Read KITAB SUCI ZABUR INJIL ROMA 13 Bible Online

ROMA 13 - KITAB SUCI ZABUR INJIL bible

ROMA 13

¹Sebilang dengan harus tunduk léq pemréntah, séngaq ndéq araq pemréntah saq ndéq berasal léman Allah. Dait pemréntah saq araq tetentuang siq Allah.

²Keranaq nike dengan saq ngelawan pemréntah pade maraq dengan saq ngelawan napi saq sampun tetetepang siq Allah. Dait dengan saq piaq maraq nike gen mauq hukuman.

³Séngaq dengan saq perbuatanne solah ndéqne perlu takut léq pemréntah. Cume dengan saq perbuatanne jahat doang saq takut. Lamun side pade mélé ndéq merase takut léq pemréntah, side pade harus ngelaksaneang hal saq solah, make side pade gen tepuji siq pemréntah.

⁴Séngaq pemréntah nike pelayan Allah saq begawéan jari kesolahan side pade. Laguq lamun perbuatan side pade jahat, mule side pade harus takut léq pemréntah séngaq ndéqne sie-sie pemréntah nike bekuase jari ngukum dengan. Pemréntah nike pelayan Allah saq balesang murke Allah tipaq dengan-dengan saq gawéq kejahatan.

⁵Keranaq nike side pade harus tunduk léq pemréntah -- ndéqne cume lantaran murke Allah, laguq éndah lantaran até nurani.

⁶ Nike éndah alasanne kembéq side pade bayah pajek, séngaq pemréntah nike pegawé-pegawé saq tepercaye siq Allah jari ngelaksaneang tugas saq husus.

⁷Béng tipaq selapuq dengan saq patut side béng: Bayah pajek side pade lamun side pade tewajibang bayah, dait bayah dudukan lamun side pade tewajibang bayah dudukan. Takut léq dengan saq patut tetakutang dait hormatin dengan saq patut tehormatin.

⁸Ndaq berutang napi juaq léq sai-sai, laguq side pade harus saling kasihin sopoq kance lainne. Séngaq dengan saq ngasihin sepadene manusie, ie sampun sepenoqne ngelaksaneang Hukum Taurat.

⁹ Préntah-préntah nike: Ndaq bezinah, ndaq nyematéq, ndaq memaling, ndaq melét napi saq teépéang siq dengan lain; dait selapuq préntah-préntah lainne sampun tesimpulang jari sopoq hukum, “Kasihin sepadende manusie maraq side pade ngasihin diriqde.”

¹⁰Dengan saq ngasihin sepade manusie ndéqne gen gawéq kejahatan léq sepadene. Jari dengan saq ngasihin sepade manusie, ie sampun sepenoqne ngelaksaneang Hukum Taurat.

¹¹Laksaneang selapuq hal nike, dait ngerti keadaan mangkin, bahwe sampun wayene side pade ures léman tindoq. Séngaq keselametante sampun rapet tebanding waktu ite baruq percaye.

¹²Kelem gen liwat dait seberaq malik gen jari menah. Keranaq nike silaq ite engkah gawéq perbuatan-perbuatan saq jahat. Ite harus kadu perlengkapan senjate terang.

¹³Ite harus gawéq hal-hal saq solah maraq saq biase tegawéq siq dengan kenaq; ndaq beseneng-seneng jangke liwat bates atao, bowos-bowosan. Ndaq gawéq perbuatan saq cabul dait ndaq turut keméléq hawe napsu. Dait ndaq besiaq atao talon até.

¹⁴Laguq kadu Junjungan Saq Mulie Deside Isa Almasih sebagé perlengkapan senjate terang. Dait ndaq turut keméléq awak saq bedose jari muasang hawe napsu.