Read KITAB SUCI ZABUR INJIL KISAH RASUL-RASUL 25 Bible Online

KISAH RASUL-RASUL 25 - KITAB SUCI ZABUR INJIL bible

KISAH RASUL-RASUL 25

¹Telu jelo sesampun Pestus dateng léq daérah nike, ie lumbar léman Kaisarea ojok Yerusalem.

²Léq derike imam-imam kepale dait pemimpin-pemimpin Yahudi ngajuang léq ie tuduhan ie pade tipaq Paulus. Ie pade terus doang kédéq Pestus

³adéq siq kesolahan angenne tipaq ie pade, ie mélé suruq dengan jauq Paulus ojok Yerusalem; séngaq ie pade sampun sepakat jari nyematéq Paulus léq tengaq langan.

⁴Laguq jawab Pestus, “Paulus kenyeke tetahen léq Kaisarea; dait tiang mésaq ndéq ngonéq malik gen tulak ojok derike.

⁵Jari, alurang dengan-dengan saq tehormatin léq antare side pade lumbar bareng kance tiang ojok Kaisarea dait pelekareang ie léq derike, lamun mule ie sampun piaq kesalaqan.”

⁶Sesampun meneng léq Yerusalem kire-kire baluq atao sepulu jelo malik, Pestus tulak ojok Kaisarea. Jemaqne ie ngaraqang sidang pengadilan dait mréntahang adéq Paulus tejauq ngadep.

⁷Sewaktu Paulus dateng, dengan-dengan Yahudi saq sampun dateng léman Yerusalem nganjeng léq sekeliningne, dait mulai ngajuang tuduhan-tuduhan saq berat tipaq Paulus. Laguq ie pade ndéq bau buktiang tuduhan-tuduhan nike.

⁸Sebalikne, dalem pembéleanne, Paulus bebase, “Tiang ndéq piaq sopoq hal saq salaq tipaq Hukum Taurat dengan Yahudi atao tipaq Gedéng Allah atao tipaq Kaisar Roma.”

⁹Laguq Pestus kayun nyenengang angen dengan Yahudi. Beterus ie beketuan léq Paulus, “Napi side mélé lumbar ojok Yerusalem jari teadilin léq derike léq julu tiang mengenai tuduhan-tuduhan nike?”

¹⁰Jawab Paulus, “Tiang kenyeke nganjeng léq arepan mahkamah Kaisar Roma; dait léq taoq nike tiang harus teadilin. Pelungguh mésaq wikan bahwe tiang ndéq salaq léq dengan Yahudi.

¹¹Lamun tiang sampun ngelanggar hukum dait piaq hal saq patut tehukum siq hukuman maté, tiang réde maté. Laguq lamun tuduhan-tuduhan ie pade ndéq kenaq, ndéq araq sopoq dengan juaq saq kanggo nyerahang tiang tipaq ie pade. Tiang tunas teadilin léq pengadilan Kaisar!”

¹²Sesampun berunding kance penaséhat-penaséhatne, Pestus bebase, “Side mélé teadilin léq pengadilan Kaisar, jari side harus lumbar ngadep Kaisar.”

¹³Pire jelo sesampun nike, Raje Agripa dait Bernike rauh léq Kaisarea jari ngucapang selamet léq Pestus.

¹⁴Sesampun pire jelo ie pade araq léq derike, Pestus jelasang pelekare Paulus léq Raje Agripa. Pestus bebase, “Araq léq deriki sopoq tahenan saq teadéqang siq Peliks.

¹⁵Waktu tiang araq léq Yerusalem, imam-imam kepale dait pemimpin-pemimpin Yahudi ngajuang pengaduan ie pade tipaq dengan nike dait tunas adéq tiang mutusang hukuman tipaq ie.

¹⁶Laguq jawab tiang bahwe dengan Roma ndéq kanggo nyerahang maraq nike doang sopoq dengan saq tetuduh jari tehukum, lamun saq tetuduh ndéqman tepade arepan kance penuntut-penuntutne dait tebéng kesempatan béle diriq.

¹⁷Jari, waktu ie pade dateng ojok deriki, tiang ndéq ngantih ngonéq-ngonéq. Jemaqne tiang langsung ngaraqang sidang pengadilan dait mréntahang adéq dengan nike tejauq ngadep.

¹⁸Sewaktu pare penuntutne nganjeng ngajuang pengaduan ie pade, ie pade ndéq ngajuang sopoq juaq kejahatan maraq saq tiang badéq gen ie pade ajuang.

¹⁹Ie pade cume béde pendapet kance ie mengenai agamene mésaq dait mengenai sopoq dengan saq pesénganne Deside Isa. Dengan nike sampun ninggal, laguq Paulus pagah bahwe dengan nike idup.

²⁰Séngaq tiang bingung berembé entan tiang mauq keterangan mengenai pelekare nike, tiang beketuan léq Paulus napi ie mélé lumbar ojok Yerusalem dait teadilin pelekarene léq derike.

²¹Laguq Paulus tunas taék banding; ie tunas adéq ie tetep ndot léq tahenan jangke pelekarene teputusang siq Kaisar. Keranaq nike tiang préntahang adéq ie tetep tetahen, jangke tiang mauq kesempatan ngirim ie ojok Kaisar.”

²²Terus Raje Agripa bebase léq Pestus, “Tiang mésaq éndah melét dengah dengan nike.” “Jemaq pelungguh bau pirengang ie,” jawab Pestus.

²³Jemaqne Raje Agripa dait Bernike rauh kadu upacare kerajaan. Ie pade tame ruang sidang teiring siq kepale-kepale pasukan dait dengan-dengan saq tehormatin léq kote nike. Siq préntah Pestus, Paulus tejauq tame.

²⁴Terus basen Pestus, “Baginde Agripa dait pare hadirin! Dengan niki sampun teaduang tipaq tiang siq selapuq bangse Yahudi, saq léq Yerusalem, dait saq araq léq deriki. Ie pade nuntut sambil nyurak-nyurak bahwe ie ndéq patut tealurang idup.

²⁵Laguq tiang ndéq ndait sopoq juaq kesalaqan saq sampun ie piaq saq bau tehukum siq hukuman maté. Dait lantaran ie mésaq sampun tunas adéq pelekarene teadilin léq pengadilan Kaisar, tiang sampun mutusang gen ngirim ie ojok Kaisar.

²⁶Laguq tiang ndéqman bedowé keterangan napi-napi saq teges mengenai diriqne jari tetulis léq surat tiang tipaq Kaisar. Keranaq nike tiang jauq ie ojok arepan pelungguh senamian, terutame gati tipaq Raje Agripa! Maksut tiang adéq sesampun pemeriksaan niki, tiang bau nulis sopoq laporan.

²⁷Séngaq menurut pendapet tiang, ndéqne pantes ngirim sopoq tahenan lamun ndéq jelas kesalaqan-kesalaqan saq tetuduhang tipaq ie.”