq dunie; laguq ie pade araq léq dunie. Bapa, saq suci! Jagaq ie pade siq kekuasean peséngan Deside, nike peséngan saq sampun Deside icanin tipaq Tiang -- adéq ie pade jari sopoq, pade maraq Deside kance Tiang éndah sopoq.

¹² Léq waktu Tiang masih bareng kance ie pade, Tiang sampun jagaq ie pade siq kuase peséngan Deside -- peséngan saq Deside icanin tipaq Tiang. Tiang sampun jagaq ie pade, dait nénten araq sopoq juaq léman ie pade saq binase; kecuali ie saq mule sampun tetentuang binase. Adéq siq care nike telaksane napi saq tetulis léq Kitab Suci.

¹³Mangkin Tiang parek ojok Deside. Selapuqne niki Tiang sampéang semasih Tiang araq léq dunie; adéqne penoq sukecite Tiang léq dalem ie pade.

¹⁴Tiang sampun sampéang léq ie pade selapuq manik Deside, dait dunie meriq léq ie pade, séngaq ie pade nénten dowén dunie, pade maraq Tiang éndah nénten dowén dunie.

¹⁵Tiang nénten tunas adéq Deside bait ie pade léman dunie niki, laguq Tiang tunas adéq Deside jagaq ie pade léman saq jahat.

¹⁶Pade maraq Tiang ndéqne léman dunie, ie pade éndah ndéqne léman dunie.

¹⁷Suciang ie pade dalem kebenaran; manik Deside nike kebenaran.

¹⁸Maraq Deside sampun ngutus Tiang ojok dunie, maraq nike éndah Tiang ngutus ie pade ojok dunie;

¹⁹dait Tiang suciang diriq Tiang umaq ie pade, adéq ie pade éndah tesuciang dalem kebenaran.

²⁰Nénten ie pade doang saq Tiang do'eang, laguq Tiang éndah do'eang dengan-dengan saq percaye léq Tiang siq kesaksian ie pade niki;

²¹adéq ie pade selapuq jari sopoq, pade maraq Deside léq dalem Tiang, dait Tiang léq dalem Deside, adéq ie pade éndah léq dalem Ite, adéq dunie percaye, bahwe Deside saq sampun ngutus Tiang.

²²Tiang sampun ngicanin ie pade kemuliean saq Deside icanin léq Tiang, adéq ie pade jari sopoq, pade maraq Ite éndah sopoq;

²³Tiang léq dalem ie pade, dait Deside léq dalem Tiang; adéq ie pade sempurne jari sopoq, adéq dunie nenaoq bahwe Deside saq sampun ngutus Tiang, dait Deside ngasihin ie pade, pade maraq Deside ngasihin Tiang.

²⁴Bapa, Tiang melét adéq léq mbé juaq Tiang araq, ie pade éndah araq bareng kance Tiang, ie pade saq sampun Deside icanin tipaq Tiang, adéq ie pade serioq kemuliean Tiang saq sampun Deside icanin tipaq Tiang, séngaq Deside sampun ngasihin Tiang sendéqman dunie tecipteang.

²⁵Bapa saq adil! Mule dunie nénten kenal kance Deside, laguq Tiang kenal kance Deside; dait ie pade niki nenaoq, bahwe Deside saq sampun ngutus Tiang,

²⁶dait Tiang sampun nyatayang peséngan Deside tipaq ie pade; dait Tiang gen laksaneang hal nike, adéq kasih Deside léq Tiang tetep léq dalem até ie pade dait Tiang léq dalem ie pade.”