Read KITAB SUCI ZABUR INJIL KISAH RASUL-RASUL 23 Bible Online

KISAH RASUL-RASUL 23 - KITAB SUCI ZABUR INJIL bible

KISAH RASUL-RASUL 23

¹Paulus merhatiang anggote-anggote mahkamah nike terus bebase, “Semeton-semeton tiang! Jangke dateng jelo niki tiang ndéq merase salaq tipaq Allah léq dalem até nurani tiang mengenai kehidupan tiang.”

²Waktu Paulus bebase maraq nike, Imam Agung Ananias préntah dengan saq nganjeng léq dékét Paulus namper cangkem Paulus.

³ Beterus Paulus bebase léq imam Agung nike, “Allah pasti namper side, dengan munapik saq puraq-puraq suci! Side melinggih léq derike ngadilin tiang kadu Hukum Taurat, padahal side mésaq ngelanggar hukum nike siq care suruq dengan namper tiang!”

⁴Dengan-dengan saq araq léq dékét Paulus bebase léq Paulus, “Side menghine imam Agung Allah!”

⁵ Jawab Paulus, “Semeton-semeton, tiang ndéq nenaoq, bahwe ie imam agung. Mule sampun araq tetulis léq dalem Kitab Suci, ‘Ndaq side menghine pemimpin bangsende.’ ”

⁶ Paulus serioq bahwe separo anggote-anggote mahkamah nike asalne léman dengan-dengan golongan Saduki dait separone malik dengan-dengan Parisi. Keranaq nike ie bebase léq mahkamah nike, “Semeton-semeton, tiang dengan Parisi dait keturunan Parisi, tiang teadilin léq deriki lantaran tiang percaye bahwe dengan-dengan ninggal gen idup malik.”

⁷Sewaktu Paulus bebase maraq nike, dengan-dengan Parisi dait dengan-dengan Saduki mulai betungkasan, sehingge sidang nike jari due golongan. (

⁸ Séngaq dengan-dengan Saduki bedowé keyakinan bahwe dengan ninggal ndéq gen idup malik, ndéq araq malaékat, dait roh-roh éndah ndéq araq, laguq dengan Parisi percaye léq selapuqne nike.)

⁹Beterus araq keributan saq beléq. Pire dengan Parisi saq jari ahli taurat nganjeng dait secare keras ie nentang hal nike, basen ie pade, “Menurut tiang pade dengan niki tetu-tetu ndéq salaq! Sang araq roh atao malaékat saq ngeraos léq ie!”

¹⁰Pegejuhan nike jari sayan beléq jangke kepale pasukan nike jari takut lamun Paulus gen tekembul siq ie pade. Make ie préntahang pasukanne bait Paulus léman tengaq-tengaq dengan luwéq dait jauq ie ojok markas.

¹¹Léq kelem nike, Junjungan Saq Mulie Deside Isa Almasih ngadeg léq dékét Paulus dait bemanik, “Teguqang angende! Side sampun ngebéng kesaksian mengenai Tiang léq Yerusalem. Laun side harus ngebéng kesaksian léq Roma éndah.”

¹²Jemaqne masih aru gati, dengan-dengan Yahudi mulai miaq komplotan. Ie pade besumpah ndéq gen bekelor atao nginem lamun ie pade ndéqman matéq Paulus.

¹³Araq petang dase dengan lebih saq miaq komplotan nike.

¹⁴Ie pade lumbar ojok imam-imam kepale dait pemimpin-pemimpin Yahudi dait matur, “Tiang pade sampun besumpah bareng-bareng, bahwe tiang pade ndéq gen bekelor atao nginem napi juaq lamun tiang pade ndéqman matéq Paulus.

¹⁵Nah, mangkin semeton-semeton dait anggote-anggote Mahkamah Agame adéqne ngirim surat ojok kepale pasukan Roma nike jari tunas ie jauq Paulus tulak ngadep side pade, maraq side pade gen meriksaq malik pelekarene pacu-pacu. Dait tiang pade siep gen nyematéq ie sendéqman dateng léq deriki.”

¹⁶Laguq bije léman sanak Paulus saq nine dengah rencane komplotan nike. Make ie lumbar ojok markas nyampéang hal nike léq Paulus.

