Read KITAB SUCI ZABUR INJIL YAHYA 7 Bible Online

YAHYA 7 - KITAB SUCI ZABUR INJIL bible

YAHYA 7

¹Sesampun nike Deside Isa bemargi léq selapuq daérah Galilea. Ie nénten kayun ojok daérah Yudea, séngaq dengan-dengan Yahudi léq derike beniat nyematéq Ie.

² Waktu nike sampun rapet Hari Raye Pondok Daun.

³Sanak-sanak Deside Isa matur léq Deside Isa, “Silaq bilin taoq niki, terus lumbar ojok Yudea, adéq pengiring-pengiring Pelungguh bau serioq karye Pelungguh.

⁴Ndéq araq dengan saq gen seboq napi saq ie piaq, lamun ie mélé jari kesohor. Lamun Pelungguh ngelaksaneang hal-hal maraq nike, silaq Pelungguh nyatayang diriq tipaq dunie!” (

⁵Séngaq sanak-sanak-Ne éndah nénten percaye léq Ie.)

⁶Beterus Deside Isa bemanik léq ie pade, “Mangkin ndéqman waktu Tiang, laguq bagi side pade tetep araq waktu.

⁷Dunie niki ndéqne mungkin meriq léq side pade. Laguq Tiang mule temeriq siq dunie, séngaq Tiang tetep ngebéng kesaksian mengenai dunie bahwe perbuatan-perbuatanne jahat.

⁸Silaq side pade lumbar ojok perayaan nike. Tiang ndéq gen lalo, séngaq mule ndéqman waktu Tiang.”

⁹Maraq nike manik Deside Isa léq sanak-sanak-Ne, beterus Ie meneng léq Galilea.

¹⁰Sesampun sanak-sanak-Ne lumbar ojok perayaan nike, meneng-meneng Deside Isa lumbar ndéq tetaoq siq dengan.

¹¹Sengonéq perayaan nike, penguase-penguase Yahudi boyaq Deside Isa dait beketuan-tuan, “Léq mbé Ie?”

¹²Luwéq dengan mulai bepéséq-péséq ngeraosang Deside Isa. Araq saq bebase, “Ie dengan solah.” Araq éndah saq bebase, “Nénten! Ie nyesatang dengan luwéq.”

¹³Laguq ndéq araq sopoq dengan juaq saq bani bebase terang-terangan ngeraosang Ie, séngaq ie pade takut léq dengan-dengan Yahudi.

¹⁴Léq waktu perayaan nike kenyeke telaksaneang, Deside Isa tame ojok Gedéng Allah, terus mulai ngajahang.

¹⁵Dengan-dengan Yahudi bengaq gati, dait bebase, “Berembé dengan niki bedowé penenaoq maraq nike, padahal Ie ndéq uwah berajah?”

¹⁶Deside Isa bemanik, “Saq Tiang ajahang niki, ndéqne perajahan léman Tiang, laguq perajahan léman Ie saq ngutus Tiang.

¹⁷Dengan saq mélé turut pekayunan Allah gen nenaoq napi pengajahan Tiang asalne léman Allah atao léman Tiang mésaq.

¹⁸Dengan saq ngajahang perajahanne mésaq boyaq kehormatan jari diriqne mésaq. Laguq dengan saq boyaq kehormatan jari Ie saq ngutus ie, dengan nike kenaq, ndéq araq kesalaqan léq ie.

¹⁹Tekan Musa sampun nyampéang Hukum Taurat tipaq side. Laguq léq antare side pade ndéq araq saq mélé taat léq Hukum Taurat nike. Kembéq side pade mélé matéq Tiang?”

²⁰Jawab dengan luwéq nike, “Side siq tekuasein siq sétan! Sai saq mélé matéq Side?”

²¹Jawab Deside Isa, “Cume sopoq muqjizat saq Tiang piaq, dait side pade bengaq.

²² Musa ngicanin side pade aturan besunat -- timaq setetune sunat nike asalne ndéqne léman Musa, laguq léman bapaq-bapaq leluhur sendéqman Musa -- dait side pade sunat dengan léq jelo Sabat.

²³ Lamun hal nike side pade laksaneang adéq ndéq teparan ngelanggar aturan Musa mengenai sunat, kembéq side pade gedek léq Tiang lantaran nyelahang selapuq awak sopoq dengan léq jelo Sabat?

²⁴Ndaq hakimin dengan siq napi saq penggitan, laguq pade hakimin secare adil.”

²⁵Beterus pire dengan penduduk kote Yerusalem bebase, “Tekan Ie niki saq teboyaq-boyaq gen tematéq?

²⁶Pade serioq, Ie bébas bebaos léq julun dengan luwéq, dait ndéq araq saq bebase napi-napi léq Ie! Sang penguase-penguasente sampun sadar bahwe Ie niki Almasih?

²⁷Laguq lamun Almasih nike rauh, ndéq araq sopoq dengan juaq saq nenaoq léman mbé asal-Ne. Padahal ite nenaoq léman mbé asal-Ne.”

