Read KITAB SUCI ZABUR INJIL KISAH RASUL-RASUL 18 Bible Online

KISAH RASUL-RASUL 18 - KITAB SUCI ZABUR INJIL bible

KISAH RASUL-RASUL 18

¹Sesampun nike Paulus bilin Atena dait lumbar ojok Korintus.

²Léq derike ie bedait kance sopoq dengan Yahudi aranne Akwila, asalne léman negeri Pontus. Akwila baruq gati dateng léman Italia kance seninene aranne Priskila. Ie pade dateng ojok Korintus séngaq Kaisar Klaudius sampun mréntahang selapuq dengan Yahudi sugul léman Roma. Paulus lumbar jangoq ie pade,

³terus ndot léq derike kance ie pade, dait begawéan bareng-bareng kance ie pade, séngaq pegawéanne pade maraq Paulus, tukang miaq kémah.

⁴Laguq léq sebilang jelo Sabat, Paulus bebaos-baos léq balé ibadah, jari ngeyakinang dengan-dengan Yahudi dait dengan bangse-bangse lain.

⁵Sesampun Silas dait Timotius dateng léman Makedonia, Paulus kadu selapuq waktune jari beriteang Manik Allah dait ngebéng kesaksian tipaq dengan-dengan Yahudi bahwe Deside Isa nike Almasih saq tejanjiqang siq Allah.

⁶Laguq lantaran dengan-dengan terus doang nentang dait ngewade ie, make Paulus ngerapang kerepuk léman kelambine jari ngebéng peringetan tipaq kesalaqan ie pade. Basen Paulus, “Side mésaq saq nanggung kesalaqande. Tiang ndéq salaq, tiang bersi! Mulai mangkin tiang gen lalo ojok dengan bangse-bangse lain.”

⁷Paulus bilin ie pade, terus lumbar ojok balé Titius Yustus, dengan saq ndéq Yahudi, laguq ie nyembah Allah. Baléne bedékétan kance balé ibadah.

⁸Laguq Krispus, kepale balé ibadah nike kance selapuq keluargene percaye léq Junjungan Saq Mulie Deside Isa. Dait luwéq éndah dengan-dengan Korintus lainne dengah berite saq tesampéang siq Paulus, dait ie pade percaye léq Deside Isa terus tebaptis.

⁹Léq sopoq kelem, Tuhan bemanik tipaq Paulus léq dalem sopoq penyerioqan, manik-Ne, “Ndaq takut! Beriteang terus Manik Allah, dait ndaq tedoq.

¹⁰Séngaq Tiang araq bareng side. Ndéq araq sopoq dengan juaq saq bau ngelaksaneang saq jahat tipaq side, séngaq luwéq umat Tiang léq kote niki.”

¹¹Keranaq nike Paulus ndot léq Korintus setaun setenge ngonéqne, dait ngajahang Manik Allah tipaq ie pade.

¹²Sewaktu Galio jari gubernur Akaya, dengan-dengan Yahudi besopoq nentang Paulus dait jauq ie ojok pengadilan.

¹³Basen ie pade, “Dengan niki ngebéng pengaruh léq dengan luwéq adéq nyembah Allah siq care saq betentangan kance hukum Taurat!”

¹⁴Sewaktu Paulus mélé bejawab, Galio sampun bebase tipaq dengan-dengan Yahudi, “Hai dengan-dengan Yahudi! Lamun saq telaporang niki masalah pelanggaran atao kejahatan, mule sepatutne tiang sabar dengahang laporande niki.

¹⁵Laguq niki pegejuhan mengenai ucapan-ucapan dait aran-aran dait éndah hukum-hukumde mésaq! Jari side pade saq harus nyeleséang ie. Tiang ndéq mélé ngadilin hal-hal saq maraq niki!”

¹⁶Terus Galio tundung ie pade sugul.

¹⁷Make ie pade bau Sostenes, kepale balé ibadah nike, dait ngempuk ie léq julu méje pengadilan. Laguq Galio tetu-tetu ndéq peduli léq hal nike.

¹⁸ Sesampun nike Paulus masih ngonéq ndot léq Korintus. Beterus ie bepamit léq dengan-dengan percaye léq derike, terus belayar kance Priskila dait Akwila ojok Siria. Léq Kengkrea, Paulus peleng bulune saq tealurang bélo lantaran nazarne tipaq Tuhan.

¹⁹Sesampun dateng léq Epesus, Paulus bilin Priskila dait Akwila, terus tame ojok balé ibadah dait saling tukah pendapet kance dengan-dengan Yahudi léq derike.

²⁰Ie pade tunas adéq Paulus mélé ngonéqan ndot kance ie pade, laguq ie ndéq mélé.

²¹Timaq maraq nike, léq waktu gen berangkat, Paulus bebase, “Lamun Allah ngijinang, tiang gen tulak malik ojok deriki.” Sesampun bebase maraq nike, ie berangkat léman Epesus.

²²Sesampun turun léq Kaisarea, ie lumbar ojok Yerusalem jari ngucapang salam tipaq jemaah léq derike, terus berangkat ojok Antiokia.

²³Sesampun ndot léq derike pire jelo ngonéqne, ie berangkat malik ojok daérah Galatia dait Prigia jari neguqang iman selapuq dengan percaye.

²⁴Léq waktu nike, araq sopoq dengan Yahudi kelahiran Aleksandria dateng ojok Epesus, aranne Apolos. Ie ceket ngeraos dait paham gati mengenai isi Kitab Suci,

²⁵dait sampun tedidik jari nerimaq pengajahan mengenai Tuhan. Make ie semanget gati ngajahang mengenai Deside Isa secare teliti, timaq baruq baptisan Yahya doang saq ie taoq.

²⁶Ie mulai bani ngajahang léq balé ibadah, dait léq waktu Priskila dait Akwila dengah pengajahanne, ie pade jauq ie ojok balé. Terus léq derike ie tejelasang malik secare teliti mengenai karye Allah.

²⁷Beterus Apolos beniat lumbar ojok Akaya. Make dengan-dengan saq percaye tipaq Deside Isa léq Epesus, nulis surat tipaq semeton-semeton saq percaye léq Akaya adéq ie pade nerimaq Apolos. Dait sewaktu Apolos dateng léq Akaya, ternyate bantuanne bemanpaat gati umaq dengan-dengan saq lantaran rahmat Allah sampun percaye léq Deside Isa.

²⁸Séngaq siq bukti-bukti saq kuat ie kalahang dengan-dengan Yahudi waktu ie pade bedebat léq julun dengan luwéq. Dait ie buktiang kadu ayat-ayat saq araq léq Kitab Suci bahwe Deside Isa nike Almasih.