Read KITAB SUCI ZABUR INJIL YAHYA 18 Bible Online

YAHYA 18 - KITAB SUCI ZABUR INJIL bible

YAHYA 18

¹Sesampun Deside Isa bedo'e maraq nike, Ie kance pengiring-pengiring-Ne lumbar ojok itoqan Kokoq Kidron. Léq derike araq sopoq taman, dait Deside Isa kance pengiring-pengiring-Ne tame ojok taman nike.

²Taman nike sampun tetaoq siq Yudas saq behianat léq Deside Isa; séngaq Deside Isa kance pengiring-pengiring-Ne rimpes bekumpul léq derike.

³Make Yudas lumbar ojok taoq nike. Jauqne sepasukan tentere Romawi kance pengawal-pengawal Gedéng Allah saq tesuruq siq imam-imam kepale dait dengan-dengan Parisi. Ie pade jauq gegaman, dilah dait obor.

⁴Deside Isa wikan selapuq saq gen telaksane tipaq diriq-Ne. Jari Ie ngerapetin dengan-dengan nike, dait beketuan, “Sai saq side pade boyaq?”

⁵“Deside Isa, dengan Nazaret,” jawab ie pade. “Tiang niki Ie,” jawab Deside Isa. Yudas penghianat nganjeng kance ie pade léq derike.

⁶Sewaktu Deside Isa bemanik léq ie pade, “Tiang niki Ie,” ie pade selapuq surut mudi dait rebaq ojok tanaq.

⁷Deside Isa beketuan malik léq ie pade, “Sai saq side pade boyaq?” “Deside Isa dengan Nazaret,” jawab ie pade.

⁸“Sampun Tiang badaq side, Tiang niki Ie,” manik Deside Isa. “Dait lamun mule Tiang saq side pade boyaq, alurang dengan saq lain nike lumbar.” (

⁹Siq manik-Ne nike, make telaksane napi saq sampun temanikang siq Deside Isa sendéqmanne: “Bapa, léman dengan-dengan saq Bapa icanin tipaq Tiang, nénten sopoq dengan juaq saq binase.”)

¹⁰Simon Petrus saq jauq kléwang, nyerét kléwangne terus ngerantek pelayan Imam Agung jangke pegat kentokne saq kanan. Aran pelayan nike Malkus.

¹¹ Beterus Deside Isa bemanik tipaq Petrus, “Tamaqang malik kléwangde ojok sarungne! Napi side paran Tiang ndéq gen nginem cawan penderitean saq teicanin siq Bapa tipaq Tiang?”

¹²Beterus prajurit-prajurit Romawi bareng komendanne dait pengawal-pengawal Yahudi bau dait sékoq Deside Isa.

¹³Penembéqne ie pade jauq Deside Isa ojok Hanas, mentoaqne Kayapas. Léq waktu nike Kayapas jari Imam Agung.

¹⁴ Kayapas nike saq sampun ngebéng naséhat léq pare penguase Yahudi bahwe solahan sopoq dengan ninggal umaq selapuq bangse.

¹⁵Simon Petrus dait sopoq pengiring saq lain ngiring Deside Isa. Pengiring saq lain niki sampun kenal kance Imam Agung. Keranaq nike, ie tame bareng kance Deside Isa ojok leléah gedéng Imam Agung,

¹⁶laguq Petrus ngantih léq luah, léq jebak. Beterus pengiring saq lain nike sugul, dait ngeraos kance pelayan nine saq jagaq lawang, beterus jauqne Petrus tame ojok dalem.

¹⁷Pelayan nine saq jagaq lawang nike bebase léq Petrus, “Tekan side éndah salaq sopoq pengiring dengan nike?” “Ndéq,” jawab Petrus.

¹⁸Waktu nike kenyeke telih gati, jari pelayan-pelayan kance pengawal-pengawal penyalaq api kadu areng dait ie pade mindu léq derike. Petrus éndah lumbar ojok derike dait milu mindu léq api bareng ie pade.

¹⁹Imam Agung metakén léq Deside Isa mengenai pengiring-pengiring-Ne dait mengenai perajahan-Ne.

²⁰Jawab Deside Isa, “Tiang tetep nyampéang secare terus terang léq julun dengan luwéq. Tiang tetep ngajahang léq balé-balé ibadah dait Gedéng Allah, taoq dengan Yahudi biasene bekumpul. Tiang ndéq uwah nyatayang napi-napi secare nyeboq-nyeboq.

