Read KITAB SUCI ZABUR INJIL KISAH RASUL-RASUL 11 Bible Online

KISAH RASUL-RASUL 11 - KITAB SUCI ZABUR INJIL bible

KISAH RASUL-RASUL 11

¹Rasul-rasul dait dengan-dengan saq percaye léq selapuq wilayah Yudea pirengang bahwe dengan bangse-bangse lain éndah sampun nerimaq Manik Allah.

²Beterus sewaktu Petrus lumbar ojok Yerusalem, dengan-dengan Yahudi saq sampun percaye nike, ngewade Petrus.

³Ie pade bebase, “Kembéq side lumbar ojok balé dengan-dengan saq ndéqman besunat? Malahan side éndah bekelor bareng kance ie pade!”

⁴Keranaq nike Petrus jelasang léq ie pade selapuq saq telaksane léman penembéqne. Petrus bebase,

⁵“Tiang kenyeke bedo'e léq kote Yope, beterus tiang serioq sopoq penyerioqan. Tiang serioq araq selembar lakar saq gamber teturunang léman langit, begantung léq keempat bucune, beterus ndot léq sedin tiang.

⁶Sewaktu tiang perhatiang léq dalemne, tiang serioq binatang-binatang benaé empat, binatang-binatang gamang, binatang saq ngumang dait kedit-kedit liah.

⁷Beterus tiang dengah suare saq bemanik tipaq tiang, ‘Silaq ures Petrus! Sembeléh nike dait kelorang!’

⁸Laguq tiang bejawab, ‘Nénten Tuhan! Tiang nénten uwah ngelorang saq najis atao haram!’

⁹Laguq suare nike bemanik malik léman langit, ‘Barang saq sampun tenyatayang halal siq Allah ndéq kanggo teparan haram.’

¹⁰Tiang serioq hal nike jangke telu kali, terus selapuqne kerangkatan malik ojok sorge.

¹¹Tepat waktu nike éndah telu dengan léman Kaisarea, saq teutus ojok tiang dateng léq balé taoq tiang madéq.

¹²Beterus Roh Allah manikang tiang ndaq ragu-ragu lumbar bareng ie pade. Semeton saq enem dengan niki éndah milu bareng tiang ojok Kaisarea, dait tiang pade selapuq tame ojok dalem baléne Kornelius.

¹³Beterus Kornelius nyeriteang léq tiang pade berembé ie serioq sopoq malaékat nganjeng léq baléne dait bemanik, ‘Suruq dengan lumbar ojok Yope ngempoh sopoq dengan mame aranne Simon Petrus.

¹⁴Ie gen nyampéang tipaq side berite saq gen nyelametang side dait selapuq dengan saq araq léq balénde.’

¹⁵Beterus Petrus bebase malik,” dait léq waktu tiang mulai ngeraos, “Roh Suci turun ojok atas ie pade, pade maraq saq telaksane léq ite laéq waktu penembéqne.

¹⁶ Beterus tiang inget, Junjungan Saq Mulie sampun bemanik, ‘Yahya baptis dengan kadu aiq, laguq side pade gen tebaptis kadu Roh Suci.’

¹⁷Jari, lamun Allah éndah ngicanin ie pade paice pade maraq saq Ie icanin tipaq ite sewaktu ite baruq percaye léq Junjungan Saq Mulie Deside Isa Almasih. Segerah tiang bau segah Allah!”

¹⁸Sesampun pirengang hal nike, ie pade ndéq ngeraos malik. Beterus ie pade memuji Allah. Basen ie pade, “Lamun maraq nike dengan bangse-bangse lain éndah teicanin kesempatan siq Allah jari betobat dait nerimaq idup kekel.”

¹⁹ Sesampun Stepanus tematéq, dengan-dengan saq percaye léq Deside Isa mulai teaniaye, sehingge ie pade bepencar-pencar ojok mbé-mbé. Araq saq pelai jangke dateng Penisia, dait araq éndah saq jangke dateng Siprus dait Antiokia. Laguq ie pade beriteang Kabar Solah tipaq dengan-dengan Yahudi doang.

²⁰Laguq léq antare ie pade, saq asalne léman Siprus dait Kirene, araq éndah saq lumbar ojok Antiokia. Ie pade beriteang Kabar Solah mengenai Deside Isa, Junjungan Saq Mulie, tipaq dengan-dengan Yunani.

²¹Kuase Junjungan Saq Mulie araq léq ie pade sehingge luwéq dengan jari percaye dait nyerahang diriqne tipaq Junjungan Saq Mulie.

²²Cerite-cerite mengenai peristiwe-peristiwe niki tedengah éndah jangke ojok jemaah léq Yerusalem. Make ie pade ngutus Barnabas ojok Antiokia.

²³Dait sewaktu Barnabas dateng léq derike, dait serioq rahmat Allah tipaq dengan-dengan nike, ie gembire gati. Beterus ie tunas adéq ie pade pacu-pacu setie léq Junjungan Saq Mulie siq sepenoq angenne.

²⁴Barnabas niki dengan saq solah dait tekuasein siq Roh Suci dait kuat imanne. Dait luwéq dengan dateng tipaq Junjungan Saq Mulie.

²⁵Beterus Barnabas lumbar ojok Tarsus boyaq Saulus.

²⁶Sesampun bedait kance Saulus, ie jauq Saulus ojok Antiokia dait setaun penoq ie pade bekumpul kance jemaah léq derike sambil ngajahang luwéq dengan. Léq Antiokia nike dengan-dengan saq percaye léq Deside Isa penembéqne tesebut dengan-dengan Nasrani.

²⁷Léq mase nike araq pire nabi rauh léman Yerusalem ojok Antiokia.

²⁸ Léq antarene araq sopoq dengan aranne Agabus. Siq pimpinan Roh Allah ie benubuat bahwe léq seantéro dunie gen araq bahle kelapahan saq beléq. (Dait hal nike mule telaksane éndah léq waktu Kaisar Klaudius mréntah.)

²⁹Make selapuq pengiring Deside Isa nike sepakat jari ngirim sumbangan tipaq semeton-semeton saq ndot léq Yudea; sopoq-sopoq ngirim menurut kemampuanne.

³⁰Kesepakatan nike telaksaneang éndah, beterus Barnabas dait Saulus teutus jari ngatongang sumbangan nike ojok pemimpin-pemimpin jemaah.