Read KITAB SUCI ZABUR INJIL YAHYA 8 Bible Online

YAHYA 8 - KITAB SUCI ZABUR INJIL bible

YAHYA 8

¹Laguq Deside Isa lumbar ojok Bukit Zaitun.

²Jemaq kelémaqne Deside Isa lumbar malik ojok Gedéng Allah, dait luwéq dengan parek tipaq Ie. Deside Isa melinggih dait ngajah ie pade.

³Waktu nike ahli-ahli Taurat dait dengan-dengan Parisi parek tipaq Deside Isa jauq sopoq dengan nine saq kendaitan bezinah. Ie pade suruq dengan nine nike nganjeng léq tengaq-tengaq,

⁴beterus matur léq Deside Isa, “Bapaq Guru, dengan nine niki kendaitan kenyeke bezinah.

⁵ Léq dalem Hukum Taurat araq aturan bahwe dengan nine maraq nike harus tepeléwas siq batu jangke maté. Mangkin berembé pendapet Pelungguh?”

⁶Ie pade metakén maraq nike jari boyaq kesalaqan Deside Isa, adéqne bau nyalahang Ie. Laguq Deside Isa nunduk doang dait nulis léq tanaq siq nyari-Ne.

⁷Sewaktu ie pade terus matur, Deside Isa ngangkat sirah-Ne dait bemanik léq ie pade, “Dengan saq ndéq bedowé dose léq antare side pade, alurang ie saq penembéq meléwasang batu tipaq dengan nine nike.”

⁸Sesampun nike Deside Isa nunduk malik dait nulis malik léq tanaq.

⁹Sesampun ie pade dengah manik Deside Isa nike, ie pade lumbar bilin taoq nike, sopoq-sopoq mulai léman saq paling toaq. Ahirne karing Deside Isa kance dengan nine nike doang saq masih tetep nganjeng léq derike.

¹⁰Beterus Deside Isa ngadeg dait bemanik tipaq ie, “Inaq, léq mbé ie pade? Ndéq araq saq mélé hukum side?”

¹¹“Ndéq araq Junjungan Saq Mulie,” jawabne. Terus manik Deside Isa, “Tiang éndah ndéq gen hukum side. Mangkin silaq side lumbar! Ndaq piaq dose malik.”]

¹² Deside Isa bemanik malik léq dengan luwéq, manik-Ne, “Tiang niki terang dunie; sai-sai saq turut Tiang, ie ndéq gen lampaq léq dalem peteng, laguq ie gen bedowé cahaye kehidupan.”

¹³ Dengan-dengan Parisi matur tipaq Deside Isa, “Mangkin Pelungguh icanin kesaksian mengenai diriq Pelungguh mésaq. Kesaksian Pelungguh nike nénten kenaq.”

¹⁴Jawab Deside Isa, “Timaq Tiang nyampéang kesaksian mengenai diriq Tiang, kesaksian Tiang nike kenaq; séngaq Tiang nenaoq léman mbé Tiang dateng, dait ojok mbé lain Tiang. Side pade ndéq nenaoq léman mbé Tiang dateng, dait ojok mbé lain Tiang.

¹⁵Side pade hakimin dengan kadu care manusie; Tiang ndéq hakimin sopoq dengan juaq.

¹⁶Laguq lamun Tiang hakimin dengan, keputusan Tiang nike adil, séngaq Tiang ndéq mésaq-mésaq; Bapa saq ngutus Tiang araq bareng Tiang.

¹⁷Léq dalem Hukum Taurat tetulis maraq niki: Kesaksian saq kenaq nike kesaksian léman due dengan.

¹⁸Saq nyampéang kesaksian mengenai Tiang, araq due -- Tiang, dait Bapa, saq ngutus Tiang.”

¹⁹“Bapa Pelungguh nike léq mbé?” basen ie pade. Jawab Deside Isa, “Side pade ndéq kenal kance Tiang dait Bapa Tiang. Seandéne side pade kenal kance Tiang, pasti side pade kenal kance Bapa Tiang éndah.”

²⁰Selapuq nike temanikang siq Deside Isa sewaktu Ie ngajahang léq Gedéng Allah léq dékét kotaq-kotaq képéng persembahan. Laguq ndéq araq sopoq dengan juaq saq bau Deside Isa, séngaq mule ndéqman waktune.

