Read KITAB SUCI ZABUR INJIL KISAH RASUL-RASUL 20 Bible Online

KISAH RASUL-RASUL 20 - KITAB SUCI ZABUR INJIL bible

KISAH RASUL-RASUL 20

¹Sesampun keadaan léq Epesus tentrem malik, Paulus ngumpulang jemaah dait neguqang angen ie pade. Terus Paulus bepamit léq dengan-dengan nike, dait ngelanjutang kelampanne ojok Makedonia.

²Paulus datengin daérah-daérah Makedonia, dait luwéq ngebéng naséhat léq dengan-dengan saq percaye léq Deside Isa dait ngebéng ie pade semanget. Beterus ie lumbar ojok Yunani.

³Telu bulan ngonéqne ie ndot léq derike. Sewaktu ie kenyeke berejap gen belayar ojok Siria, araq berite bahwe dengan-dengan Yahudi kenyeke mupakat gen nyematéq ie. Keranaq nike ie mutusang gen tulak langan Makedonia.

⁴Sopater bije Pirus saq asalne léman Berea lumbar bareng kance ie; maraq nike éndah Aristarkus dait Sekundus dengan léman Tesalonika, dait Gayus dengan Derbe, Timotius, Tikikus dait Tropimus, dengan-dengan léman propinsi Asia.

⁵Ie pade lumbar bejulu ngantih léq Troas.

⁶Sesampun Perayaan Ruti Ndéq Beragi, tiang pade belayar bilin Pilipi. Sesampun lime jelo, tiang pade bekumpul malik kance ie pade léq Troas. Léq derike tiang pade ndot pituq jelo ngonéqne.

⁷Léq jelo penembéq dalem minggu nike, sewaktu tiang pade bekumpul jari bareng-bareng bekelor, Paulus bebaos kance semeton-semeton seiman léq derike, séngaq ie beniat gen berangkat léq jemaqne.

⁸Léq kamar atas taoq tiang pade bekumpul nike araq luwéq dilah saq nyale.

⁹Sopoq terune aranne Eutikus tokol léq jendéle. Séngaq Paulus ngonéq gati bebaos, terune nike jari ngantok gati jangke ie ketindoqan léq jendéle nike, terus ie geriq léman tingket saq ketelu. Waktu ie teangkat siq dengan-dengan, terune nike sampun milinang.

¹⁰Laguq Paulus turun ojok bawaq, terus rebaqang diriqne léq atas terune nike dait kapongne. Basen Paulus, “Ndaq kuatir, ie masih idup!”

¹¹Beterus Paulus taék malik ojok atas, dait bagi-bagiang ruti, terus ie pade bekelor bareng-bareng. Sesampun inggas bekelor, Paulus bebaos malik kance dengan-dengan nike jangke dateng subuh. Beterus Paulus berangkat.

¹²Dengan-dengan jauq uléq terune saq sampun idup nike ojok baléne. Ie pade merase seneng dait tehibur.

¹³Tiang pade juluan lumbar ojok kapal, terus belayar ojok Asos jari bait Paulus léq derike sesuai kance pesen léman ie, séngaq ie mélé lumbar ojok derike langan darat.

¹⁴Sesampun bedait léq Asos, Paulus taék ojok kapal terus tiang pade belayar ojok Metilene.

¹⁵Léman derike tiang pade belayar malik, dait jemaqne dateng léq taoq saq berandangan kance pulao Kios. Jemaqne tiang pade dateng léq Samos, dait karing sejelo malik dateng léq Miletus.

¹⁶Paulus sampun mutusang ndéqne nyelaloq léq Epesus, adéqne ndéq sie-sieang waktu léq daérah Asia. Lamun iniq Paulus mélé becat-becat dateng léq Yerusalem léq Hari Raye Pentakosta.

¹⁷Léman Miletus Paulus ngirim berite ojok Epesus jari tunas pare pemimpin jemaah léq derike dateng bedait kance ie.

¹⁸Sesampun ie pade dateng, Paulus bebase léq ie pade, “Semeton-semeton sampun nenaoq berembé tiang idup sengonéq niki léq antare side pade léman jelo penembéq tiang dateng léq Asia.

