Read KITAB SUCI ZABUR INJIL KISAH RASUL-RASUL 13 Bible Online

KISAH RASUL-RASUL 13 - KITAB SUCI ZABUR INJIL bible

KISAH RASUL-RASUL 13

¹Léq dalem jemaah léq Antiokia araq nabi-nabi dait guru-guru, aranne Barnabas, Simeon saq tejulukin Niger, Lukius léman Kirene, Menahem saq tebeléqang bareng kance Raje Herodes, dait Saulus.

²Sewaktu ie pade beribadah tipaq Tuhan dait puase, Roh Suci bemanik léq ie pade, “Piléq Barnabas dait Saulus husus umaq Tiang, adéq ie pade ngelaksaneang tugas saq sampun Tiang tentuang tipaq ie pade.”

³Sesampun puase dait bedo'e, ie pade noloq imene léq atas Barnabas dait Saulus, terus ngutus ie pade.

⁴Lantaran teutus siq Roh Suci, Barnabas dait Saulus berangkat ojok Seleukia. Léman derike ie pade belayar ojok pulao Siprus.

⁵Sewaktu ie pade dateng léq Salamis, ie pade nyampéang Manik Allah léq balé-balé ibadah Yahudi. Yahya Markus tulung ie pade dalem kelampanne.

⁶Selapuq pulao nike ie pade jelajahin jangke dateng Papos. Léq derike ie pade bedait kance sopoq dengan Yahudi, aranne Baryesus. Ie tukang séhér saq ngaku diriqne nabi.

⁷Sergius Paulus, gubernur pulao nike batur tukang séhér nike. Gubernur nike dengan saq pinter dait bijaksane. Ie ngempoh Barnabas dait Saulus, séngaq ie melét pirengang Manik Allah.

⁸Laguq Barnabas dait Saulus tetentang siq Elimas tukang séhér nike, séngaq Elimas (nike aranne dalem base Yunani) berusahe adéq gubernur nike ndaq jangke percaye léq Deside Isa.

⁹Laguq Saulus -- saq tesebut éndah Paulus -- tekuasein siq Roh Suci, sehingge ie peler ahli séhér nike,

¹⁰terus bebase, “Hai, penipu beléq, anak durhake! Side musuh selapuq saq kenaq. Kembéq side pengéngoh Langan saq tepetitoqang siq Junjungan Saq Mulie nike?

¹¹Mangkin serioq, Tuhan gen ngukum side! Pire jelo ngonéqne side ndéq gen bau serioq jelo.” Waktu nike éndah Elimas beridap araq awun-awun saq bideng nutup penentengne, sehingge ie lampaq beganggam-ganggam boyaq dengan jari déndén ie.

¹²Sewaktu Gubernur nike cingakin napi saq sampun telaksane, ie percaye léq Deside Isa; séngaq ie takjub gati léq ajahan mengenai Tuhan.

¹³Léman Papos, Paulus dait batur-baturne belayar ojok Perga léq Pampilia. Léq derike Yahya Markus bilin ie pade, beterus tulak ojok Yerusalem.

¹⁴Léman Perga ie pade ngelanjutang kelampan ojok Antiokia léq Pisidia, dait léq jelo Sabat ie pade lumbar terus melinggih léq dalem balé ibadah.

¹⁵Sesampun Hukum Taurat dait kitab nabi-nabi tebaceang, pemimpin-pemimpin balé ibadah nike suruq dengan beketuan léq Paulus dait batur-baturne, “Semeton-semeton, lamun side pade bedowé naséhat tipaq dengan-dengan niki, silaq sampéang naséhat nike.”

¹⁶Paulus nganjeng, terus ngebéng tande kadu imene, dait bebase, “Semeton-semeton tiang dengan-dengan Israel dait semeton-semeton saq takut léq Allah! Silaq dengahang tiang:

¹⁷ Allah bangse Israel sampun miléq leluhurte, dait jariang bangse niki bangse saq beléq sewaktu ie pade ndot léq Mesir jari pendateng. Beterus siq kuase saq beléq Allah gadingang ie pade sugul léman Mesir.

