Read KITAB SUCI ZABUR INJIL KISAH RASUL-RASUL 10 Bible Online

KISAH RASUL-RASUL 10 - KITAB SUCI ZABUR INJIL bible

KISAH RASUL-RASUL 10

¹Léq Kaisarea araq sopoq dengan mame aranne Kornelius. Ie jari prewire “Tentere Italia.”

²Ie dengan saq takut léq Allah dait selapuq kadang jarine beribadah tipaq Allah. Ie luwéq nulung dengan-dengan Yahudi saq miskin, dait ie rajin bedo'e tipaq Allah.

³Léq sopoq jelo kire-kire jam telu kebian, pedas gati ie serioq léq dalem sopoq penyerioqan, sopoq malaékat Allah rauh dait ngemanikang ie, “Kornelius!”

⁴Siq rase takut Kornelius perhatiang malaékat nike terus bebase, “Araq napi Bapaq?” Jawab malaékat nike, “Selapuq do'e dait kemurahan aténde nike sampun teterimaq siq Allah dait Allah iling léq side.

⁵Mangkin suruq dengan lumbar ojok Yope ngempoh Simon saq aran lengkapne Simon Petrus.

⁶Ie kenyeke nyodoq léq balé sopoq tukang kulit aranne Simon, saq ndot léq sedin pesisi.”

⁷Sesampun malaékat saq bemanik léq Kornelius nike lumbar, Kornelius ngempoh due pelayanne dait sopoq pengawal saq soléh.

⁸Kornelius nyeriteang tipaq ie pade napi saq sampun telaksane, terus suruq ie pade lumbar ojok Yope.

⁹Jemaqne, sewaktu ie pade masih léq tengaq langan, dait gen dateng léq Yope, Petrus taék ojok atas balé jari bedo'e.

¹⁰Beterus ie lapah gati dait melét bekelor. Sewaktu keloran kenyeke tesedieang, ie mauq sopoq penyerioqan.

¹¹Ie serioq langit kebukaq, dait selembar lakar saq gamber teulurang ojok gumi, begantung léq empat bucune.

¹²Léq dalemne araq segale macem binatang benaé empat, selapuq binatang saq ngumang dait kedit-kedit saq liah.

¹³Terus araq suare bemanik léq ie, “Petrus, ures! Silaq sembeléh dait kelorang!”

¹⁴Petrus bejawab, “Nénten, Tuhan! Nénten uwah tiang ngelorang napi-napi saq haram atao najis.”

¹⁵Laguq suare nike bemanik malik léq ie, “Napi saq sampun tenyatayang halal siq Allah, ndaq side anggep haram!”

¹⁶Hal nike telaksane terus jangke telu kali, beterus lakar nike kerangkatan ojok sorge.

¹⁷Petrus bingung mikirang napi arti penyerioqanne nike, sewaktu Petrus mikir-mikir, dengan-dengan saq tesuruq siq Kornelius boyaq balé Simon sampun araq léq julu lawang.

¹⁸Terus ie pade ngempoh dengan dait beketuan, “Napi léq deriki araq temué saq madéq, aranne Simon Petrus?”

¹⁹Dait sewaktu Petrus masih doang berusahe nenaoq arti penyerioqanne nike, Roh Allah bemanik léq ie, “Hai Petrus, araq telu dengan kenyeke boyaq side.

²⁰Silaq aruan turun ojok bawaq, dait ndaq ragu-ragu milu bareng ie pade, séngaq Tiang saq ngutus ie pade.”

²¹Beterus Petrus turun ojok bawaq, dait bebase léq dengan-dengan nike, “Tiang niki saq side pade péte, araq keperluan napi side pade dateng?”

²²Jawab ie pade, “Prewire Kornelius ngutus tiang pade ojok deriki. Ie dengan saq soléh dait takut léq Allah, dait tehormatin siq selapuq dengan Yahudi. Langan sopoq malaékat, Allah manikang ie pesilaq pelungguh rauh ojok gedéngne, adéq ie dengahang napi saq gen pelungguh sampéang léq ie.”

²³Make Petrus suruq ie pade tame adéqne madéq léq derike. Jemaqne Petrus ures, dait lumbar bareng kance ie pade. Pire dengan semeton seiman léman Yope éndah milu.

²⁴Sejelo sesampun nike ie pade dateng léq Kaisarea. Léq derike ie pade sampun teantih siq Kornelius kance kadang jarine dait selapuq sahabat-sahabat karibne saq sampun tepesilaq.

²⁵Waktu Petrus dateng, Kornelius lumbar nyambut ie dait sujut léq julu Petrus.

²⁶Laguq Petrus penganjeng ie, beterus bebase, “Silaq side ures, tiang éndah manusie biase.”

²⁷Sambil ie bebaos kance Kornelius, Petrus tame ojok dalem balé. Léq derike ie serioq luwéq dengan sampun bekumpul.