¹⁷Terus Paulus ngempoh sopoq prewire dait bebase léq ie, “Jauq terune niki ojok kepale pasukan, araq saq gen ie laporang léq kepale pasukan.”

¹⁸Prewire nike jauq terune nike ojok kepale pasukan dait matur, “Paulus, tahenan nike ngempoh tiang, dait ngelakoq adéq tiang jauq terune niki tipaq pelungguh; araq saq gen ie laporang.”

¹⁹Kepale pasukan nike negel ime terune nike, terus jauqne ojok sedi mésaq-mésaq dait beketuan, “Napi saq mélé side laporang léq tiang?”

²⁰Terune nike bejawab, “Dengan-dengan Yahudi sampun sepakat gen tunas adéq pelungguh jauq Paulus ngadep Mahkamah Agame jemaq, maraqne ie pade mélé meriksaq malik pelekarene pacu-pacu.

²¹Laguq sampunang pelungguh turut keméléqne nike, séngaq araq petang dase dengan lebih saq kenyeke nyeboq gen ngadang ie léq tengaq langan. Ie pade selapuqne sampun besumpah ndéq gen bekelor dait nginem lamun ie pade ndéqman matéq Paulus. Mangkin selapuqne sampun siep; karing ngantih jawaban pelungguh doang.”

²²Basen kepale pasukan nike, “Ndaq bebadaq léq sai-sai bahwe side sampun ngelaporang hal niki léq tiang.” Terus suruqne terune nike uléq.

²³Beterus kepale pasukan nike ngempoh due prewire, dait bebase léq ie pade, “Siepang satak prajurit dait pituq pulu tentere saq nunggang jaran dait satak tentere saq jauq tumbak, adéq ie pade berangkat jam siwaq kelem niki éndah ojok Kaisarea.

²⁴Siepang éndah jaran adéqne tekadu siq Paulus terus jauq ie selamet jangke dateng Gubernur Peliks.”

²⁵Terus kepale pasukan nike nulis surat saq tetulis maraq niki,

²⁶“Saq Mulie Gubernur Peliks. Salam léman Klaudius Lisias!

²⁷Dengan niki sampun tebau siq dengan-dengan Yahudi dait aroh tematéq siq ie pade, lamun tiang ndéq dateng kance pasukan tiang dait nyelametang ie; séngaq tiang dengah bahwe ie warge negare Roma.

²⁸Lantaran tiang melét nenaoq napi setetune kesalaqan saq tetuduhang tipaq ie, make tiang jauq ie ojok Mahkamah Agame ie pade.

²⁹Ternyate dengan niki ndéq piaq napi-napi saq patut tehukum siq hukuman maté atao tebui. Tuduhan dengan-dengan nike tipaq ie cume mengenai hal-hal saq berubungan kance Hukum Tauratne mésaq.

³⁰Beterus tiang mauq laporan bahwe araq rencane jahat léman dengan-dengan Yahudi tipaq ie, jari tiang langsung ngirim ie ojok Pelungguh, dait sampun tiang suruq selapuq penuntutne ngajuang pengaduanne tipaq pelungguh.”

³¹Beterus anggote-anggote tentere nike ngelaksaneang tugasne. Ie pade bait Paulus, terus kelem nike éndah jauqne Paulus ojok Antipatris.

³²Jemaqne ie pade ngalurang pasukan saq kadu jaran ngelanjutang kelampanne kance Paulus, dait ie pade tulak ojok markas.

³³Waktu pasukan saq kadu jaran nike dateng léq Kaisarea, ie pade nyampéang surat nike tipaq Gubernur, dait nyerahang Paulus tipaq ie.

³⁴Sesampun surat nike tebace siq Gubernur, ie beketuan léq Paulus léman mbé asalne. Sewaktu ie wikan bahwe Paulus asalne léman Kilikia,

³⁵ie bebase, “Bagus! Tiang gen meriksaq pelekarende, lamun dengan-dengan saq nuntut side nike sampun dateng léq deriki.” Terus ie mréntahang adéqne Paulus tetahen léq dalem istane Herodes.