Read KITAB SUCI ZABUR INJIL KISAH RASUL-RASUL 2 Bible Online

KISAH RASUL-RASUL 2 - KITAB SUCI ZABUR INJIL bible

KISAH RASUL-RASUL 2

¹ Sewaktu sampun wayene jelo Pentakosta, selapuq dengan percaye bekumpul léq sopoq taoq.

²Selung-selung kedengahan suare léman langit maraq angin saq keras. Balé taoq dengan-dengan nike kenyeke melinggih selapuqne penoq siq suare nike.

³Beterus ie pade serioq élaq-élaq maraq nyale api lampaq ojok embé-embé, dait nyontoq tipaq ie pade sopoq-sopoq.

⁴Ie pade selapuq tepenoqin siq Roh Suci, dait mulai ngeraos kadu macem-macem base saq lain. Ie pade ngeraos maraq saq teicanin siq Roh nike tipaq ie pade jari teucapang.

⁵Léq waktu nike luwéq dengan Yahudi saq soléh, léman macem-macem negeri léq seantéro dunie, ndot léq Yerusalem.

⁶Sewaktu kedengahan suare nike, luwéq gati dengan-dengan bekerimpun. Ie pade selapuq bingung dengah dengan-dengan percaye nike ngeraos kadu base ie pade sopoq-sopoq.

⁷Ie pade bengaq dait takjub terus bebase, “Tekan dengan-dengan saq ngeraos niki selapuqne dengan-dengan Galilea?

⁸Segerah ite dengah ie pade ngeraos kadu base saq ite kadu léq negeri asalte?

⁹Ite dengan-dengan léman Partia, Media, Elam, léman Mesopotamia, Yudea dait Kapadokia; léman Pontus dait Asia,

¹⁰léman Prigia dait Pampilia, léman Mesir dait daérah-daérah Libia dékét Kirene; léq antare ite araq saq dateng léman Roma,

¹¹araq dengan-dengan Yahudi dait araq éndah dengan bangse-bangse lain saq sampun tame agame Yahudi; araq éndah saq dateng léman Kreta dait Arab. Ite selapuq dengah ie pade ngeraos kadu basente sopoq-sopoq mengenai hal-hal saq ajaip saq telaksaneang siq Allah!”

¹²Ie pade selapuq bengaq dait takjub terus beketuan sopoq kance saq lain, “Napi artine niki?”

¹³Laguq araq éndah dengan-dengan saq nyindir. Basene, “Dengan-dengan nike kenyeke bowos siq anggur manis!”

¹⁴Beterus Petrus nganjeng bareng solas rasul saq lain, dait bebase tipaq dengan luwéq nike siq suare saq beléq, “Semeton-semeton, dengan-dengan Yahudi dait selapuq dengan saq ndot léq Yerusalem! Dengahang pacu-pacu, séngaq hal niki perlu tiang jelasang léq side.

¹⁵Dengan-dengan niki ndéqne bowos, maraq saq side pade paran; séngaq mangkin baruq jam siwaq kelémaq.

¹⁶Laguq mengenai hal niki Allah sampun bemanik langan Nabi Yoel:

¹⁷ Allah bemanik, ‘Léq ahir jaman Tiang gen curahang Roh Tiang ojok selapuq dengan. Bije-bijende saq mame-mame dait bije-bijende saq nine gen benubuat. Terune-terunende gen serioq hal-hal ajaip saq Tiang petitoqang tipaq ie pade. Dengan-dengan toaqde gen mauq impi saq Tiang icanin tipaq ie pade.

¹⁸Tipaq pelayan-pelayan Tiang éndah -- saq mame-mame dait saq nine-nine --, gen Tiang curahang Roh Tiang léq jelo-jelo nike. Ie pade gen benubuat.

¹⁹Tiang gen miaq keajaipan-keajaipan léq atas, léq langit, dait hal-hal luar biase léq bawaq, léq gumi; daraq dait api, gumpelan pendet.

²⁰Jelo gen jari peteng, bulan jari béaq maraq daraq sendéqman Jelo Tuhan, jelo saq beléq dait mulie nike rauh.

²¹Léq waktu nike, dengan saq bekuih tipaq Tuhan gen teselametang.’

²²Dengan-dengan Israel! Pade dengahang napi saq tiang sampéang niki: Deside Isa dengan Nazaret nike sampun tetentuang siq Allah umaq side. Nike nyate gati léq keajaipan-keajaipan dait hal-hal luar biase saq Allah laksaneang léq tengaq-tengaq side pade langan Deside Isa nike. Selapuqne nike side mésaq sampun nenaoq.

²³ Sesuai maksut dait rencane Allah mésaq, Ie mutusang jari nyerahang Deside Isa tipaq side pade. Dait sewaktu Deside Isa teserahang, side pade nyematéq Ie siq care ngalurang dengan-dengan jahat pakuq Ie léq kayuq salib.

²⁴ Laguq Allah ngidupang Ie malik léman tengaq-tengaq dengan-dengan ninggal. Ie tekalahang siq kematéan, laguq Allah ngelepasang Ie, séngaq ndéq mungkin Ie tetep tekuasein siq kematéan.

