Read KITAB SUCI ZABUR INJIL KISAH RASUL-RASUL 12 Bible Online

KISAH RASUL-RASUL 12 - KITAB SUCI ZABUR INJIL bible

KISAH RASUL-RASUL 12

¹Léq waktu nike Raje Herodes mulai keras léq anggote-anggote jemaah.

²Siq préntahne, Yakub, semetonne Yahya tematéq kadu kléwang.

³Sewaktu Herodes serioq bahwe perbuatanne nike nyenengang angen dengan-dengan Yahudi, ie piaq malik maraq nike; ie suruq dengan bau Petrus éndah. Hal nike telaksane waktu Hari Raye Ruti Ndéq Beragi.

⁴ Sesampun tebau, Petrus tetamaq ojok dalem bui. Empat regu tentere tetugasang jari jagaq Petrus léq derike -- sopoq-sopoq regu berisi empat tentere. Sesampun perayaan Paskah inggas, baruq Herodes gen ngadilin Petrus léq julun dengan luwéq.

⁵Jari Petrus tetahen léq bui; laguq jemaah do'eang ie pacu-pacu tipaq Allah.

⁶Léq kelem sendéqman Herodes jauq Petrus léq julun dengan luwéq, Petrus mesaré tetaliq kadu due ranté besi léq antare due tentere pengawal. Léq lawang bui, pengawal-pengawal lain éndah kenyeke jagaq bui.

⁷Selung-selung malaékat Tuhan nganjeng léq derike dait araq sopoq cahaye saq besinar léq dalem kamar bui nike. Malaékat nike dodoq Petrus jangke ie ngase. Beterus manik malaékat nike, “Hai, becat ures!” Waktu nike éndah ranté besi nike teriq léman ime Petrus.

⁸Sesampun nike malaékat nike bemanik, “Kadu kelambinde dait taliq sepatunde.” Make Petrus ngengadu kelambine dait naliq sepatune. Beterus malaékat nike bemanik malik, “Kadu jubahde, dait turut tiang.”

⁹Make Petrus milu bareng malaékat nike sugul léman bui. Laguq Petrus ndéq sadar bahwe napi saq kenyeke telaksaneang siq malaékat nike siq malaékat nike tetu-tetu telaksane. Petrus paran nike cume sopoq penyerioqan.

¹⁰Sesampun ie pade liwatin taoq penjagaan saq penembéq dait saq kedue, ie pade dateng léq lawang besi, saq nuju ojok kote. Lawang nike kebukaq mésaq, terus ie pade sugul dait lampaq langan sopoq pengorong. Selung-selung malaékat nike bilin Petrus.

¹¹Sesampun nike Petrus baruq sadar léq napi saq sampun telaksane léq diriqne, terus ie bebase, “Mangkin tiang nenaoq bahwe Tuhan tetu-tetu sampun ngirim malaékat-Ne jari bébasang tiang léman kuase Herodes, dait léman selapuq hal saq gen telaksaneang siq bangse Yahudi tipaq tiang.”

¹²Sesampun ie sadar léq keadaan nike, Petrus lumbar ojok balé Mariam, inaqne Yahya saq tesebut éndah Markus. Léq derike luwéq dengan bekumpul dait kenyeke bedo'e.

¹³Petrus ngetok lawang jebak, terus sopoq dengan pelayan nine aranne Rode, dateng jari bukaq jebak.

¹⁴Langsung ie tandaq suare Petrus. Lantaran cemohne, ie becat-becat tame malik ndéqne bukaqang lawang juluq, terus badaqang léq dengan-dengan léq derike bahwe Petrus araq léq luah.

¹⁵“Side jogang!” basen ie pade. Laguq Rode pagah bebadaq bahwe nike tetu-tetu Petrus. Make ie pade bebase, “Nike malaékatne!”

¹⁶Laguq Petrus terus doang ngetok lawang. Make sewaktu ie pade bukaq lawang, dait serioqne Petrus, ie pade bengaq gati.

¹⁷Petrus ngebéng tande kadu imene adéq ie pade tenang, beterus ie nyeriteang berembé Tuhan sampun gadingang ie sugul léman bui. Sesampun nike ie bebase, “Sampéang hal niki tipaq Yakub dait semeton-semeton saq lain éndah.” Beterus Petrus bilin taoq nike dait lumbar ojok taoq saq lain.

¹⁸Jemaq kelémaqne araq keributan léq antare tentere pengawal. Ie pade bingung gati mikirang napi saq sampun telaksane tipaq Petrus.

¹⁹Terus Herodes mréntahang dengan boyaq Petrus, laguq ie pade ndéq iniq ndait ie. Jari Herodes mréntahang adéq pengawal-pengawal nike teketuan terus tematéq. Sesampun nike Herodes lumbar léman Yudea ojok Kaisarea dait ndot léq derike.

²⁰Herodes menggah gati léq dengan-dengan Tirus dait Sidon. Keranaq nike ie pade bareng-bareng ngadep Herodes. Mule-mule ie pade kédéq Blastus, saq jari kepale istane Herodes, sehingge ie bepihak léq ie pade. Sesampun nike ie lumbar ngadep Herodes, terus tunas bedamé, séngaq negeri ie pade beharep sepenoqne léq keloran léman negeri Herodes.

²¹Léq sopoq jelo saq sampun tetentuang, Herodes kadu kuace kerajaanne, terus melinggih léq kursi kerajaan dait mulai pidato léq julu rakyat.

²²Rakyat saq kenyeke dengahang pidato nike bekuih-kuih, “Niki suare Déwe, ndéqne suare manusie!”

²³Léq waktu nike éndah malaékat Tuhan tamper Herodes, séngaq ie ndéq hormatin Allah. Herodes tekaken siq longe, terus ninggal.

²⁴Make Manik Allah sayan nyebar dait sayan luwéq tedengah siq dengan.

²⁵Sesampun Barnabas dait Saulus nutuqang tugasne, ie pade tulak léman Yerusalem dait jauqne Yahya saq tesebut éndah Markus, bareng kance ie pade.