Read KITAB SUCI ZABUR INJIL KISAH RASUL-RASUL 16 Bible Online

KISAH RASUL-RASUL 16 - KITAB SUCI ZABUR INJIL bible

KISAH RASUL-RASUL 16

¹Paulus ngelanjutang kelampanne ojok Derbe beterus ojok Listra. Léq derike araq sopoq dengan pengiring Deside Isa aranne Timotius. Inaqne dengan Yahudi saq sampun percaye léq Deside Isa; laguq bapaqne dengan Yunani.

²Léq antare dengan-dengan percaye saq ndot léq Listra dait léq Ikonium, Timotius tekenal jari dengan saq soléh.

³Paulus kayun adéq Timotius milu kance ie; keranaq nike Paulus nyunat Timotius. Ie ngelaksaneang hal nike, séngaq dengan-dengan Yahudi léq daérah derike nike selapuqne nenaoq bahwe bapaqne Timotius dengan Yunani.

⁴Léq sebilang kote saq ie pade datengin, ie pade nyampéang tipaq dengan-dengan percaye keputusan-keputusan saq sampun tetentuang siq rasul-rasul dait pemimpin-pemimpin léq Yerusalem. Ie pade naséhatin semeton-semeton saq sampun percaye nike adéqne taat léq aturan nike.

⁵Make jemaah-jemaah nike sayan teguq imanne, dait sebilang jelo sayan luwéq jumlahne.

⁶Roh Suci nénten ngijinang Paulus dait Silas nyebarang Manik Allah léq wilayah Asia. Jari ie pade ngelanjutang kelampanne ojok daérah Prigia dait Galatia.

⁷Sewaktu dateng léq perbatesan Misia, ie pade cobaq tame ojok daérah Bitinia, laguq Roh Deside Isa balaq ie ojok derike.

⁸Jari ie pade liwatin Misia dait langsung tipaq Troas.

⁹Kelemne, léq Troas, Paulus mauq sopoq penyerioqan. Dalem penyerioqanne nike Paulus serioq sopoq dengan Makedonia nganjeng léq julune dait ie tunas gati adéq Paulus lumbar ojok Makedonia jari tulung ie pade.

¹⁰Sesampun Paulus mauq penyerioqan nike, tiang pade langsung berejap gen lalo ojok Makedonia. Séngaq siq yakin tiang pade bait kesimpulan bahwe Allah manikang tiang pade ngabarang Kabar Solah nike tipaq dengan-dengan léq derike.

¹¹Tiang pade bilin Troas dait belayar langsung ojok Samotrake, dait jemaqne ojok Neapolis.

¹²Léman derike tiang pade ojok Pilipi, kote saq utame léq bagian Makedonia. Pilipi niki kote perantoan dengan Roma. Léq derike tiang pade ndot cume pire jelo.

¹³Léq jelo Sabat tiang pade lumbar ojok sedi kokoq léq luah jebak beléq kote, séngaq tiang pade paran léq derike araq taoq ibadah dengan Yahudi. Terus tiang pade tokol dait ngeraos-ngeraos kance dengan-dengan nine saq bekumpul léq taoq nike.

¹⁴Sopoq dengan léq antare ie pade bedagang lakar lempok lomaq, aranne Lidia, asalne léman Tiatira. Ie ngasihin Allah, make Tuhan bukaq angenne adéq ie nerimaq napi saq Paulus ajahang tipaq ie.

¹⁵Lidia dait selapuq dengan saq araq léq baléne tebaptis. Sesampun tebaptis ie pesilaq tiang pade, ie bebase, “Lamun side pade merase bahwe tiang tetu-tetu sampun percaye léq Deside Isa, silaq mererepan léq balén tiang.” Terus ie tunas gati adéq tiang pade turut keméléqne.

¹⁶Léq sopoq jelo sewaktu tiang pade lumbar ojok taoq bedo'e, tiang pade bedait kance sopoq pelayan nine. Pelayan nine nike tekuasein siq roh jahat saq bau ngeramalang peristiwe-peristiwe saq gen dateng. Siq care ngeramalang nasib dengan, ie ngebéng keuntungan saq beléq umaq majikan-majikanne.

¹⁷Pelayan nine nike terus doang turut Paulus dait tiang pade sambil bekuih-kuih, “Dengan-dengan niki hambe-hambe Allah Saq Maheagung! Ie pade rauh gen nyampéang tipaq semeton senamian berembé entane side pade bau selamet!”

¹⁸Pire jelo ngonéqne dengan nine nike terus doang bekuih maraq nike, Paulus telang kesabaranne, sehingge ie ngéngat terus bebase léq roh nike, “Siq peséngan Deside Isa tiang préntahang side sugul léman dengan nine niki!” Waktu nike éndah roh nike sugul léman dengan nine nike.

