Read KITAB SUCI ZABUR INJIL ROMA 10 Bible Online

ROMA 10 - KITAB SUCI ZABUR INJIL bible

ROMA 10

¹Semeton senamian! Tiang melét gati adéq bangse tiang éndah teselametang. Dait tiang tetu-tetu do'eang ie pade tipaq Allah.

²Tiang bau ngebéng kesaksian bahwe setetune ie pade semanget gati ngawule léq Allah. Laguq semangetne nike ndéq tedasarang siq pengertian saq kenaq.

³Ie pade ndéq nenaoq berembé adéqne jari kenaq léq arepan Allah sehingge hubungan ie pade kance Allah jari solah malik. Dait lantaran ie pade cume boyaq siq carene mésaq adéqne jari kenaq léq arepan Allah, lantaran hal nike ie pade ndéq patuh léq care saq teicanin siq Allah saq jariang manusie kenaq léq arepan-Ne.

⁴Séngaq Almasih nike tujuan léman Hukum Taurat. Jari, sebilang dengan saq percaye tipaq Almasih tejariang kenaq léq arepan Allah.

⁵ Tetulis siq Musa bahwe dengan saq tejariang kenaq léq arepan Allah sehingge hubunganne kance Allah jari solah malik atas dasar Hukum Taurat, “Dengan nike gen idup siq ketaatanne léq Hukum Taurat nike.”

⁶ Laguq dengan saq tejariang kenaq léq arepan Allah langan iman tipaq Allah, dalem Kitab Suci tetulis maraq niki, “Ndaq side bebase léq dalem angende, ‘Sai saq gen taék ojok sorge?’ (artine jauq Almasih turun),

⁷atao, ‘Sai saq gen turun ojok jurang maut?’ (artine saq ngangkat Almasih taék léman ninggal).”

⁸Maksutne maraq niki, “Berite léman Allah nike rapet gati léq side; léq biwihde dait dalem aténde.” Nike berite léman Allah mengenai iman saq tiang sebarang.

⁹Séngaq lamun side ngaku kadu biwihde bahwe, Deside Isa nike Junjungan Saq Mulie, dait percaye léq dalem aténde bahwe Allah sampun ngidupang Deside Isa Almasih léman ninggal, make side gen selamet.

¹⁰Séngaq siq aténe dengan percaye sehingge Allah nerimaq ie jari dengan saq tejariang kenaq léq arepan Allah sehingge hubunganne kance Ie jari solah malik. Dait siq biwihne dengan ngaku dait ie gen teselametang.

¹¹ Léq dalem Kitab Suci tetulis, “Dengan saq percaye léq Ie ndéq gen teperilaq.”

¹²Nike berlaku tipaq selapuq dengan, séngaq ndéq araq bédene antare dengan Yahudi kance dengan bangse-bangse lain. Allah saq sopoq nike, Tuhan umaq selapuq dengan. Ie ngicanin berkah saq belimpah-limpah tipaq selapuq dengan saq nunas léq Ie. Séngaq dengan Yahudi atao dengan bangse-bangse lain ndéq araq bédene. Tuhan saq pade umaq selapuq manusie, Ie ngicanin berkah saq belimpah-limpah tipaq selapuq dengan saq tunas léq Ie.

¹³ Dalem Kitab Suci tetulis, “Selapuq dengan saq ngempoh peséngan Tuhan gen teselametang.”

¹⁴Laguq berembé dengan bau ngempoh Ie lamun ie pade ndéq percaye? Dait berembé ie pade bau percaye léq Ie lamun ie pade ndéqman dengah berite mengenai Ie? Terus berembé ie pade bau dengah berite mengenai Ie lamun ndéq araq dengan saq nyampéang tipaq ie pade?

¹⁵ Dait berembé dengan bau nyampéang berite mengenai Ie lamun ie pade ndéq teutus? Léq dalem Kitab Suci tetulis maraq niki, “Berembé solahne kedatengan dengan-dengan saq jauq Kabar Solah!”

¹⁶ Laguq ndéqne selapuq dengan Yahudi nerimaq Kabar Solah nike. Séngaq maraq basen Yesaya, “Tuhan, sai saq percaye léq berite saq tiang sampéang niki?”

¹⁷Keranaq nike, dengan-dengan jari beriman séngaq ie pade dengah berite. Dait berite nike tedengah séngaq araq dengan saq nyampéang manik Almasih.

¹⁸ Laguq tiang beketuan: Napi tetu ie pade ndéqman dengah berite nike? Pasti sampun! Séngaq araq tetulis léq Kitab Suci, “Suare ie pade sampun kedengahan ojok seantéro dunie, napi saq ie pade sampéang sampun dateng ojok poton dunie.”

¹⁹ Tiang beketuan malik: Napi bangse Israel ndéqman nenaoq? Penembéqne Musa bebase, “Allah bemanik maraq niki, ‘Tiang gen miaq side jari talon até tipaq bangse-bangse saq ndéqne bangse Israel. Dait tiang gen miaq side pade sili léq sopoq bangse saq bodo.’ ”

²⁰ Yesaya sayan bani malik bebase, “Maraq niki Manik Allah, ‘Dengan-dengan saq ndéq boyaq Tiang, ie pade sampun bedait kance Tiang; dait Tiang nyatayang diriq Tiang tipaq ie pade saq ndéq ngetuanang Tiang.’ ”

²¹Laguq mengenai bangse Israel, Yesaya bebase, maraq niki Manik Allah, “Sejeloan Tiang ngulurang imen Tiang tipaq sopoq bangse saq pagah dait ndéq taat.”