Read KITAB SUCI ZABUR INJIL KISAH RASUL-RASUL 14 Bible Online

KISAH RASUL-RASUL 14 - KITAB SUCI ZABUR INJIL bible

KISAH RASUL-RASUL 14

¹Léq Ikonium Paulus dait Barnabas éndah lumbar ojok balé ibadah Yahudi, dait ngajahang sehingge luwéq dengan Yahudi dait dengan bangse-bangse lain jari percaye léq Deside Isa.

²Laguq dengan-dengan Yahudi saq ndéq mélé percaye, hasut dengan bangse-bangse lain, sehingge miaq ie pade gedek léq dengan-dengan saq percaye tipaq Deside Isa.

³Keranaq nike Paulus dait Barnabas ngonéq ndot léq derike. Dait ie pade bani gati bebaos mengenai Tuhan. Make Tuhan éndah neguqang berite saq ie pade sampéang mengenai rahmat-Ne, Ie ngicanin ie pade kuase jari ngelaksaneang keajaipan-keajaipan dait hal-hal saq luar biase.

⁴Laguq penduduk kote nike ndéq patuh sopoq kance saq lainne; araq saq bepihak léq dengan-dengan Yahudi dait araq saq bepihak léq rasul-rasul nike.

⁵Terus dengan-dengan Yahudi dait pemimpin-pemimpinne bareng-bareng kance dengan bangse-bangse lain besepakat jari nyiksaq dait meléwas rasul-rasul nike kadu batu.

⁶Laguq rasul-rasul nike sadar léq keadaan nike, terus nyingkir ojok Listra dait Derbe, kote-kote léq Likaonia, dait ojok daérah sekiterne.

⁷Léq derike ie pade ngabarang malik Kabar Solah nike.

⁸Léq Listra araq sopoq dengan mame saq naéne képaq léman ie tebijeang, sehingge ie ndéq uwah tao lampaq séngaq naéne ndéq kuat.

⁹Dengan nike tokol léq derike dengahang Paulus bebaos. Paulus serioq bahwe dengan nike percaye dait bau teselahang. Make Paulus merhatiang ie.

¹⁰Dait siq suare saq beléq Paulus bebase, “Silaq nganjeng saq solah!” Dengan nike nyelontak nganjeng terus lampaq.

¹¹Waktu dengan luwéq serioq napi saq sampun telaksaneang siq Paulus, ie pade bekuih kadu base Likaonia, “Déwe-déwe sampun turun ojok dunie kadu awak manusie.”

¹²Terus Barnabas ie pade aranin Zeus, dait Paulus ie pade aranin Hermes, séngaq ie saq bebaos.

¹³Imam déwe Zeus, saq taoq ibadahne araq léq julu kote, dateng jauq sampi mame dait kembang-kembang ojok jebak beléq kote. Ie mélé milu kance dengan luwéq nike ngaturang kurban tipaq rasul-rasul nike.

¹⁴Waktu Barnabas dait Paulus pirengang napi saq gen telaksaneang siq dengan-dengan nike, ie pade ngeroék-roék kelambine sambil ie pade pelai ojok tengaq-tengaq dengan luwéq nike, beterus nyurak,

¹⁵ “Hai, kembéq side pade ngelaksaneang hal niki? Tiang pade niki manusie éndah pade maraq side! Tiang pade dateng ojok deriki jari nyampéang Kabar Solah tipaq side, adéq side pade tetéh hal-hal saq ndéq araq manpaatne niki, dait bebalik tipaq Allah saq idup, saq jariang langit dait gumi, segare dait selapuq isine.

¹⁶Léq waktu saq laéq Allah menengang bangse-bangse idup menurut keméléq ie pade sopoq-sopoq.

¹⁷Laguq Allah nénten lupaq ngicanin bukti-bukti mengenai diriq-Ne siq ngelaksaneang saq bagus. Ie ngicanin side ujan léman langit dait hasil tanaq léq musimne. Ie ngicanin keloran léq side dait nyenengang angende.”

¹⁸Laguq siq ucapan-ucapan nike masih sengke éndah rasul-rasul nike segah dengan-dengan nike jauq kurban tipaq ie pade.

¹⁹Dengan-dengan Yahudi saq dateng ojok Listra léman Antiokia léq Pisidia dait léman Ikonium pengaruhin dengan luwéq nike sehingge dengan-dengan nike bepihak léq ie pade. Terus ie pade peléwas Paulus kadu batu, dait orosne ojok luah kote. Ie pade paran Paulus sampun ninggal,

²⁰laguq waktu dengan-dengan saq percaye léq derike nganjeng léq sekeliningne, ie ures dait tame malik ojok kote. Jemaqne ie berangkat ojok Derbe bareng kance Barnabas.

²¹Léq Derbe Paulus dait Barnabas nyampéang Kabar Solah nike dait luwéq dengan jari percaye léq Deside Isa. Sesampun nike ie pade tulak ojok Listra, beterus ojok Ikonium, Antiokia léq Pisidia.

²²Léq kote-kote nike ie pade neguqang angen pengiring-pengiring nike dait naséhat ie pade adéqne tetep léq dalem iman, dait bebase bahwe jari tame ojok dalem Kerajaan Allah ite harus ngalamin luwéq sengsare.

²³Dait léq sebilang jemaah, Paulus dait Barnabas ngangkat pemimpin-pemimpin umaq jemaah-jemaah nike, terus siq do'e dait puase, ie pade nyerahang pemimpin-pemimpin nike ojok Tuhan saq ie pade percaye nike.

²⁴Sesampun nike Paulus dait Barnabas ngelanjutang kelampan ie pade liwatin daérah Pisidia dait dateng léq Pampilia.

²⁵Dait sesampun ie pade nyampéang Manik Allah léq Perga, ie pade lumbar ojok Atalia.

²⁶Léman derike ie pade belayar tulak ojok Antiokia. Nike kote taoqne ie pade teserahang laéq tipaq rahmat Allah, adéq ie pade ngelaksaneang pegawéan saq mangkin sampun ie pade tutuqang.

²⁷Sewaktu dateng léq Antiokia, ie pade ngumpulang dengan-dengan léman jemaah nike, terus nyeriteang selapuq saq sampun tekaryeang siq Allah langan ie pade. Ie pade nyeriteang éndah berembé Allah sampun bukaq langan adéq dengan bangse-bangse lain beriman dalem Deside Isa.

²⁸Léq kote nike Paulus dait Barnabas ngonéq ndot kance dengan-dengan percaye.