¹⁸ Allah sabar léq tingkah laku ie pade léq padang gurun petang dase taun ngonéqne.

¹⁹ Pituq bangse Ie musnahang léq negeri Kanaan jari bagi-bagiang negeri nike tipaq bangse Israel adéq negeri nike jari dowén ie pade.

²⁰ Selapuqne nike telaksane empat ratus séket taun ngonéqne. Sesampun negeri Kanaan nike tebagi-bagi, Allah ngicanin ie pade hakim-hakim jangke jaman Nabi Samuel.

²¹ Beterus ie pade tunas sopoq raje. Allah ngicanin ie pade Saul bije Kis léman suku bangse Benyamin jari raje ie pade petang dase taun ngonéqne.

²² Sesampun Saul tesingkirang, Allah ngangkat Daud jari raje ie pade. Dait niki saq temanikang Allah mengenai Daud, ‘Sampun tiang ndait Daud bije Isai dengan saq nyenengang angen Tiang. Ie saq gen ngelaksaneang selapuq pekayunan Tiang.’

²³Léman keturunan Daud nike Allah nyedieang tipaq bangse Israel sopoq Juruselamet, sesuai kance janji-Ne. Nike Deside Isa.

²⁴ Sendéqman Deside Isa rauh, Yahya sampun nganjurang tipaq dengan-dengan Israel adéq ie pade betobat léman dose-dose ie pade dait tebaptis.

²⁵ Dait léq waktu Yahya gen nutuqang karyene, ie bebase tipaq dengan-dengan nike, ‘Sai tiang niki menurut side pade? Tiang ndéqne Dengan saq side pade antih. Inget, Dengan nike gen rauh sesampun tiang; jari ngelekaq tali sepatu-Ne doang tiang ndéq patut.’

²⁶Semeton-semeton keturunan Ibrahim, dait side pade selapuq saq lainne léq deriki saq takut léq Allah! Allah sampun ngirim tipaq ite berite keselametan nike;

²⁷séngaq dengan-dengan saq ndot léq Yerusalem dait pemimpin-pemimpin ie pade ndéq kenal sai Deside Isa nike. Siq mutusang hukuman maté tipaq Deside Isa, ie pade genepang ucapan nabi-nabi saq tebaceang sebilang jelo Sabat.

²⁸ Timaq ie pade ndéq ndait sopoq hal léq Deside Isa saq patut tehukum siq hukuman maté, laguq ie pade tunas léq Pilatus adéq Ie tematéq.

²⁹ Dait sesampun ie pade tutuq ngelaksaneang selapuqne saq araq tetulis dalem Kitab Suci mengenai Deside Isa, ie pade turunang jenazah-Ne léman kayuq salib, terus ie pade makamang.

³⁰Laguq Allah ngidupang Ie malik léman ninggal.

³¹ Beterus sengonéq pire jelo Deside Isa rauh nyatayang diriq tipaq dengan-dengan saq ngiring Ie léman Galilea ojok Yerusalem. Mangkin niki ie pade nike saq jari saksi-saksi-Ne tipaq bangse Israel.

³²Jari, mangkin niki tiang pade nyampéang Kabar Solah nike tipaq side: Napi saq Allah sampun janjiqang tipaq leluhurte,

³³ nike sampun Ie laksaneang tipaq ite siq care ngidupang Deside Isa malik léman ninggal. Séngaq léq dalem Kitab Suci Zabur saq kedue araq tetulis, ‘Deside Bije saq asalne léman Tiang, léq jelo niki Tiang angkat Deside jari Bije Tiang.’

³⁴ Allah sampun ngidupang Ie malik léman ninggal. Mangkin Ie ndéq gen ngalamin ninggal malik léq dalem makam. Mengenai hal nike Allah bemanik, ‘Tiang gen ngicanin Deside janji suci saq pasti gen tetepatin, saq sampun Tiang janjiqang léq Daud.’

