Read KITAB SUCI ZABUR INJIL YAHYA 21 Bible Online

YAHYA 21 - KITAB SUCI ZABUR INJIL bible

YAHYA 21

¹Sesampun nike karing sekali Deside Isa nyatayang diriq léq pengiring-pengiring-Ne léq Danao Tiberias. Maraq niki kejarianne:

²Léq sopoq jelo Simon Petrus, Tomas saq tesebut Didimus, Natanael léman Kana léq Galilea, bije-bije Zebedeus, dait due pengiring Deside Isa saq lainne, kenyeke bekumpul.

³ Basen Simon Petrus léq ie pade, “Tiang mélé lalo bau empaq.” “Tiang pade milu,” basen ie pade léq Petrus. Beterus ie pade lumbar taék perau. Laguq sekeleman nike ie pade ndéq bau napi-napi.

⁴Sewaktu tiwoq jelo, Deside Isa ngadeg léq pesisi, laguq ie pade ndéq tandaq bahwe nike Deside Isa.

⁵Deside Isa bemanik léq ie pade, “Kanak-kanak, napi side pade bedowé empaq?” “Nénten,” jawab ie pade.

⁶ Deside Isa bemanik léq ie pade, “Saut jaringde ojok sedi kanan perau, laun side pade gen mauq empaq.” Terus ie pade saut jaringne, laguq ie pade ndéq bau antuq malik lantaran luwéq gati empaq léq dalemne.

⁷Pengiring saq tekasihin siq Deside Isa bebadaq léq Petrus, “Nike Junjungan Saq Mulie!” Sewaktu Simon Petrus dengah bahwe nike Junjungan Saq Mulie, ie kadu kelambine, séngaq ie ndéq kadu kelambi, terus nimproh ojok aiq.

⁸Pengiring-pengiring saq lain dateng kadu perau, séngaq ie pade ndéq jaoq léman darat, cume kire-kire satus méter doang dait ie pade antuq jaringne saq penoq siq empaq nike.

⁹Sewaktu ie pade turun léman perau, ie pade serioq araq barak api areng léq derike dait empaq léq atasne kance ruti.

¹⁰Deside Isa bemanik léq ie pade, “Jauq ojok deriki pire empaq saq baruq side pade bau.”

¹¹Simon Petrus taék ojok perau, terus antuq jaringne ojok darat. Jaring nike penoq siq empaq saq beléq-beléq: Selapuqne araq karobelah telu luwéqne. Dait timaq luwéqne maraq nike, jaringne ndéq soék.

¹²Deside Isa bemanik léq ie pade, “Silaq bekelor.” Ndéq araq sopoq dengan juaq léman pengiring-pengiring-Ne saq bani metakén, “Pelungguh sai?” Séngaq ie pade nenaoq bahwe Ie Junjungan Saq Mulie.

¹³Beterus Deside Isa ngerapetin ie pade dait bait ruti nike dait ngicanin ie pade, maraq nike éndah empaq nike.

¹⁴Niki ketelu kaline Deside Isa nyatayang diriq-Ne léq pengiring-pengiring-Ne sesampun Ie idup malik léman ninggal.

¹⁵Sesampun ie pade bekelor, Deside Isa bemanik léq Simon Petrus, “Simon bije Yahya, napi side lebih ngasihin Tiang lebihan léman ie pade?” “Nggih, Junjungan Saq Mulie,” jawab Petrus, “Pelungguh wikan tiang ngasihin Pelungguh.” Deside Isa bemanik léq ie, “Peliharaq dombe-dombe Tiang!”

¹⁶Saq kedue kaline Deside Isa bemanik léq ie, “Simon bije Yahya, napi side ngasihin Tiang?” “Nggih, Junjungan Saq Mulie,” jawab Petrus, “Pelungguh wikan tiang ngasihin Pelungguh.” Deside Isa bemanik léq ie, “Peliharaq dombe-dombe Tiang.”

¹⁷Saq ketelu kaline Deside Isa bemanik léq ie, “Simon bije Yahya, napi side ngasihin Tiang?” Petrus jari aséq séngaq Deside Isa bemanik léq ie jangke telu kali. Make Petrus bejawab malik, “Junjungan Saq Mulie, Pelungguh wikan selapuq-lapuqne. Pelungguh wikan tiang ngasihin Pelungguh!” Beterus manik Deside Isa léq ie, “Peliharaq dombe-dombe Tiang.

¹⁸Tiang badaq side: Setetune sewaktu side masih bajang, side taliq kéngde mésaq dait lampaq ojok mbé doang side mélé, laguq lamun side sampun toaq, side gen ngulurang imende dait dengan lain gen naliq side dait jauq side ojok taoq saq side ndéq mélé.”

¹⁹(Siq ucapan-ucapan nike, Deside Isa nyatayang berembé Petrus gen ninggal éraq jari mulieang Allah.) Sesampun nike Deside Isa bemanik léq Petrus, “Turut Tiang!”

²⁰ Sewaktu Petrus ngéngat, ie serioq bahwe pengiring saq tekasihin siq Deside Isa milu éndah. (Ie saq tokol dékét Deside Isa sewaktu medaran dait saq metakén léq Deside Isa, “Junjungan Saq Mulie, sai saq gen behianat léq Pelungguh?”)

²¹Sewaktu serioq ie, Petrus metakén léq Deside Isa, “Junjungan Saq Mulie, berembé léq dengan niki?”

²²Jawab Deside Isa, “Seandéne Tiang mélé ie tetep idup jangke Tiang dateng, nike ndéqne urusande. Laguq side, turut Tiang!”

²³Make nyebar kabar léq antare pengiring-pengiring Deside Isa bahwe pengiring nike ndéq gen ninggal. Padahal Deside Isa nénten bemanik bahwe pengiring nike ndéq gen ninggal, laguq: “Seandéne Tiang mélé ie tetep idup jangke Tiang dateng, nike ndéqne urusande.”

²⁴Pengiring nike saq ngebéng kesaksian mengenai peristiwe-peristiwe niki. Ie éndah saq sampun nulis hal niki. Dait ite nenaoq bahwe napi saq tesampéang nike kenaq.

²⁵Masih luwéq hal lain saq telaksaneang siq Deside Isa. Lamun selapuqne nike tetulis sopoq-sopoq, perasaq tiang ndéq araq taoq saq cukup léq seantéro gumi jari noloq selapuq kitab saq tetulis nike.