²⁸Terus ie bebase léq ie pade, “Side pade nenaoq bahwe dengan Yahudi tebalaq siq Hukum Taurat dateng bejangoq atao berubungan kance dengan bangse-bangse lain. Laguq Allah sampun nyatayang léq tiang bahwe tiang ndéq kanggo nganggep sai juaq najis atao haram.

²⁹Keranaq nike waktu pelungguh pesilaq tiang dateng, tiang ndéq keberatan dateng. Jari, mangkin niki tiang melét nenaoq, kembéq pelungguh pesilaq tiang dateng.”

³⁰Jawab Kornelius, “Empat jelo saq liwat, kire-kire léq waktu maraq niki, tiang kenyeke bedo'e léq balé jam telu kebian. Selung-selung sopoq dengan mame nganjeng léq julun tiang. Kelambi dengan nike putéq ngempor.

³¹Ie bemanik, ‘Kornelius, Allah sampun nerimaq do'ende dait iling léq kemurahan aténde.

³²Jari mangkin utus dengan lumbar ojok Yope ngempoh dengan aranne Simon Petrus, ie kenyeke madéq léq balé sopoq tukang kulit aranne Simon; baléne léq sedin pesisi.’

³³Keranaq nike tiang aruan ngutus dengan lumbar pesilaq pelungguh. Dait pelungguh ihlas rauh ojok deriki. Mangkin tiang pade selapuq bekumpul léq deriki léq arepan Allah jari dengahang selapuq saq Allah manikang léq pelungguh umaq tiang pade.”

³⁴ Terus Petrus bebase, “Mangkin tiang tetu-tetu sadar bahwe Allah nénten béde-bédeang dengan.

³⁵Dengan saq takut léq Allah dait ngelaksaneang saq kenaq, dengan nike teterimaq siq Allah, ndéq peduli ie léman bangse napi.

³⁶Side pade sampun nenaoq isi berite saq Allah sampéang tipaq bangse Israel. Nike Kabar Solah dait damé sejahtere langan Deside Isa Almasih, Junjungan Saq Mulie tipaq selapuq dengan.

³⁷Side pade nenaoq napi saq sampun telaksane léq selapuq wilayah Yudea, mulai léman Galilea, sesampun baptisan saq teanjurang siq Yahya.

³⁸Side pade nenaoq bahwe Allah sampun nyuciang dait ngesahang Deside Isa dengan Nazaret nike siq Roh Suci dait kuase. Side pade nenaoq éndah bahwe Deside Isa nike lumbar ojok mbé-mbé jari ngelaksaneang saq solah; Ie nyelahang selapuq dengan saq tekuasein siq Belis, séngaq Allah araq bareng Ie.

³⁹Tiang pade niki saksi-saksi saq sampun serioq mésaq selapuq hal saq Ie laksaneang léq wilayah Yudea dait léq Yerusalem. Timaq maraq nike ie pade pakuq léq kayuq salib dait nyematéq Ie.

⁴⁰Laguq léq jelo saq ketelu Allah ngidupang Ie malik léman ninggal dait nyatayang Ie tipaq manusie;

⁴¹ndéqne tipaq selapuq dengan, laguq cume tipaq tiang pade saq sampun juluan tepiléq siq Allah jari saksi-saksi-Ne: Tiang pade bekelor dait nginem kance Ie sesampun Ie idup malik léman ninggal.

⁴²Dait Ie ngutus tiang pade beriteang Kabar Solah tipaq dengan-dengan dait ngebéng kesaksian bahwe Ie saq teangkat siq Allah jari Hakim dengan-dengan saq masih idup dait dengan-dengan saq sampun ninggal.

⁴³Mengenai Ie selapuq nabi ngebéng kesaksian, bahwe sai-sai percaye léq Ie, ie gen teampunin dosene langan peséngan-Ne.”

⁴⁴Sewaktu Petrus masih bebaos, Roh Suci turun nguasein selapuq dengan saq dengah berite nike.

⁴⁵Dengan-dengan Yahudi saq percaye léq Deside Isa dait turut Petrus léman Yope, selapuqne bengaq serioq Allah ngicanin éndah Roh Suci tipaq dengan bangse-bangse lain.

⁴⁶Séngaq ie pade dengah dengan-dengan nike ngeraos kadu macem-macem base dait mulieang Allah. Terus Petrus bebase,

⁴⁷“Silaq serioq, dengan-dengan niki sampun nerimaq Roh Suci pade maraq ite. Napi bau dengan halang-halangin ie pade tebaptis siq aiq?”

⁴⁸Make Petrus suruq ie pade tebaptis siq peséngan Deside Isa Almasih. Sesampun nike ie pade tunas adéq Petrus ndot kance ie pade pire jelo ngonéqne.