²¹Deside Isa bemanik malik tipaq ie pade, “Tiang gen lalo, dait side pade gen boyaq Tiang, laguq side pade gen maté dalem dosende. Ojok taoq saq Tiang laiq nike side pade ndéq gen bau dateng.”

²²Beterus dengan-dengan Yahudi nike bebase, “Sang Ie gen matéq diriq, séngaq Ie bemanik, ‘Ojok mbé lain Tiang, side pade ndéq bau dateng.’ ”

²³Beterus Deside Isa bemanik tipaq ie pade, “Side pade dateng léman bawaq; laguq Tiang dateng léman atas. Side pade léman dunie; Tiang ndéq léman dunie.

²⁴Keranaq nike Tiang badaq side pade, bahwe side pade gen maté dalem dose-dosende. Dait mule side pade gen maté dalem dose-dosende, lamun ndéq percaye bahwe ‘Tiang niki Ie’.”

²⁵Ie pade metakén, “Sai Pelungguh setetune?” Jawab Deside Isa, “Napi manpaatne ngeraos malik kance side pade?

²⁶Masih luwéq hal mengenai side pade saq gen Tiang sampéang dait Tiang hakimin. Laguq Ie saq ngutus Tiang bau tepercaye. Dait Tiang nyampéang ojok dunie napi saq Tiang dengah léman Ie.”

²⁷Ie pade ndéq ngerti bahwe Ie kenyeke bebaos léq ie pade mengenai Bapa.

²⁸Keranaq nike Deside Isa bemanik malik tipaq ie pade, “Éraq lamun side pade sampun agungang Bije Manusie, side pade gen nenaoq bahwe ‘Tiang niki Ie’, dait side pade éndah gen nenaoq bahwe ndéq araq sopoq juaq saq Tiang laksaneang léman diriq Tiang mésaq. Tiang cume nyampéang napi saq temanikang siq Bapa léq Tiang.

²⁹Dait Ie saq ngutus Tiang araq bareng Tiang. Ie nénten menengang Tiang mésaq-mésaq, séngaq Tiang tetep ngelaksaneang napi saq nyenengang Ie.”

³⁰Sesampun Deside Isa jelasang hal nike, luwéq dengan percaye léq Ie.

³¹Beterus Deside Isa bemanik léq dengan-dengan Yahudi saq sampun percaye léq Ie, “Lamun side pade tetep idup menurut manik Tiang, side pade tetu-tetu jari pengiring Tiang,

³²make side pade gen nenaoq kebenaran, dait kebenaran nike gen bébasang side pade.”

³³ Ie pade matur léq Deside Isa, “Tiang pade niki keturunan Ibrahim, ndéq uwah tiang jari hambe sai-sai! Napi maksut Pelungguh bemanik, ‘Side pade gen tebébasang’?”

³⁴Manik Deside Isa, “Tiang badaq side: Setetune dengan saq gawéq dose, ie jari hambe dose.

³⁵Dait hambe nike ndéq bedowé taoq saq tetep léq dalem keluarge, laguq bije bedowé taoq selaéq-laéqne léq dalem keluarge.

³⁶Keranaq nike lamun Bije bébasang side pade, make side gen tetu-tetu bébas.

³⁷Mule Tiang nenaoq bahwe side pade keturunan Ibrahim. Laguq side pade mélé nyematéq Tiang, séngaq side pade ndéq mélé nerimaq manik Tiang.

³⁸Napi saq Tiang serioq léq Bapa Tiang, nike saq Tiang sampéang. Laguq side pade miaq napi saq teajahang siq bapaqde léq side pade.”

³⁹Jawab ie pade, “Bapaq tiang pade Ibrahim.” Jawab Deside Isa, “Lamun mule side pade tetu-tetu bije Ibrahim, pasti side pade ngelaksaneang napi saq telaksaneang siq Ibrahim.

⁴⁰Tiang nyampéang léq side pade kebenaran saq Tiang dengah léman Allah, laguq side pade mélé nyematéq Tiang. Pegawéan saq maraq nike ndéqne tegawéq siq Ibrahim!

