Read KITAB SUCI ZABUR INJIL ROMA 11 Bible Online

ROMA 11 - KITAB SUCI ZABUR INJIL bible

ROMA 11

¹ Tiang beketuan: Napi Allah sampun nolaq Israel, umat-Ne mésaq? Pasti ndéq! Tiang mésaq dengan Israel, keturunan Ibrahim dait léman suku Benyamin.

²Allah nénten nolaq Israel saq sampun Ie piléq léman semule. Side pade nenaoq napi saq tetulis léq Kitab Suci mengenai Elia sewaktu ie tunasang tipaq Allah mengenai Israel. Elia matur,

³ “Tuhan, selapuq nabi Deside sampun ie pade matéq, selapuq méje-méje taoq kurban Deside sampun teancurang. Mangkin karing tiang doang saq masih idup, laguq ie pade gen matéq tiang éndah.”

⁴ Napi jawaban Allah tipaq Elia? Manik Allah, “Sampun Tiang adéqang pituq iyu dengan umaq Tiang mésaq. Ie pade ndéq uwah nyembah Déwe Baal.”

⁵Maraq nike éndah mangkin niki: Araq sise dengan saq tepiléq siq Allah lantaran rahmat-Ne.

⁶Allah miléq lantaran rahmat-Ne, dait ndéq lantaran perbuatan manusie; séngaq lamun Allah miléq lantaran perbuatan manusie, make rahmat Allah nike ndéqne rahmat saq sejati.

⁷Jari, berembé? Israel ndéq mauq napi saq ie pade boyaq. Saq mauq cume dengan-dengan saq sampun tepiléq siq Allah, saq lain selapuq jari pagah.

⁸ Séngaq dalem Kitab Suci tetulis maraq niki, “Allah miaq até dait pikiran ie pade jari bebel; dait dateng mangkin penenteng ie pade ndéq tao nyerioq dait kentok ie pade ndéq tao dedengah.”

⁹ Basen Daud éndah, “Alurang jamuan-jamuan saq ie pade piaq jari jeret dait perangkep, penghalang dait balesan tipaq diriqne mésaq.

¹⁰Alurang penenteng ie pade jari peteng adéq ie pade ndaq nyerioq; dait alurang ie pade jari bongkok selaéq-laéqne.”

¹¹Tiang beketuan malik: Sewaktu ie pade kedampes, napi ie pade harus geriq? Pasti ndéq! Laguq lantaran ie pade bedose, make bangse-bangse lain malahan teselametang, sehingge ie pade jari talon até tipaq bangse-bangse lain nike.

¹²Lantaran pelanggaran ie pade berarti kesugihan umaq dunie, dait kegagalan ie pade berarti kesugihan umaq bangse-bangse lain; pasti beléqan malik kesempurnean ie pade.

¹³Laguq mangkin tiang sampéang tipaq side pade, dengan bangse-bangse lain! Sengonéq tiang jari rasul umaq dengan bangse-bangse lain, tiang anggep pegawéan tiang nike sopoq hal saq mulie.

¹⁴Tiang harep pegawéan tiang niki bau nimbulang talon até léq bangse tiang mésaq, adéq siq hal nike tiang bau nyelametang pire dengan léman ie pade.

¹⁵Séngaq lamun ie pade tetolaq siq Allah, hubungan dunie kance Allah tedaméang; lebih-lebih lamun lantaran ie pade teterimaq! Pasti nike maraq dengan ninggal saq idup malik!

¹⁶Lamun sepeleng ruti sebagé hasil saq penembéq nike suci, selapuq ruti nike éndah suci. Dait lamun akah lolo nike suci, make pémpang-pémpangne éndah suci.

¹⁷Separo léman pémpang-pémpang lolo zaitun sampun tepeleng. Dait léq onos pelengan nike tedekung pémpang lolo zaitun saq tiwoq léq taoq saq ndéq keruan. Dait mangkin side pade tedekung ojok derike adéq side pade mauq keloran saq pade léman akah dait kesuburan lolo zaitun nike.