¹⁹Sewaktu majikan-majikanne sadar bahwe kesempatan ie pade jari mauq képéng sampun telang, ie pade bau Paulus dait Silas, terus ngoros deduaqne ojok lapangan ngadep penguase

²⁰Ie pade jauq Paulus dait Silas ojok pejabat-pejabat kote nike, terus bebase, “Dengan-dengan niki dengan Yahudi. Ie pade ngorayang léq kotente.

²¹Ie pade nganjurang dengan ngelaksaneang adat kebiasean saq betentangan kance hukum-hukumte, dengan-dengan Roma. Ite ndéq bau terimaq atao turut adat kebiasean nike!”

²²Dengan luwéq éndah milu nyerang Paulus dait Silas; dait pejabat-pejabat kote ngantuq kelambi léman awak kedue rasul nike, terus suruq dengan mecut rasul-rasul nike.

²³Sesampun ie pade tepecut keras-keras, ie pade tetamaq ojok dalem bui. Kepale bui tepréntahang jagaq ie pade pacu-pacu.

²⁴Lantaran préntah nike, kepale bui nike tahen ie pade léq kamar bui saq paling dalem, dait naén ie pade tebelakbak.

²⁵Kire-kire léq tengaq kelem, Paulus dait Silas kenyeke bedo'e dait nyanyiang lagu pujian tipaq Allah. Dengan-dengan saq tebui lainne éndah kenyeke dengahang ie pade benyanyi.

²⁶Selung-selung araq lindur saq beléq gati jangke dasar bangunan bui nike éndah milu inggur. Selapuq lawang bui kebukaq dait ranté-ranté saq tekadu taliq selapuq dengan tahenan bui éndah jari lepas.

²⁷Kepale bui nike tinjot dait ures. Waktu ie serioq lawang-lawang bui kebukaq, ie serét kléwangne gen matéq diriqne, séngaq ie paran dengan-dengan tahenan bui sampun pelai selapuqne.

²⁸Laguq Paulus bekuih keras-keras, “Ndaq matéq diriqde! Tiang pade masih araq léq deriki!”

²⁹Kepale bui nike tunas dilah terus pelai ojok dalem, dait siq ngijikne ie nyungkur léq julu Paulus dait Silas.

³⁰Beterus ie jauq rasul-rasul nike sugul, dait bebase, “Bapaq-bapaq, napi saq harus tiang laksaneang adéq tiang teselametang?”

³¹Paulus dait Silas bejawab, “Percaye léq Junjungan Saq Mulie Deside Isa Almasih! Make side gen selamet -- side dait selapuq dengan saq araq léq balénde!”

³²Terus Paulus dait Silas jelasang manik Tuhan tipaq kepale bui nike dait tipaq selapuq dengan saq araq léq baléne.

³³Léq tengaq kelem nike éndah, kepale bui nike jauq ie pade beterus persiq bakat-bakat ie pade. Make ie dait selapuq dengan léq baléne langsung tebaptis.

³⁴Beterus ie jauq Paulus dait Silas ojok baléne, dait ngaturin ie pade medaran. Ie dait selapuq keluargene seneng gati, séngaq mangkin ie pade percaye tipaq Allah.

³⁵Jemaq kelémaqne, pejabat-pejabat kote nike ngutus petugas ojok bui jari nyampéang préntah adéq Paulus dait Silas telepas.

³⁶Kepale bui nike nyampéang hal nike léq Paulus, ie bebase, “Bapaq-bapaq, pejabat-pejabat kote niki sampun nyugulang préntah jari bébasang side pade. Mangkin Bapaq-bapaq kanggo uléq. Silaq lumbar dalem damé!”

³⁷Laguq Paulus bebase léq petugas nike, “Tiang pade warge negare Roma. Ndéqman teadilin tiang pade sampun tepecut léq julu dengan luwéq dait tetamaq ojok dalem bui. Dait mangkin ie pade suruq tiang pade lalo tedoq-tedoq? Tiang pade ndéq mélé! Suruq pejabat-pejabat kote nike dateng ojok deriki jari bébasang tiang pade.”

³⁸Petugas-petugas nike ngelaporang hal nike tipaq pejabat-pejabat kote nike. Waktu ie pade dengah bahwe Paulus dait Silas warge negare Roma, ie pade jari takut.

³⁹Terus ie pade lumbar tunas maap léq Paulus dait Silas, beterus ngatong deduaqne sugul léman bui, dait tunas adéq ie pade bilin kote nike.

⁴⁰Paulus dait Silas bilin bui nike terus lumbar ojok balé Lidia. Sesampun bedait kance dengan-dengan percaye saq araq léq derike, dait ngebéng semanget léq ie pade, Paulus dait Silas berangkat.