⁴¹Side pade laksaneang napi saq telaksaneang siq bapaqde mésaq.” Jawab ie pade, “Tiang pade ndéq anak-anak haram. Bapa tiang pade cume sopoq, nike Allah.”

⁴²Beterus manik Deside Isa léq ie pade, “Seandéne Allah nike jari Bapa side pade make side pade pasti gen ngasihin Tiang, séngaq Tiang dateng léman Allah. Tiang ndéq dateng siq keméléq Tiang mésaq, laguq Ie saq ngutus Tiang.

⁴³Kembéq side pade ndéq ngerti napi saq Tiang sampéang? Séngaq side pade ndéq tahen dengahang manik Tiang.

⁴⁴Belis nike saq jari bapaqde, dait side pade mélé turut keméléq bapaqde. Léman penembéqne Belis nike tukang nyematéq. Ie ndéq uwah béle kebenaran, séngaq ndéq araq kebenaran léq dalem diriqne. Lamun ie beduste nike hal saq biase, séngaq mule nike sipatne. Ie mule penduste dait sumber segale macem duste.

⁴⁵Laguq Tiang nyampéang kebenaran, dait nike lantaranne side pade ndéq percaye léq Tiang.

⁴⁶Sai léq antare side selapuq saq bau buktiang bahwe Tiang bedose? Lamun Tiang nyampéang kebenaran, kembéq side ndéq percaye léq Tiang?

⁴⁷Dengan saq asalne léman Allah, dengah Manik Allah. Side ndéq dengah séngaq asalde ndéq léman Allah.”

⁴⁸Jawab dengan-dengan Yahudi nike léq Deside Isa, “Tekan kenaq atur tiang pade bahwe Pelungguh dengan Samaria saq tekuasein siq sétan?”

⁴⁹Jawab Deside Isa, “Tiang ndéq tekuasein siq sétan. Tiang hormatin Bapa Tiang, laguq side pade hine Tiang.

⁵⁰Tiang ndéq boyaq kehormatan jari diriq Tiang mésaq. Araq sopoq saq ngusaheang kehormatan Tiang, dait Ie saq gen hakimin manusie.

⁵¹Setetune kenaq manik Tiang niki, dengan saq turut manik Tiang, ie ndéq gen ngalamin maut selaéq-laéqne.”

⁵²Beterus dengan-dengan Yahudi nike matur léq Deside Isa, “Mangkin tiang pade nenaoq bahwe Pelungguh mule tetu-tetu tekuasein siq sétan! Ibrahim mésaq sampun ninggal, maraq nike éndah selapuq nabi, laguq Pelungguh bemanik bahwe, ‘Selapuq dengan saq turut manik Pelungguh ndéq gen ngalamin maut selaéq-laéqne.’

⁵³Lamun Ibrahim mésaq sampun ninggal, dait nabi-nabi éndah selapuqne sampun ninggal, Pelungguh niki sai? Segerah Pelungguh beléqan léman bapaq tiang pade Ibrahim!”

⁵⁴Jawab Deside Isa, “Lamun Tiang boyaq kehormatan jari diriq Tiang mésaq, kehormatan nike ndéq araq artine. Bapa Tiang saq mulieang Tiang. Side pade bebase bahwe Ie nike Allah side,

⁵⁵padahal side pade ndéq kenal kance Ie, laguq Tiang kenal kance Ie. Dait lamun Tiang badaq bahwe Tiang ndéq kenal kance Ie, make Tiang penduste, pade maraq side pade. Laguq Tiang kenal kance Ie dait Tiang taat léq manik-Ne.

⁵⁶Ibrahim, bapaqde tetu-tetu seneng gati bahwe ie sampun serioq jelo Tiang. Ie sampun serioq, dait ie besukecite!”

⁵⁷Beterus dengan-dengan Yahudi matur léq Deside Isa, “Umur Pelungguh ndéqman araq séket taun, laguq Pelungguh sampun serioq Ibrahim?”

⁵⁸Jawab Deside Isa, “Tiang badaq side, bahwe setetune sendéqman Ibrahim tebijeang, Tiang sampun araq.”

⁵⁹Beterus dengan-dengan Yahudi nike bait batu gen meléwas Ie; laguq Deside Isa nyeboq, beterus Ie lumbar bilin Gedéng Allah.