²¹Jari, kembéq pelungguh beketuan léq Tiang? Silaq beketuan léq dengan-dengan saq sampun dengahang pengajahan Tiang. Pasti ie pade nenaoq napi saq Tiang ajahang.”

²²Sewaktu Deside Isa bemanik maraq nike, salaq sopoq pengawal léq derike tempélék Deside Isa dait bebase, “Bani gati Side bebase maraq nike tipaq Imam Agung!”

²³Jawab Deside Isa, “Lamun Tiang ngucapang hal saq salaq, nyatayang léq deriki napi kesalaqanne! Laguq lamun napi saq Tiang ucapang nike kenaq, kembéq side tempélék Tiang?”

²⁴Beterus Hanas suruq dengan jauq Deside Isa saq sampun tesékoq nike ojok Imam Agung Kayapas.

²⁵Simon Petrus masih nganjeng mindu léq derike. Dengan-dengan bebase léq ie, “Tekan side éndah salaq sopoq pengiring-Ne?” Laguq Petrus nilas, “Ndéq!”

²⁶Sopoq pelayan Imam Agung, keluarge léman dengan saq kentokne terantek siq Petrus, bebase, “Tekan onéq tiang serioq side léq taman bareng kance Ie?”

²⁷Beterus Petrus nilas malik, “Ndéq,” -- dait tepat léq waktu nike manuk ngungkung.

²⁸Kelémaq gati ie pade jauq Deside Isa léman gedéng Kayapas ojok istane gubernur. Dengan-dengan Yahudi ndéq tame ojok dalem istane, adéq ie pade ndéq jari najis menurut aturan agame, séngaq ie pade mélé ngelorang keloran Paskah.

²⁹Keranaq nike Pilatus sugul dait beketuan léq ie pade, “Napi tuduhan side pade tipaq dengan niki?”

³⁰Jawab ie pade, “Lamun Ie ndéq salaq, tiang pade ndéq gen jauq Ie ojok pelungguh.”

³¹Beterus basen Pilatus léq ie pade, “Silaq bait dait adilin Ie menurut hukumde mésaq!” Laguq jawab dengan-dengan Yahudi nike, “Tiang pade ndéq kanggo nyematéq dengan.” (

³² Siq care nike, make telaksane napi saq sampun temanikang siq Deside Isa mengenai berembé entane Ie gen ninggal.)

³³Pilatus tame malik ojok dalem istane, dait ngempoh Deside Isa, terus ie metakén, “Napi tetu Pelungguh raje dengan Yahudi?”

³⁴Jawab Deside Isa, “Napi saq pelungguh ketuanang niki mule asalne léman pelungguh mésaq atao araq dengan lain saq badaq pelungguh mengenai Tiang?”

³⁵Jawab Pilatus, “Napi tiang niki dengan Yahudi? Saq nyerahang Pelungguh ojok tiang niki bangse Pelungguh mésaq dait imam-imam kepale. Setetune napi saq Pelungguh sampun piaq?”

³⁶Jawab Deside Isa, “Kerajaan Tiang ndéq léman dunie niki. Seandéne kerajaan Tiang léman dunie niki, pengiring-pengiring Tiang gen bejuang adéq Tiang ndéq teserahang ojok penguase Yahudi. Laguq mule kerajaan Tiang nike ndéq léman dunie niki!”

³⁷Beterus Pilatus metakén léq Deside Isa, “Jari, Pelungguh niki Raje?” Jawab Deside Isa, “Pelungguh bebase bahwe Tiang niki Raje. Tiang tebijeang dait dateng ojok dunie niki siq sopoq maksut, ngebéng kesaksian mengenai kebenaran. Dengan saq asalne léman kebenaran nike ie gen dengahang Tiang.”

³⁸Pilatus metakén malik léq Deside Isa, “Napi artine kebenaran nike?” Sesampun nike Pilatus sugul malik léman istane dait bebase léq dengan-dengan Yahudi, “Tiang ndéq ndait sopoq juaq kesalaqan léq Ie.

³⁹Laguq menurut adat saq biase, tiang harus bébasang sopoq tahenan léq Hari Raye Paskah. Napi side pade mélé lamun tiang bébasang Raje dengan Yahudi nike tipaq side pade?”

⁴⁰Ie pade bejawab nyurak-nyurak, “Sampunang Ie, laguq Barabas!” (Barabas nike tukang rampok.)