Read KITAB SUCI ZABUR INJIL KISAH RASUL-RASUL 27 Bible Online

KISAH RASUL-RASUL 27 - KITAB SUCI ZABUR INJIL bible

KISAH RASUL-RASUL 27

¹Sesampun teputusang bahwe tiang pade harus belayar ojok Italia, Paulus dait pire dengan tahenan saq lain teserahang ojok Yulius, prewire pasukan tentere Roma saq tesebut “Pasukan Kaisar”.

²Tiang pade taék ojok kapal saq dateng léman Adramitium, beterus berangkat kadu kapal nike saq sampun siep belayar ojok pelabuan-pelabuan léq propinsi Asia. Aristarkus, dengan Makedonia saq dateng léman Tesalonika, belayar éndah bareng kance tiang pade.

³Jemaqne tiang pade dateng léq Sidon. Paulus teperlakuang secare bagus gati siq Yulius. Ie teijinang jangoq batur-baturne adéq ie pade iniq ngebéng napi saq ie perluang.

⁴Léman derike tiang pade belayar malik. Séngaq angin dateng belainan arah kance kapal, tiang pade terus belayar bedurus léq pesisi pulao Siprus.

⁵Beterus tiang pade babar segare saq berandangan kance Kilikia dait Pampilia terus dateng léq Mira léq negeri Likia.

⁶Léq derike prewire nike ndait sopoq kapal léman Aleksandria saq mélé belayar ojok Italia. Beterus ie alih tiang pade ojok kapal nike.

⁷Pire jelo ngonéqne, tiang pade belayar adéng gati, dait sengke gati tiang pade belayar jangke bau dateng dékét kote Knidus. Séngaq angin masih doang ndéq bagus, tiang pade ndéq bau belayar ojok jurusan semule. Make tiang pade belayar ojok lauq pulao Kreta langan Tanjung Salmone.

⁸Sengke gati tiang pade belayar bedurus léq pesisi pulao nike, ahirne tiang pade dateng léq sopoq taoq aranne Pelabuan Indah, ndéqne jaoq léman kote Lasea.

⁹Waktu nike Jelo Puase dengan Yahudi sampun liwat. Tiang pade sampun luwéq bisang waktu sie-sie, sehingge ndéq aman malik jari belayar. Keranaq nike Paulus peringet ie pade,

¹⁰“Semeton-semeton, menurut pendapet tiang, gen bahaye gati lamun ite belayar terus. Ite gen ngalamin kerugian beléq ndéqne cume léq muatante dait kapalte, laguq nyawente éndah gen celake.”

¹¹Laguq prewire nike lebih percaye léq jurumudi dait kapten kapal nike ketimbang ucapan-ucapan Paulus.

¹²Pelabuan léq derike mule ndéq bagus jari taoq ndot kapal-kapal sengonéq musim telih. Keranaq nike luwéqan anak buah kapal setuju belayar malik bilin pelabuan nike séngaq ie pade mélé berusahe adéq bau dateng léq Peniks dait ndot léq derike sengonéq musim telih. Peniks nike sopoq pelabuan léq Kreta saq andang bat daye dait bat lauq.

¹³Léq waktu nike dateng angin léman lauq adéng-adéng. Anak buah kapal nike laporan ie pade gen bau belayar malik. Jari ie pade ngangkat jangkar terus belayar bedurus léq pesisi pulao Kreta.

¹⁴Laguq ndéq ngonéq sesampun nike, dateng angin beléq gati -- nike angin saq tesebut angin Timuq Segare -- keras gati dateng léman darat,

¹⁵dait ngampes kapal tiang pade. Keranaq nike ndéq mungkin kapal nike belayar terus ngelawan angin, make tiang pade nyerah doang dait ngalurang kapal nike éléh tejauq siq angin.

¹⁶Tiang pade merase aman sekediq waktu tiang pade liwat léq lauq pulao Kauda saq kodéq nike. Léq derike sengke gati tiang pade bau nguasein perau kodéq saq araq léq kapal tiang pade.

¹⁷Sesampun perau kodéq nike tetaékang ojok kapal, terus kapal nike teteguqang kadu tali saq tetaliq ngelingkerin kapal nike. Séngaq takut kesandek léq dasar gerés Sirtis saq dawot, layar teturunang, terus kapal tealurang nurut angin.

¹⁸Angin terus ngamuk, sehingge jemaqne, muatan kapal mulai tetetéh ojok segare.

¹⁹Jelo selanjutne anak buah kapal nike netéh éndah pekakas-pekakas kapal ojok segare kadu imene mésaq.

²⁰Bejelo-jeloan ngonéqne tiang pade ndéq serioq jelo dait bintang, dait angin tetep ngamuk. Ahirne telang harepan tiang pade gen bau selamet.

