Read KITAB SUCI ZABUR INJIL KISAH RASUL-RASUL 9 Bible Online

KISAH RASUL-RASUL 9 - KITAB SUCI ZABUR INJIL bible

KISAH RASUL-RASUL 9

¹ Léq waktu nike Saulus terus doang beniat ngancem dait nyematéq pengiring-pengiring Junjungan Saq Mulie Deside Isa. Ie lumbar ojok Imam Agung,

²dait ie tunas surat kuase jari tejauq ojok balé-balé ibadah dengan Yahudi léq kote Damsyik, adéq lamun léq derike ie ndait dengan-dengan saq turut Langan saq tepetitoqang siq Junjungan Saq Mulie nike, ie bau dait jauq ie pade ojok Yerusalem.

³Léq tengaq kelampan ojok Damsyik, sewaktune sampun rapet léq kote nike, selung-selung araq sinar léman langit becahaye léq sekiter Saulus.

⁴Ie rebaq léq tanaq terus dengahne suare saq bemanik tipaq ie, “Saulus, Saulus! Kembéq side nganiaye Tiang?”

⁵“Sai Pelungguh, Tuan?” Saulus metakén. Jawab suare nike, “Tiang niki Isa, saq side aniaye.

⁶Laguq mangkin side ures dait tame ojok kote. Léq derike side gen tebadaq napi saq harus side laksaneang.”

⁷Dengan-dengan saq milu kance Saulus tinjot jangke ie pade kemomotan; séngaq ie pade dengah suare nike, laguq ndéqne serioq sopoq dengan juaq.

⁸Beterus Saulus nganjeng, dait bukaqne penentengne, laguq penentengne ndéqne bau serioq napi-napi malik. Make ie pade tegel ime Saulus dait déndénne tame ojok Damsyik.

⁹Telu jelo ngonéqne ie ndéq tao nyerioq dait sengonéq nike ie ndéq bekelor atao nginem.

¹⁰Léq Damsyik araq sopoq dengan pengiring Deside Isa aranne Ananias. Dalem sopoq penyerioqan, Junjungan Saq Mulie bemanik léq ie, “Ananias!” Jawab Ananias, “Niki tiang, Junjungan Saq Mulie.”

¹¹Junjungan Saq Mulie bemanik, “Silaq berangkat mangkin. Lumbar ojok baléne Yudas léq langan saq aranne Langan Lomboq. Ketuanang léq derike dengan saq aranne Saulus saq asalne léman kote Tarsus. Dengan nike kenyeke bedo'e,

¹²dait léq dalem sopoq penyerioqan ie serioq sopoq dengan mame, aranne Ananias, dateng tipaq ie dait noloq imene léq atasne adéqne tao nyerioq malik.”

¹³Jawab Ananias, “Junjungan Saq Mulie, tiang sampun dengah luwéq dengan bebaos mengenai dengan nike, terutame mengenai penganiayean-penganiayean saq ie piaq tipaq dengan-dengan saq tehususang bagi Allah saq ndot léq Yerusalem.

¹⁴Dait mangkin ie sampun dateng ojok deriki siq wewenang penoq léman imam-imam kepale jari bau selapuq dengan saq percaye léq Deside.”

¹⁵Laguq Junjungan Saq Mulie bemanik léq Ananias, “Silaq lumbar doang! Séngaq Tiang sampun miléq ie jari ngelayanin Tiang, adéq ie ngabarang mengenai Tiang tipaq bangse-bangse lain dait tipaq raje-raje dait tipaq dengan-dengan Israel éndah.

¹⁶Dait Tiang mésaq gen nyatayang léq ie selapuq penderitean saq gen ie terimaq lantaran Tiang.”

¹⁷Make Ananias éndah lumbar ojok balé nike, dait toloq imene léq atas Saulus, terus bebase, “Semeton tiang Saulus, Junjungan Saq Mulie Deside Isa saq side serioq léq tengaq langan sewaktu side kenyeke ojok deriki, Ie saq manikang tiang dateng adéq side tao nyerioq malik, dait tekuasein siq Roh Suci.”

¹⁸Waktu nike éndah araq maraq ruen sisik empaq geriq léman penenteng Saulus, dait ie bau nyerioq malik. Make ie ures, terus tebaptis.

¹⁹Dait sesampun bekelor, ie jari kuat malik. Saulus ndot léq Damsyik kance pengiring-pengiring Deside Isa pire jelo ngonéqne.

²⁰Ie langsung lumbar ojok balé-balé ibadah dait mulai beriteang bahwe Deside Isa nike Bije saq asalne léman Allah.

²¹Selapuq dengan bengaq dengah Saulus. Ie pade bebase, “Tekan ie saq léq Yerusalem sampun nyematéq selapuq dengan saq percaye léq Deside Isa? Tekan ie dateng ojok deriki siq maksut jari bau dait jauq ie pade tipaq imam-imam kepale?”

