Read KITAB SUCI ZABUR INJIL ROMA 1 Bible Online

ROMA 1 - KITAB SUCI ZABUR INJIL bible

ROMA 1

¹Semeton senamian saq araq léq Roma, saq tekasihin siq Allah dait saq sampun tepiléq jari dengan-dengan saq tehususang bagi Allah. Tiang, Paulus, sampun tepiléq siq Allah jari rasul-Ne dait éndah nyampéang Kabar Solah léman Allah.

²Kabar Solah nike sampun tejanjiqang siq Allah léq jaman laéq langan perantarean nabi-nabi-Ne dait sampun tetulis léq Kitab Suci.

³Kabar Solah nike mengenai Bije-Ne, Junjungante Saq Mulie Deside Isa Almasih. Secare manusie Deside Isa nike keturunan Daud,

⁴laguq secare ilahi Deside Isa nike setetune Bije saq asalne léman Allah. Hal nike tenyatayang léman kuase saq luar biase sewaktu Deside Isa idup malik léman ninggal.

⁵Langan Deside Isa éndah Allah ngicanin tiang paice dait jabatan rasul jari bimbing selapuq bangse adéq ie pade percaye dait taat tipaq Bije saq asalne léman Allah adéq peséngan-Ne temulieang.

⁶Saq temaksut selapuq bangse nike, lantong side pade saq araq léq Roma; séngaq side pade éndah sampun temanikang jari dowén Deside Isa Almasih.

⁷Nike lantaranne tiang nulis tipaq side pade. Semoge Allah Bapante dait Junjungante Saq Mulie Deside Isa Almasih, ngicanin rahmat dait damé sejahtere tipaq side pade.

⁸Pertame-tame, langan Deside Isa Almasih, tiang ngucapang syukur léq Allah lantaran semeton-semeton senamian; séngaq seantéro dunie sampun dengah bahwe side pade tetu-tetu percaye léq Almasih.

⁹Tiang tetep inget léq side pade lamun tiang bedo'e. Allah jari saksi bahwe napi saq tiang ucapang niki mule tetu. Ie Allah saq tiang layanin sepenoq angen siq nyampéang Kabar Solah mengenai Bije-Ne.

¹⁰Tiang tunas léq Allah mudah-mudahan mangkin tiang teijinang dateng tipaq side pade.

¹¹Séngaq tiang melét gati bedait kance side pade, adéq tiang bau bagiang tipaq side pade paice-paice rohani jari neguqang side pade.

¹²Maksut tiang, lantaran ite pade-pade sampun bedowé iman léq dalem Deside Isa Almasih, jari ite bau saling hibur dait saling neguqang.

¹³ Semeton senamian, tiang mélé adéq side pade nenaoq bahwe setetune sampun pire kali tiang beniat gen jangoq side pade, laguq araq doang halanganne. Tiang melét adéq léq antare side pade pegawéan tiang araq éndah hasilne maraq pegawéan tiang sampun berhasil léq antare dengan bangse-bangse lain.

¹⁴Séngaq tiang bedowé kewajiban tipaq selapuq bangse: Dengan Yunani atao saq ndéq Yunani, saq sekolah atao saq ndéq sekolah.

¹⁵Keranaq nike tiang éndah melét gati nyampéang Kabar Solah nike tipaq side pade saq araq léq Roma.

¹⁶ Tiang tetu-tetu percaye léq Kabar Solah nike, séngaq Kabar Solah nike kekuatan Allah jari nyelametang selapuq dengan saq percaye; penembéqne dengan Yahudi, beterus dengan bangse-bangse lain éndah.

¹⁷ Séngaq léq dalem Kabar Solah nike Allah nyatayang berembé manusie tejariang kenaq léq arepan-Ne sehingge hubungan manusie kance Allah jari solah malik; hal nike langan beriman léq Allah léman penembéq jangke dateng penutuq. Nike pade maraq saq tetulis léq Kitab Suci, “Dengan saq tejariang kenaq léq arepan Allah sehingge hubunganne kance Allah jari solah malik, ie gen idup siq iman!”

¹⁸Léman sorge Allah nyatayang murke-Ne tipaq selapuq dose dait kejahatan manusie, séngaq kejahatan jari penghalang manusie nenaoq kebenaran mengenai Allah.

¹⁹Napi saq bau tetaoq siq manusie mengenai Allah sampun jelas léq dalem até nurani manusie, séngaq Allah mésaq sampun nyatayang hal nike tipaq manusie.

²⁰Léman Allah cipteang dunie, sipat-sipat Allah saq ndéq penggitan, keadaan-Ne sebagé Allah dait kuase-Ne saq kekel, sampun bau tepahamin siq manusie langan selapuq saq sampun tecipteang. Jari, manusie tetu-tetu ndéq bedowé alasan napi juaq jari ndéq kenal kance Allah.

²¹ Manusie nenaoq Allah, laguq manusie ndéq mulieang Ie sebagé Allah, dait ndéqne éndah besyukur tipaq Allah. Sebalikne, até ie pade saq bodo sampun jari peteng.

²²Ie pade merase diriqne bijaksane, padahal setetune bodo.

²³ Nénten Allah saq kekel saq ie pade sembah, laguq tetato-tetato saq ruene maraq mahluk saq bau maté, misalne: Manusie, kedit, binatang saq benaé empat dait binatang saq ngumang.

²⁴Keranaq nike Allah menengang ie pade tekuasein siq keméléq angen ie pade jari gawéq saq bejat. Sehingge ie pade piaq hal-hal saq merilaq léq sepadene mésaq.

²⁵Séngaq ie pade gentiq kebenaran Allah siq duste dait mulieang serte nyembah mahluk, siq ngelupaqang Penciptene saq harus tepuji selaéq-laéqne, amin.

²⁶Séngaq manusie ngelaksaneang hal saq maraq nike, jari Allah menengang ie pade turut napsune saq hine. Dengan-dengan nine léq antare ie pade ndéqne berangen malik léq dengan mame maraq saq biase léq manusie, laguq malahan berangen kance sepade ninene.

²⁷Dengan mame éndah maraq nike; ie pade ndéqne malik secare wajar berubungan kance dengan nine, laguq birahi léq sepade mamene. Dengan mame gawéq perbuatan saq merilaq tipaq sepade mamene, sehingge ie pade nerimaq pembalesan saq setimpal kance perbuatan ie pade saq jahat nike.

²⁸Séngaq manusie ndéq merase perlu nenaoq Allah, make Allah menengang pikiran ie pade jari séde sehingge ie pade ngelaksaneang hal-hal saq ndéq kanggo telaksaneang.

²⁹Pikiran ie pade penoq siq selapuq hal saq jahat, saq ndéq kenaq; penoq siq keserakahan, lengé angenne, penoq siq dengki, napsu mélé nyematéq, besiaq, nipu dait dendem, ndéqne peduli léq Tuhan,

³⁰ie pade demen nyumpaq, tukang pitnah, sombong dait kurang ajar, meriq léq Allah. Ie pade ceket gati boyaq care-care baru jari miaq kejahatan, ngelawan dengan toaq.

³¹Ie pade ndéq bedowé akal budi, ndéq setie dait ndéq bedowé belas kasihan.

³²Ie pade nenaoq bahwe menurut hukum Allah, dengan saq ngelaksaneang selapuq hal nike patut tehukum maté, laguq timaq maraq nike ie pade tetep ngelaksaneang éndah hal-hal nike; dait malahan ie pade setuju lamun dengan lain éndah ngelaksaneang hal nike.