²¹Pire waktu ngonéqne dengan-dengan nike ndéq bekelor. Beterus Paulus nganjeng léq tengaq-tengaq ie pade dait bebase, “Semeton-semeton! Lamun side pade turut naséhat tiang dait ndéq belayar léman Kreta, ite ndéq ngalamin selapuq saq lengé dait rugi maraq niki.

²²Laguq mangkin sanget siq tiang tunas adéq side pade beléqang angen. Ndéq araq sopoq dengan juaq léman side saq gen ninggal; ite cume gen kélangan kapal niki doang.

²³Séngaq uwiq bian malaékat léman Allah saq tiang sembah, Ie Allah saq dowéang tiang, rauh tipaq tiang.

²⁴Manik malaékat nike, ‘Ndaq takut, Paulus! Séngaq side gen ngadep Kaisar. Dait setetune lantaran rahmat Allah, selapuq dengan saq belayar kance side gen selamet lantaran side.’

²⁵Keranaq nike, semeton-semeton, side pade harus tabah! Séngaq tiang percaye léq Allah bahwe selapuqne gen telaksane maraq saq temanikang tipaq tiang.

²⁶Laguq ite gen kesasar léq sopoq pulao.”

²⁷Léq kelem saq keempat olas tiang pade kenyeke ngompal léq Segare Adria. Kire-kire tengaq kelem anak buah kapal merase kapal kenyeke ngerapetin darat.

²⁸Jari ie pade ngulurang tali saq tegantungin batu jari ngukur dalemne segare. Ternyate taoq nike dalemne petang dase méter kurang sekediq. Ndéq ngonéq sesampun nike, ie pade ngukur malik, dait kire-kire telung dase méter dalemne léq taoq nike.

²⁹Ie pade takut kapal gen kandas léq batu karang, jari ie pade nurunang empat jangkar léman bagian mudi kapal, terus beharep lamun bau becat-becat menah.

³⁰Tedoq-tedoq pare anak buah kapal berusahe pelai léman kapal nike. Ie pade nurunang perau kodéq ojok aiq, maraqne gen nurunang jangkar léman julu kapal.

³¹Laguq Paulus bebase tipaq prewire dait prajurit-prajurit saq léq kapal nike, “Lamun anak buah kapal niki ndéq ndot léq kapal, semeton-semeton selapuqne ndéq gen selamet.”

³²Keranaq nike, prajurit-prajurit nike peleng tali perau kodéq nike, sehingge perau kodéq nike éléh.

³³Léq waktu sendéqman tiwoq jelo, Paulus nganjurang adéq ie pade selapuq bekelor. Paulus bebase, “Sampun empat olas jelo ngonéqne semeton selapuqne cume ngantih-ngantih doang siq rase takut dait ndéq ngelorang napi-napi.

³⁴Tiang nganjurang, bekelor sekediq. Nike solah umaq side pade, adéq side pade kuat malik. Séngaq semeton selapuqne gen selamet dait ndéq kurang napi-napi.”

³⁵Sesampun bebase maraq nike Paulus bait ruti terus ngucapang syukur tipaq Allah léq julu ie pade selapuq. Beterus ie bagi-bagiang ruti nike, dait bekelor.

³⁶Beterus ie pade selapuq besemanget malik dait milu bekelor éndah.

³⁷Selapuq saq araq léq kapal nike araq satak pituq pulu enem dengan.

³⁸Sesampun selapuqne bekelor secukupne, ie pade tetéh muatan gandum ojok segare adéq kapal jari déang.

³⁹Sesampun menah, anak buah kapal serioq daratan, laguq ie pade ndéq taoq daratan napi nike. Ie pade serioq sopoq pulao kodéq kance pesisine. Jari ie pade beniat belabuh léq derike, lamun bau.

⁴⁰Make tali-tali jangkar tepeleng terus jangkar-jangkar nike tealurang ketelep léq segare. Léq waktu nike éndah ie pade ngelepas tali saq naliq kemudi-kemudi. Beterus ie pade taékang layar léq bagian julu kapal adéq angin tiup kapal nike ojok pesisi.

⁴¹Laguq kapal nike kesandek léq dasar gerés. Bagian julune ketalet dait ndéq iniq nguit, dait bagian mudine remuk teampes siq umbak saq keras.

⁴²Prajurit-prajurit léq kapal nike beniat nyematéq selapuq dengan tahenan, séngaq ie pade takut ndaq-ndaq laun araq saq ngonong ojok darat dait pelai.

⁴³Laguq prewire nike segah niat ie pade séngaq ie mélé nyelametang Paulus. Ie suruq selapuq dengan saq tao ngonong nimproh juluan dait ngonong ojok pesisi;

⁴⁴saq lain turut mudi dait betegelan léq papan-papan atao kayuq peleng-pelengan kapal nike. Siq care nike tiang pade selapuq selamet jangke dateng darat.