³⁵ Keranaq nike léq Kitab Suci Zabur léq ayat saq lain tetulis, ‘Deside nénten gen menengang Dengan Suci Deside cingakin kebinasean.’

³⁶Daud sampun ninggal dait temakamang éndah bareng-bareng kance leluhurne, dait ie mule teserahang tipaq kebinasean.

³⁷Laguq Deside Isa, saq teidupang siq Allah léman ninggal, nénten ngalamin kebinasean.

³⁸Keranaq nike semeton-semeton, harus side pade nenaoq bahwe langan Deside Isa nike berite mengenai pengampunan dose teberiteang tipaq side; side pade harus nenaoq bahwe sebilang dengan saq percaye léq Ie, tebébasang léman selapuq dose saq ndéq bau teapus langan préntah-préntah Allah saq tesampéang siq Musa.

³⁹

⁴⁰Keranaq nike side pade harus perhatiang bagus-bagus, adéq ndaq jangke telaksane léq side pade napi saq tesampéang siq nabi-nabi niki.

⁴¹ ‘Perhatiang bagus-bagus, hai side dengan-dengan saq girang menghine! Side gen bengaq, terus ninggal! Séngaq léq jaman niki Tiang kenyeke ngelaksaneang sopoq hal saq side mésaq ndéq gen percaye ie, timaq araq dengan saq jelasang tipaq side.’ ”

⁴²Waktu Paulus dait Barnabas bilin balé ibadah nike, dengan-dengan léq balé ibadah nike tunas ie pade tulak malik léq jelo Sabat saq gen dateng, jari ngelanjutang penjelasan mengenai hal-hal nike.

⁴³Sesampun inggas ibadah, luwéq dengan Yahudi dait dengan bangse-bangse lain saq tame agame Yahudi, turut Paulus dait Barnabas; kedue rasul nike ngajah ie pade dait béng naséhat adéq ie pade tetep idup léq dalem rahmat Allah.

⁴⁴Léq jelo Sabat selanjutne, aroh-aroh selapuq dengan léq kote nike dateng dengahang Manik Allah.

⁴⁵Waktu dengan-dengan Yahudi serioq dengan luwéq nike, ie pade talon até gati. Ie pade menghine Paulus dait nentang selapuq saq ie sampéang.

⁴⁶Laguq Paulus dait Barnabas sayan bani doang bebaos terus terang. Ie pade bebase, “Manik Allah mule harus tesampéang tipaq side pade juluq. Laguq lantaran side pade ndéq mélé nerimaq ie, side pade sampun nentuang mésaq bahwe side pade ndéq patut nerimaq idup sejati dait kekel. Dait mangkin tiang pade bilin side pade dait lalo tipaq dengan bangse-bangse lain.

⁴⁷ Séngaq niki préntah Tuhan léq tiang pade; Tuhan bemanik, ‘Tiang sampun nentuang side jari terang tipaq bangse-bangse saq ndéq kenal kance Allah, adéq side datengang keselametan tipaq seantéro dunie.’ ”

⁴⁸Sewaktu dengan bangse-bangse lain dengah hal nike, ie pade seneng gati, terus mulieang Manik Tuhan. Dait dengan-dengan saq sampun tetentuang siq Allah jari mauq idup sejati dait kekel éndah jari percaye.

⁴⁹Manik Tuhan nike nyebar ojok mbé-mbé léq selapuq daérah nike.

⁵⁰Laguq pembeléq-pembeléq kote nike dait dengan-dengan nine saq tehormatin, saq takut léq Allah, tehasut siq dengan-dengan Yahudi. Ie pade nimbulang permusuhan tipaq Paulus dait Barnabas, dait deduaqne tetundung léman daérah nike.

⁵¹ Beterus, rasul-rasul nike kerapang kerepuk léq naén ie pade léq julun dengan-dengan nike jari peringetan, terus lumbar ojok Ikonium.

⁵²Pengiring-pengiring léq Antiokia gembire gati dait tekuasein siq Roh Suci.