Read KITAB SUCI ZABUR INJIL KISAH RASUL-RASUL 21 Bible Online

KISAH RASUL-RASUL 21 - KITAB SUCI ZABUR INJIL bible

KISAH RASUL-RASUL 21

¹Tiang pade tunas pamit léq pemimpin-pemimpin jemaah léman Epesus nike, terus bilin ie pade. Terus tiang pade belayar langsung ojok pulao Kos; dait jemaqne tiang pade dateng léq pulao Rodos. Léman derike tiang pade belayar ojok pelabuan Patara.

²Léq Patara tiang pade ndait kapal saq gen ojok Penisia. Jari tiang pade taék léq kapal nike terus berangkat

³dait tiang pade belayar jangke tiang pade serioq pulao Siprus léq sedi kiri, laguq tiang pade terus belayar ojok Siria. Tiang pade belabuh léq Tirus, séngaq léq derike kapal taoq tiang pade numpang gen nurunang muatanne.

⁴Léq taoq nike tiang pade lalo jangoq dengan-dengan saq percaye léq Deside Isa, terus ndot bareng kance ie pade pituq jelo ngonéqne. Langan petunjuk léman Roh Allah, dengan-dengan nike ngebéng naséhat tipaq Paulus adéqne ndaq lumbar ojok Yerusalem.

⁵Laguq sesampun waktune tiang pade harus berangkat, tiang pade bilin ie pade, terus ngelanjutang kelampan tiang pade léman derike. Ie pade selapuq lantong anak kance seninene ngatong tiang pade jangke dateng luah kote. Léq sedin pesisi, tiang pade selapuq sujut bedo'e.

⁶Sesampun nike tiang pade besalam-salaman, terus tiang pade taék ojok kapal, dait ie pade uléq ojok baléne.

⁷Tiang pade belayar terus léman Tirus jangke dateng Ptolemais. Léq derike tiang pade lalo jangoq semeton-semeton saq percaye léq Deside Isa jari ngucapang salam tipaq ie pade, terus ndot sejelo bareng ie pade.

⁸ Léq jemaqne tiang pade berangkat malik, terus dateng léq Kaisarea. Léq derike tiang pade lalo ojok balén Pilipus dengan saq beriteang Kabar Solah nike, ie salaq sopoq léman pituq dengan saq tepiléq léq Yerusalem, dait tiang pade ndot léq baléne.

⁹Empat bijene saq dedare sampun nerimaq paice jari benubuat.

¹⁰ Sesampun pire ngonéqne tiang pade araq léq derike, araq sopoq nabi rauh léman Yudea, aranne Agabus.

¹¹Nabi nike rauh tipaq tiang pade, terus bait sabuk Paulus. Kadu sabuk nike ie taliq ime naéne mésaq, terus bebase, “Niki saq temanikang siq Roh Suci: Dengan saq ngépé sabuk niki gen tetaliq maraq niki léq Yerusalem siq dengan-dengan Yahudi, dait teserahang ojok dengan bangse-bangse lain.”

¹²Waktu tiang pade dengah hal nike, tiang pade dait selapuq semeton saq ndot léq Kaisarea nike sanget siqne tunas léq Paulus adéq ie ndaq lumbar ojok Yerusalem.

¹³Laguq jawab Paulus, “Napi manpaatne side pade nangis maraq niki jangke piaq angen tiang susah? Tiang sampun siep, ndéqne cume jari tebau léq derike, laguq éndah maté lantaran Junjungan Saq Mulie Deside Isa.”

¹⁴Paulus ndéq mélé dengah tiang pade, jari tiang pade engkah balaq ie, “Menengang, pekayunan Tuhan doang saq telaksane.”

¹⁵Sesampun tiang pade ndot léq derike pire jelo ngonéqne, tiang pade barang-barang, terus berangkat ojok Yerusalem.

¹⁶Pire semeton léman Kaisarea milu éndah kance tiang pade jari ngatong tiang pade ojok balén Manason, séngaq tiang pade gen madéq léq baléne. (Manason nike dengan Siprus saq sampun ngonéq jari pengiring Deside Isa.)

¹⁷Sewaktu tiang pade dateng léq Yerusalem, semeton-semeton léq derike cemoh gati angenne nyambut tiang pade.

¹⁸Léq jemaqne Paulus lumbar bareng kance tiang pade jangoq Yakub; selapuq pemimpin-pemimpin jemaah araq éndah léq derike.

¹⁹Sesampun tiang pade ngucapang salam tipaq ie pade, Paulus nyeriteang léq ie pade selapuq saq sampun telaksaneang siq Allah langan ie léq antare dengan bangse-bangse lain.

²⁰Sesampun dengah cerite Paulus nike, ie pade selapuq mulieang Allah. Beterus bebase léq Paulus, “Semeton tiang Paulus, side harus nenaoq bahwe sampun beiyu-iyu dengan Yahudi saq percaye léq Deside Isa. Selapuqne nike dengan-dengan saq setie dait taat léq Hukum Taurat.