²⁵ Mengenai Deside Isa niki, Daud sampun bebase, ‘Tiang serioq Tuhan tetep léq julun tiang; Ie araq léq sedi kanan tiang, adéq tiang ndéq teguncang siq napi juaq.

²⁶Keranaq nike angen tiang besukecita, biwih tiang ngucapang nyanyian; dait awak tiang niki gen ndot dalem pengharepan.

²⁷Séngaq Deside nénten menengang jiwen tiang ndot dalem dunie dengan maté. Deside nénten menengang Dengan Suci Deside binase.

²⁸Deside sampun nyatayang tipaq tiang langan saq nuju idup saq sejati. Sukecite tiang beléq gati, séngaq Deside araq bareng tiang.’

²⁹Semeton-semeton, ijinang tiang ngeraos secare terus terang mengenai Daud, bapaq leluhurte nike. Ie sampun ninggal dait sampun temakamang éndah; makamne masih araq léq tengaq-tengaqte jangke mangkin.

³⁰ Allah sampun bejanji tipaq Daud, siq sumpah, bahwe salaq sopoq dengan léman keturunanne gen teangkat siq Allah jari raje. Séngaq Daud wikanang janji nike dait lantaran ie éndah nabi,

³¹ie wikan éndah napi saq gen telaksaneang siq Allah. Jari ie sampun benubuat bahwe Almasih saq tejanjiqang siq Allah, gen idup malik léman ninggal. Daud bebase, ‘Ie nénten temenengang léq dalem dunie dengan-dengan maté; rage-Ne nénten gen ancur dait bis.’

³²Deside Isa niki saq teidupang malik léman ninggal siq Allah. Tiang pade selapuq sampun nyaksiang mésaq hal nike.

³³Ie teangkat léq jabatan saq atas dait teicanin Roh Suci saq sampun tejanjiqang siq Bapa. Dait saq side pade dengah dait serioq mangkin niki, Roh nike saq Ie curahang tipaq tiang pade.

³⁴ Daud mésaq nénten taék ojok sorge, laguq Daud bebase, ‘Tuhan bemanik tipaq Junjungan tiang Saq Mulie:

³⁵Melinggih léq sedi kanan Tiang, jangke Tiang miaq musuh-musuh Deside takluk léq Deside!’

³⁶Keranaq nike selapuq dengan Israel harus nenaoq pacu-pacu bahwe Deside Isa saq side pade pakuq léq kayuq salib nike, Ie éndah saq sampun tejanjiqang siq Allah jari Junjungan Saq Mulie dait Almasih!”

³⁷Sewaktu dengan-dengan nike dengah hal nike, angen ie pade jari osah. Terus ie pade beketuan léq Petrus dait rasul-rasul saq lainne, “Semeton-semeton, napi saq harus tiang pade piaq?”

³⁸Jawab Petrus, “Pade tobat léman dose-dosende. Dait side pade sopoq-sopoq harus tebaptis dalem peséngan Deside Isa Almasih, adéq dose-dosende teampunin. Make side pade gen nerimaq paice Roh Suci léman Allah.

³⁹Séngaq saq tejanjiqang siq Allah, nike umaq side dait keturunande, dait umaq dengan-dengan saq araq léq taoq-taoq saq jaoq -- selapuq dengan saq temanikang siq Allah, Tuhante jari parek tipaq Ie.”

⁴⁰Maraq nike Petrus jelasang léq ie pade. Dait siq luwéq ucapan lain malik ie ngebéng sopoq kesaksian dait ngebéng naséhat, dait basene: “Serahang diriqde adéq teselametang léman keturunan saq jahat niki.”

⁴¹Luwéq dengan percaye léq napi saq gen tesampéang siq Petrus, terus ie pade tebaptis. Make jumlah dengan percaye léq jelo nike beromboq malik telu iyu dengan.

⁴²Ie pade pacu-pacu berajah léman rasul-rasul dait tetep bekumpul bareng-bareng. Ie pade bekelor bareng-bareng dait bedo'e bareng-bareng.

⁴³Luwéq gati keajaipan saq tepiaq siq rasul-rasul nike sehingge selapuq dengan takjub dait takut.

⁴⁴ Dengan-dengan percaye nike selapuqne tetep besopoq dait napi saq ie pade épéang, ie pade kadu bareng-bareng.

⁴⁵Ie pade jual barang-barang dait selapuq dowén ie pade, terus bagi-bagiang képéngne léq antare ie pade selapuqne menurut keperluanne sopoq-sopoq.

⁴⁶Sebilang jelo ie pade tetep bekumpul léq Gedéng Allah. Ie pade bekelor bareng-bareng, siq angen saq gembire dait tulus até léq balé-balé ie pade.

⁴⁷Ie pade tetep memuji-muji Allah dait tedemenang siq selapuq dengan. Sebilang jelo jumlah ie pade tetep beromboq séngaq Junjungan Saq Mulie ngicanin tipaq ie pade dengan-dengan saq teselametang.