¹⁸Ndaq side pade nyombongang diriq tipaq ie pade saq sampun peleng nike. Side pade harus tetep inget, ndéqne pémpang saq jauq keloran ojok akah, laguq akah saq nungke pémpang.

¹⁹Laguq side pade gen bebase, “Pasti, pémpang-pémpang nike tepeleng adéq tiang pade tedekung léq lolone!”

²⁰Nike mule kenaq. Laguq ie pade tetetéh lantaran ie pade ndéq percaye, sebalikne side pade teterimaq lantaran iman side pade. Keranaq nike ndaq side pade jari sombong lantaran hal nike; sebalikne side pade harus merase takut.

²¹Séngaq lamun Allah ndéq merase sayang jari netéh pémpang-pémpang saq asli nike, ndaq paran Allah ndéq gen merase sayang jari netéh side pade éndah!

²²Keranaq nike, ite nyaksiang berembé solahne dait berembé éndah tegesne Allah. Allah berlaku teges tipaq dengan-dengan saq gawéq dose, laguq Ie ngasihin side pade -- asal side pade tetep idup léq dalem kasih-Ne. Lamun ndéq maraq nike, make side pade éndah gen tepeleng.

²³Dait mengenai pémpang-pémpang saq tepeleng nike, lamun ie pade sadar dait percaye, make ie pade gen teterimaq malik; séngaq Allah bedowé kuase jari dekung ie malik.

²⁴Séngaq lamun side pade sebagé pémpang lolo zaitun saq ndéq keruan taoqne tiwoq sampun tepeleng, dait betentangan kance keadaan side nike, side sampun tedekung léq lolo zaitun saq asli. Pasti solahan malik pémpang-pémpang saq asli, ie pade gen tedekung léq lolone saq mule.

²⁵Semeton-semeton senamian! Tiang harep side pade ndéq anggep diriqde ceket. Tiang melét side pade nenaoq sopoq rahasie: Separo léman dengan Yahudi keras até laguq hal nike gen tahen cume jangke penoq jumlah dengan bangse-bangse lain saq dateng.

²⁶ Siq care saq pade dengan Yahudi gen teselametang. Séngaq araq tetulis léq dalem Kitab Suci, “Pembébas gen rauh léman Sion; Ie gen netéh selapuq kejahatan léman keturunan Yakub.

²⁷ Tiang piaq perjanjian nike kance ie pade léq waktu Tiang ngapus dose-dose ie pade.”

²⁸Mengenai Kabar Solah, dengan Yahudi ndéq nerimaq hal nike, make ie pade jari musuh Allah lantaran side pade; mengenai piléqan Allah, Allah tetep ngasihin ie pade demi leluhur ie pade.

²⁹Séngaq Allah ndéq nyesel léq paice dait piléqan-Ne.

³⁰Laéq, side pade ndéq taat tipaq Allah. Laguq mangkin, Allah sampun nyatayang rahmat-Ne lantaran dengan Yahudi ndéq taat.

³¹Maraq nike éndah mangkin dengan Yahudi ndéq taat tipaq Allah adéq siq rahmat saq side pade terimaq léman Allah, ie pade nerimaq rahmat Allah.

³²Séngaq Allah menengang selapuq umat manusie tekuasein siq ndéq taat, adéq Allah bau nyatayang rahmat-Ne tipaq selapuq manusie.

³³ Luar biase gati kesugihan Allah, kebijaksanean dait pewikanan-Ne! Sai saq bau selidik keputusan-keputusan Allah? Sai saq bau ngerti langan-langan Allah?

³⁴ Dalem Kitab Suci tetulis maraq niki, “Sai saq nenaoq pikiran Tuhan? Sai saq bau naséhatin Tuhan?

³⁵ Sai saq sampun ngaturin tipaq Tuhan sehingge ie bau nuntut balesan-Ne?”

³⁶ Allah saq cipteang selapuqne. Selapuqne asalne léman Allah, dait selapuqne nike bagi Allah. Pade mulieang Allah selaéq-laéqne! Amin.