²¹Dait mangkin ie pade dengah bahwe side ngajah selapuq dengan Yahudi saq ndot léq antare dengan bangse-bangse lain adéqne ngelepas hukum Musa. Side ajah ie pade adéq ndaq sunat bije-bijene atao turut adat istiadat Yahudi.

²²Mangkin dengan-dengan Yahudi saq sampun percaye nike pasti gen dengah bahwe side sampun araq léq deriki. Jari berembé mangkin?

²³ Solahan side turut naséhat tiang pade. Araq empat dengan léq deriki saq sampun benazar tipaq Tuhan.

²⁴Nah, silaq side lumbar ngaraqang upacare penyucian diriq bareng kance ie pade, dait side saq nanggung selapuq biayene, adéq ie pade bau peleng bulune. Siq care nike gen nyate tipaq selapuq dengan bahwe napi saq sampun ie pade dengah mengenai side ndéqne tetu, séngaq side mésaq ngelaksaneang Hukum Taurat.

²⁵ Laguq mengenai dengan bangse-bangse lain, saq sampun percaye léq Deside Isa, tiang pade sampun ngirim surat léq ie pade mengenai keputusan tiang pade, bahwe ie pade ndéq kanggo ngelorang keloran saq sampun teaturang tipaq berhale, ndaq kelorang daraq, ndaq kelorang binatang saq maté tepekok; dait ndaq gawéq perbuatan-perbuatan saq cabul.”

²⁶Sesampun nike Paulus lumbar kance dengan-dengan saq empat nike, terus ngaraqang upacare penyucian diriq bareng kance ie pade. Beterus ie pade tame ojok Gedéng Allah jari bebadaq karing pire jelo upacare penyucian nike gen inggas, dait piran kurban umaq ie pade sopoq-sopoq teaturang.

²⁷Sesampun gen tutuq pituq jelo, araq pire dengan Yahudi léman Asia serioq Paulus léq dalem Gedéng Allah. Terus ie pade hasut dengan luwéq dait bau Paulus

²⁸sambil nyurak-nyurak, “Hai, dengan-dengan Israel! Tulung! Paulus niki dengan saq lalo ojok mbé-mbé jari ngajahang selapuq dengan pengajahan saq nentang bangse Israel, nentang Hukum Taurat dait nentang Gedéng Allah niki. Dait mangkin malahan ie jauq dengan bangse-bangse lain tame ojok dalem Gedéng Allah dait najisang taoq saq suci niki!” (

²⁹ Ie pade bebase maraq nike séngaq ie pade serioq Tropimus dengan Epesus nike araq bareng kance Paulus léq kote; dait ie pade paran bahwe Paulus sampun jauq ie ojok dalem Gedéng Allah.)

³⁰Selapuq kote jari biur lantur, dait selapuq dengan pelai bekerimpun. Ie pade bau Paulus, dait orosne sugul léman Gedéng Allah. Langsung waktu nike éndah lawang Gedéng Allah teimpet.

³¹Léq waktu dengan-dengan saq miaq keributan nike berusahe matéq Paulus, araq dengan saq ngelapor ojok kepale pasukan bahwe selapuq kote Yerusalem biur lantur.

³²Langsung kepale pasukan nike jauq pire prewire dait prajurit, terus becat-becat lumbar ojok taoq keributan nike. Waktu dengan luwéq nike serioq kepale pasukan nike dateng bareng pasukanne, ie pade engkah ngempuk Paulus.

³³Kepale pasukan nike ngerapetin Paulus, terus bau ie dait suruq dengan borgol ie. Terus kepale pasukan nike beketuan, sai Paulus nike dait napi saq sampun ie piaq.

³⁴Separo léman dengan luwéq nike bejawab maraq niki dait separo éndah bejawab maraq nike. Keadaanne ore gade jangke kepale pasukan nike ndéq iniq nenaoq napi setetune saq telaksane. Keranaq nike ie mréntahang adéq Paulus tejauq ojok markas.

³⁵Waktu ie pade jauq Paulus jangke dateng undak-undak, dengan-dengan saq miaq keributan nike ngamuk sehingge Paulus harus teopong siq prajurit-prajurit nike.

³⁶Ie pade teturut léman mudi siq dengan-dengan saq miaq keributan sambil nyurak-nyurak, “Matéq ie!”

³⁷Sewaktu gen tame ojok dalem markas, Paulus bebase léq kepale pasukan nike, “Napi kanggo tiang matur semendaq kance pelungguh?” “Napi side tao base Yunani?” kepale pasukan nike beketuan.

³⁸“Lamun maraq nike side niki ndéqne dengan Mesir saq piranan ngaraqang pemberontakan dait jauq pelai empat iyu pengaco saq kadu gegaman tame ojok padang gurun?”

³⁹Jawab Paulus, “Tiang dengan Yahudi, warge kote Tarsus, kote saq penting léq Kilikia. Tulung ijinang tiang ngeraos kance dengan-dengan nike.”

⁴⁰Jari sesampun tebéng ijin, Paulus nganjeng léq undak-undak, terus ngebéng tande kadu imene. Selapuq dengan jari tenang, beterus Paulus ngeraos kance dengan-dengan nike kadu base Ibrani. Basen Paulus,