²⁸Waktu Deside Isa kenyeke ngajahang léq dalem Gedéng Allah, Ie bemanik siq suare saq beléq, “Mule side pade nenaoq sai Tiang niki dait léman mbé asal Tiang. Tiang dateng ndéqne siq keméléq Tiang mésaq. Tiang teutus siq Ie saq kenaq saq ndéq side pade kenal.

²⁹Tiang kenal kance Ie séngaq Tiang asalne léman Ie, dait Ie saq ngutus Tiang.”

³⁰Léq waktu nike ie pade berusahe bau Deside Isa, laguq ndéq araq saq bani negel Ie, séngaq ndéqman waktune.

³¹Luwéq léq antare dengan-dengan nike mulai percaye léq Deside Isa, dait bebase, “Lamun Almasih nike rauh, napi Ie bau ngelaksaneang luwéqan keajaipan ketimbang Dengan niki?”

³²Dengan-dengan Parisi dengah berembé dengan luwéq nike bepéséq-péséq raosang Deside Isa. Keranaq nike bareng-bareng kance imam-imam kepale, ie pade ngutus pire pengawal Gedéng Allah lumbar bau Deside Isa.

³³Deside Isa bemanik, “Cume karing seberaq doang Tiang masih bareng kance side pade. Sesampun nike Tiang gen tulak ojok Ie saq ngutus Tiang.

³⁴Side pade gen boyaq Tiang, laguq ndéq ndait Tiang; séngaq side pade ndéq bau dateng ojok taoq léq mbé Tiang araq.”

³⁵Beterus dengan-dengan Yahudi nike bebase sopoq kance saq lainne, “Dengan niki gen lumbar ojok mbé, sehingge ite ndéq gen bau ndait Ie? Napi Ie gen lumbar ojok dengan-dengan Yahudi saq ndot léq perantoan léq antare dengan Yunani, dait ngajahang dengan Yunani?

³⁶Napi maksut-Ne bebaos bahwe ite gen boyaq Ie laguq ite ndéq bau bedait kance Ie dait ite ndéq bau dateng léq mbé taoq-Ne araq?”

³⁷ Léq jelo penutuq perayaan nike, jelo saq paling penting, Deside Isa ngadeg beterus bemanik siq suare saq beléq, “Dengan saq bedak, harus dateng ojok Tiang dait nginem!

³⁸ Sai-sai saq percaye léq Tiang, maraq tetulis léq dalem Kitab Suci: ‘Léman dalem aténe gen ngélék élékan-élékan aiq idup.’ ” (

³⁹Deside Isa bemanik mengenai Roh Allah, saq gen teterimaq siq dengan-dengan saq percaye léq Ie. Séngaq waktu nike Roh Allah ndéqman teicanin; séngaq Deside Isa ndéqman temulieang.)

⁴⁰Luwéq dengan dengahang napi saq tebaosang siq Deside Isa, dait léq antare ie pade araq saq bebase, “Dengan niki pasti Nabi saq gen rauh!”

⁴¹Saq lain bebase, “Ie niki Almasih!” Laguq araq éndah saq bebase, “Nénten, Almasih nénten rauh léman Galilea!

⁴² Dalem Kitab Suci tetulis bahwe Almasih nike keturunan Daud dait gen rauh léman Betlehem, dése asalne Daud.”

⁴³Ahirne dengan-dengan mulai betungkasan mengenai Deside Isa.

⁴⁴Araq saq mélé bau Ie, laguq ndéq sopoq dengan juaq saq bani negel Ie.

⁴⁵Sewaktu pengawal-pengawal Gedéng Allah saq teutus jari bau Deside Isa tulak malik, imam-imam kepale dait dengan-dengan Parisi beketuan léq ie pade, “Kembéq side ndéq jauq Ie ojok deriki?”

⁴⁶Jawab pengawal-pengawal nike, “Ndéq uwah araq dengan saq bebaos maraq Ie!”

⁴⁷“Napi side pade éndah tesesatang siq Ie?” basen dengan-dengan Parisi nike.

⁴⁸“Napi araq penguase-penguasente atao dengan Parisi saq percaye léq Ie?

⁴⁹Laguq dengan luwéq niki, ie pade ndéq ngerti Hukum Taurat, ie pade sampun tekutuk.”

⁵⁰ Salaq sopoq léq antare dengan Parisi nike, aranne Nikodemus saq sampun parek ojok Deside Isa. Nikodemus bebase tipaq dengan-dengan Parisi saq lain,

⁵¹“Menurut Hukum Taurat, sopoq dengan ndéq kanggo tehukum sendéqman pelekarene tedengah dait perbuatanne teperiksaq.”

⁵²Jawab ie pade, “Napi side éndah léman Galilea? Silaq periksaq Kitab Suci dait side gen nenaoq bahwe ndéq araq nabi saq rauh léman Galilea!” [

⁵³Sesampun nike selapuq dengan uléq ojok baléne.