Read KITAB SUCI ZABUR INJIL KISAH RASUL-RASUL 3 Bible Online

KISAH RASUL-RASUL 3 - KITAB SUCI ZABUR INJIL bible

KISAH RASUL-RASUL 3

¹Léq sopoq jelo Petrus dait Yahya lumbar ojok Gedéng Allah jam telu kebian, nike wayene dengan gen mulai bedo'e.

²Léq derike, léq jebak saq tesebut, “Lawang Solah”, araq sopoq dengan mame saq képaq léman tebijeang. Sebilang jelo dengan nike tejauq ojok derike jari mekir léq dengan-dengan saq tame ojok Gedéng Allah.

³Sewaktu dengan nike serioq Petrus dait Yahya kenyeke tame ojok Gedéng Allah, ie nunas sedekah léq ie pade.

⁴Make Petrus dait Yahya perhatiang ie, beterus Petrus bebase, “Serioq andang tiang pade!”

⁵Beterus dengan nike merhatiang ie pade, siq harepan gen mauq sedekah léman ie pade.

⁶Laguq basen Petrus léq ie, “Tiang tetu-tetu ndéq bedowé képéng. Laguq napi saq araq léq tiang nike gen tiang béng léq side: Siq peséngan Deside Isa Almasih dengan Nazaret nike, silaq lampaq!”

⁷Terus Petrus tegel ime kanan dengan képaq nike dait tulung ie ures. Langsung naén dengan nike dait mate naéne jari kuat.

⁸Terus ie nyelontak nganjeng, dait mulai lampaq ketoq-ketéq. Beterus ie tame ojok Gedéng Allah, sambil lampaq dait nyelontak-lontak dait memuji Allah.

⁹Selapuq dengan serioq ie lampaq dait memuji-muji Allah.

¹⁰Terus ie pade sadar bahwe ie tukang mekir saq biase tokol léq “Lawang Solah” léq Gedéng Allah. Ie pade bengaq gati dait takjub serioq napi saq telaksane léq dengan nike.

¹¹Dengan nike tetep doang turut Petrus dait Yahya. Dait sewaktu ie pade dateng léq sesangkok saq tesebut “Sesangkok Sulaiman”, selapuq dengan ngerimpun ie pade lantaran takjub.

¹²Sewaktu Petrus serioq dengan-dengan nike, ie bebase léq ie pade, “Hai dengan-dengan Israel, kembéq side pade bengaq léq hal niki? Kembéq side pade tetep merhatiang tiang pade? Napi side pade paran dengan niki tao lampaq lantaran tiang pade bedowé kuase, atao lantaran tiang pade taat tipaq Allah?

¹³ Allahne Ibrahim, Ishak, Yakub, Allahne leluhurte, Allah nike sampun ngemulieang Hambe-Ne, Deside Isa. Deside Isa nike saq side pade serahang ojok penguase dait side pade lawan léq arepan Pilatus, sewaktu Pilatus gen bébasang Ie.

¹⁴ Laguq side pade nentang Ie Saq Suci dait Kenaq dait nuntut adéq Pilatus bébasang sopoq dengan tukang nyematéq tipaq side pade.

¹⁵Side pade nyematéq Ie, padahal setetune Ie sumber idup tipaq selapuq dengan. Dait Allah sampun ngidupang Ie malik léman ninggal. Tiang pade sampun nyaksiang mésaq hal nike.

¹⁶Side pade sampun serioq dait nyaksiang napi saq telaksane léq dengan képaq niki. Ie sampun jari kuat dait séhat malik séngaq ie percaye dalem peséngan Deside Isa dait kuase-Ne. Lantaran percaye léq Deside Isa make dengan niki bau séhat malik léq julun side pade selapuq.

¹⁷Semeton-semeton senamian! Mangkin tiang nenaoq bahwe napi saq side pade dait pemimpin-pemimpinde laksaneang tipaq Deside Isa, nike side pade laksaneang séngaq side pade ndéq nenaoq napi saq side pade kenyeke laksaneang.

¹⁸Dait siq care nike telaksane éndah napi saq sampun temanikang siq Allah laéq langan selapuq nabi-nabi-Ne, bahwe Almasih saq tejanjiqang nike harus menderite.

¹⁹Keranaq nike, semeton-semeton senamian, pade tobat léman dose-dosende dait tulak tipaq Allah, adéq Allah ngapus dose-dose side pade,

²⁰adéq Tuhan datengang waktu kelepasan, dait ngutus Deside Isa, saq léman penembéqne tetetepang tipaq side sebagé Almasih.

²¹Almasih harus meneng léq sorge jangke Allah nulakang selapuq-lapuqne, maraq saq temanikang siq Allah langan nabi-nabi saq suci léq jaman laéq.

²² Nabi Musa sampun bebase, ‘Allah, Tuhande gen ngutus tipaq side sopoq nabi léman bangsende mésaq, maraq Ie ngutus tiang. Side harus dengah selapuq saq tesampéang siq nabi nike tipaq side.

²³ Dengan saq ndéq perhatiang napi saq tesampéang siq nabi nike, dengan nike gen tesingkirang léman dengan-dengan saq tehususang bagi Allah dait tebinaseang.’

²⁴Nabi-nabi saq sampun nyampéang berite léman Allah, mulai léman nabi Samuel, dait nabi-nabi lainne saq dateng mudian, selapuqne beriteang mengenai jaman niki.

²⁵ Janji-janji léman Allah saq tesampéang siq nabi-nabi, nike umaq side pade. Dalem perjanjian saq Allah piaq kance leluhurde, Allah bemanik tipaq Ibrahim maraq niki, ‘Léman keturunande Tiang gen ngebéng berkah tipaq selapuq bangse léq gumi.’ Perjanjian nike umaq side pade éndah.

²⁶Jari, umaq side penembéqne Allah ngidupang Hambe-Ne dait ngutus Ie tipaq side, adéq Ie ngicanin side pade berkah siq care miaq side pade sopoq-sopoq bebalik léman selapuq kejahatan side pade.”