²²Laguq Saulus sayan beléq pengaruhne. Bukti-bukti saq ie ajuang mengenai Deside Isa tetu-tetu piaq dengan takjub bahwe Deside Isa nike Almasih, jangke selapuq dengan Yahudi saq ndot léq Damsyik ndéq bau malik nentang ie.

²³ Sesampun liwat pire waktu ngonéqne, dengan-dengan Yahudi besepakat gen nyematéq Saulus.

²⁴Laguq rencane ie pade tetaoq siq Saulus. Kenjelo kekelem dengan-dengan Yahudi nike ngantih léq jebak beléq kote jari nyematéq ie.

²⁵Laguq léq sopoq kelem, pengiring-pengiring Saulus bait ie, terus nurunang ie léman tembok kote kadu sopoq keranjang.

²⁶Saulus lumbar ojok Yerusalem, dait léq derike ie berusahe begabung kance pengiring-pengiring Deside Isa. Laguq dengan-dengan nike takut léq ie, séngaq ie pade ndéq percaye bahwe Saulus tetu-tetu sampun jari pengiring Deside Isa.

²⁷Laguq Barnabas dateng tipaq Saulus, terus jauqne Saulus ojok rasul-rasul. Barnabas nyeriteang léq ie pade berembé Saulus serioq Junjungan Saq Mulie léq tengaq langan, dait berembé Junjungan Saq Mulie bemanik léq ie. Barnabas éndah nyeriteang mengenai berembé wanénne Saulus ngajahang léq Damsyik siq peséngan Deside Isa.

²⁸Jari Saulus ndot bareng ie pade, dait siq bani gati hotbah léq selapuq wilayah Yerusalem siq peséngan Junjungan Saq Mulie.

²⁹Ie éndah bebaos dait bedebat kance dengan-dengan Yahudi saq kadu base Yunani, laguq ie pade berusahe nyematéq Saulus.

³⁰Waktu dengan-dengan percaye saq lainne nenaoq hal nike, ie pade jauq Saulus ojok Kaisarea, beterus kirimne ojok Tarsus.

³¹Sengonéq pire waktu, jemaah léq selapuq Yudea, Galilea, dait Samaria araq dalem keadaan tentrem. Tetulung siq Roh Suci dait takut léq Tuhan, jemaah-jemaah nike sayan kuat dait sayan luwéq.

³²Léq waktu nike Petrus lampaq ngelining dait bejangoq ojok jemaah-jemaah. Léq dalem kelampanne nike ie jangoq dengan-dengan saq tehususang bagi Allah saq ndot léq Lida.

³³Léq derike ie bedait kance sopoq dengan mame aranne Eneas, saq képaq dait ndéqne ures-ures léman petindoqanne baluq taun ngonéqne.

³⁴Petrus bebase léq Eneas, “Eneas, Deside Isa Almasih nyelahang side. Silaq ures, periri petindoqande.” Waktu nike éndah Eneas ures.

³⁵Selapuq penduduk léq Lida dait Saron serioq Eneas, terus ie pade selapuq percaye léq Tuhan.

³⁶Léq Yope araq sopoq dengan nine pengiring Deside Isa aranne Tabita. (Léq dalem base Yunani, aranne Dorkas saq artine mayung.) Ie tetep doang laksaneang hal-hal saq solah dait tulung dengan-dengan miskin.

³⁷Léq waktu nike ie sakit terus ninggal. Sesampun jenazahne tepandiqang, ie tetoloq léq kamar saq léq atas.

³⁸Kote Yope ndéqne jaoq léman Lida. Jari sewaktu pengiring-pengiring Deside Isa léq kote Yope dengah bahwe Petrus araq léq Lida, ie pade ngutus due dengan lumbar ojok Petrus siq pesen niki, “Becat-becat dateng ojok deriki.”

³⁹Petrus langsung ures dait turut ie pade. Sesampun dateng léq derike, ie tejauq ojok kamar saq léq atas. Selapuq bebalu léq derike keriwung Petrus sambil nangis dait petitoqangne léq ie kelambi-kelambi dait jubah-jubah saq tejaitang siq Dorkas waktu ie masih idup.

⁴⁰Petrus suruq ie pade selapuq sugul, terus ie sujut dait bedo'e. Sesampun nike ie serioq andang jenazah Dorkas, dait bebase, “Tabita, ures!” Make Dorkas bukaq penentengne, dait waktu ie serioq Petrus, ie tokol.

⁴¹Beterus Petrus tegel imene dait tulung ie nganjeng. Sesampun nike Petrus ngempoh dengan-dengan percaye léq derike bareng kance bebalu-bebalu nike, terus serahangne Dorkas saq sampun idup nike léq ie pade.

⁴²Kabar mengenai peristiwe nike nyebar ojok selapuq wilayah Yope, sehingge luwéq dengan percaye léq Junjungan Saq Mulie.

⁴³Petrus ndot léq derike pire jelo malik léq balé sopoq tukang kulit aranne Simon.