¹⁹Siq kerendahan até dait sedih gati, tiang ngelayanin Tuhan léq tengaq-tengaq penderitean saq tiang alamin lantaran rencane jahat dengan-dengan Yahudi saq mélé nyematéq tiang.

²⁰Side pade sampun nenaoq bahwe tiang secare terus-terang nyampéang léq side pade napi saq bemanpaat umaq side pade. Tiang ngajah side pade léq taoq-taoq dengan luwéq dait léq balé-balé.

²¹Tipaq bangse-bangse Yahudi dait dengan bangse-bangse lain, selapuqne tiang peringet adéq ie pade tobat léman dose-dosene dait parek ojok Allah, serte beriman léq Junjungante Saq Mulie Deside Isa.

²²Mangkin jari taat léq préntah Roh Suci, tiang lalo ojok Yerusalem. Dait tiang ndéq ngerti napi saq gen nimpe tiang léq derike.

²³Tiang cume nenaoq bahwe léq sebilang kote, Roh Suci sampun secare teges nyampéang léq tiang, bahwe tiang gen tame bui dait gen menderite.

²⁴ Laguq tiang ndéq peduli léq idup tiang niki, asal tiang bau nutuqang tugas saq tepercayeang siq Junjungan Saq Mulie Deside Isa tipaq tiang dait asal tiang tetep setie jangke penutuq idup tiang jari beriteang Kabar Solah mengenai rahmat Allah nike.

²⁵Dait mangkin tiang nenaoq, side selapuq saq sampun tiang datengin jari nyampéang berite mengenai Kerajaan Allah, ndéq gen bedait kance tiang malik.

²⁶Keranaq nike mangkin secare teges tiang sampéang tipaq side pade bahwe lamun araq léq antare side pade saq binase éraq, nike ndéqne salaq tiang.

²⁷Tiang ndéq uwah bilin tugas tiang jari jelasang selapuq rencane Allah tipaq side pade.

²⁸Side pade harus jagaq diriqde dait jagaq éndah selapuq jemaah saq sampun tepercayeang léq side pade siq Roh Suci jari tejagaq; séngaq side pade sampun teangkat jari pengawas jemaah nike. Side pade harus jagaq jemaah Allah nike maraq pengarat jagaq dombe-dombene, séngaq Allah sampun jariang jemaah nike jari dowé-Ne siq daraq Bije-Ne mésaq.

²⁹Sesampun tiang bilin, pasti gen dateng serigale-serigale saq galak ojok tengaq-tengaq side pade. Dait dengan-dengan saq side pade jagaq nike gen jari mangse serigale-serigale nike.

³⁰Malahan léq antare side mésaq éndah gen araq dengan-dengan saq gen nyampéang berite saq ndéq kenaq. Hal nike ie pade laksaneang adéq dengan-dengan saq sampun percaye léq Deside Isa jari sesat dait turut ie pade.

³¹Keranaq nike, side pade bejage-jage! Inget bahwe telu taun ngonéqne, siq luwéq nyugulang aiq mate, peteng menah, tiang ndéq engkah-engkahne ngajah sebilang dengan léman side pade.

³²Mangkin tiang serahang side pade ojok Tuhan dait tipaq berite rahmat-Ne saq bekuase neguqang side pade dait ngicanin side pade paice jari warisan saq tetentuang umaq selapuq dengan saq sampun Ie suciang.

³³Tiang ndéq uwah harepang emas, perak atao kelambi léman sai juaq.

³⁴Side mésaq nenaoq bahwe siq ime tiang mésaq tiang begawéan jari keperluan tiang mésaq dait batur-batur saq milu kance tiang.

³⁵Léq dalem selapuq hal tiang sampun ngebéng teladan tipaq side bahwe siq begawéan pacu-pacu maraq niki, ite harus tulung dengan-dengan saq lemah. Séngaq ite harus inget léq napi saq sampun temanikang Junjungan Saq Mulie Deside Isa, ‘Bahagiean ite ngebéng ketimbang nerimaq.’ ”

³⁶Sesampun bebase maraq niki, Paulus bareng dengan-dengan nike sujut bedo'e.

³⁷Ie pade selapuq nangis sambil ngapong ie dait siduk ie.

³⁸Ie pade sedih terutame lantaran Paulus bebase bahwe ie pade ndéq gen serioq ie malik. Terus ie pade ngatong Paulus jangke dateng kapal.