Read KITAB SUCI ZABUR INJIL ROMA 15 Bible Online

ROMA 15 - KITAB SUCI ZABUR INJIL bible

ROMA 15

¹Ite saq kuat imanne harus sabar léq kelemahan dengan saq lemah keyakinanne. Ndaq ite cume nyenengang diriqte mésaq.

²Sebalikne sebilang dengan léq antare ite harus nyenengang angen sepadente demi kesolahanne jari neguqang imanne.

³ Séngaq Almasih mésaq nénten mikirang diriq-Ne mésaq. Léq Kitab Suci tetulis maraq niki, “Selapuq penghinean saq ie pade tujuang tipaq Deside, sampun nimpe tiang.”

⁴Selapuq saq tetulis léq Kitab Suci mule tetulis jari ngajah ite, adéq siq ketekunan dait penghiburan saq araq léq tulisan-tulisan nike ite mauq pengharepan.

⁵Semoge Allah sumber ketekunan dait penghiburan nulung side pade jari idup dalem kerukunan sesuai kance pekayunan Deside Isa Almasih.

⁶Sehingge siq sopoq angen dait sopoq suare, side pade selapuq ngemulieang Allah, Bapa Junjungante Saq Mulie Deside Isa Almasih.

⁷Keranaq nike side pade wajib saling nerimaq pade éndah maraq Almasih nerimaq side pade jari ngemulieang Allah.

⁸Séngaq, pade inget bahwe Almasih sampun ngelayanin dengan Yahudi demi kebenaran Allah dait jari ngukuhang janji-janji-Ne tipaq leluhurte.

⁹ Adéq dengan bangse-bangse lain éndah ngemulieang Allah lantaran rahmat-Ne tipaq ie pade. Léq dalem Kitab Suci tetulis maraq niki, “Keranaq nike tiang gen mulieang Deside léq antare bangse-bangse, tiang gen nyanyiang Zabur umaq peséngan Deside.”

¹⁰ Araq éndah tetulis maraq niki, “Pade begembire bareng umat-Ne, hai bangse-bangse!”

¹¹ Dait niki éndah, “Pade puji Tuhan, selapuq bangse-bangse! Selapuq dengan pade puji Ie!”

¹² Dait niki éndah saq teucapang siq Yesaya, “Gen muncul sopoq dengan léman keturunan Isai, saq gen mréntah selapuq bangse-bangse; tipaq Ie bangse-bangse gen beharep.”

¹³Semoge Allah, sumber pengharepan nike, penoqin angen side pade siq sukecite dait damé sejahtere séngaq side pade percaye léq Ie dait siq kuase Roh Suci side pade gen sayan kuat, belimpah-limpah siq pengharepan.

¹⁴Semeton-semeton senamian! Tiang yakin bahwe araq luwéq gati hal saq solah léq side. Side pade sampun nenaoq selapuq-selapuqne dait bau saling ajah sopoq kance lainne.

¹⁵Laguq léq hal tertentu, léq dalem surat niki tiang peringet side pade secare teges, lantaran rahmat saq sampun teicanin léq tiang.

¹⁶Allah sampun ngutus tiang jari pelayan Deside Isa Almasih tipaq dengan bangse-bangse lain, tiang nyampéang Kabar Solah léman Allah tipaq ie pade adéq ie pade bau teterimaq siq Allah jari persembahan saq husus dait tesuciang siq Roh Suci.

¹⁷Jari, léq dalem Deside Isa Almasih tiang merase bangge gati siq pelayanan tiang tipaq Allah niki.

¹⁸Tiang ndéq bani ngeraosang saq lain kecuali napi saq sampun tepiaq siq Almasih langan diriq tiang, tugas tiang bimbing dengan bangse-bangse lain adéqne taat léq Allah langan ucapan-ucapan dait perbuatan-perbuatan tiang.

¹⁹Langan keajaipan-keajaipan saq luar biase éndah selapuqne nike telaksane siq kuase Roh Suci. Kabar Solah mengenai Almasih sampun tiang sampéang tipaq dengan-dengan mulai léman Yerusalem dateng Ilirikum.

²⁰Tiang anggep sebagé kehormatan nyampéang Kabar Solah léman Allah léq taoq-taoq léq mbé dengan-denganne ndéqman dengah mengenai Almasih. Séngaq tiang ndéq mélé begawéan léq dasar saq sampun tetoloq siq dengan lain.

²¹ Araq tetulis léq Kitab Suci, “Dengan-dengan saq ndéq uwah nerimaq berite mengenai Ie, gen serioq; dait ie pade saq ndéq uwah dengah, gen ngerti.”

²² Keranaq nike tiang rimpes gati araq halangan jari jangoq side pade.

²³Laguq mangkin pegawéan tiang léq daérah-daérah nike sampun tutuq. Sampun pire taun ngonéqne tiang melét gati dateng jangoq side pade.

²⁴Laun lamun tiang liwat léq kote side pade dalem kelampan tiang ojok Spanyol, tiang beharep léq derike tiang bedait kance side pade dait beseneng-seneng seberaq kance side pade. Sesampun nike tiang beharep side pade bau nulung tiang jari ngelanjutang kelampan tiang ojok Spanyol.

²⁵ Laguq mangkin tiang kenyeke dalem kelampan ojok Yerusalem jari ngatong sumbangan umaq dengan-dengan saq tehususang bagi Allah saq araq léq Yerusalem.

²⁶Séngaq jemaah-jemaah léq Makedonia dait Akaya sampun setuju jari ngebéng sumbangan tipaq dengan-dengan miskin léq antare dengan-dengan saq tehususang bagi Allah, léq Yerusalem.

²⁷ Seneng gati angen ie pade ngebéng sumbangan nike. Mule sepatutne ie pade nulung semeton-semeton saq miskin léq Yerusalem nike; séngaq léman dengan-dengan Yahudi nike dengan bangse-bangse lain sampun nerimaq berkah léman Allah. Jari, dengan bangse-bangse lain nike patut éndah nulung dengan-dengan Yahudi siq berkah-berkah saq berue barang.

²⁸Lamun tiang sampun nyeleséang tugas niki, dait nyerahang selapuq sumbangan, tiang gen lalo ojok Spanyol dait nyelaloq léq kotende.

²⁹Lamun tiang dateng tipaq side pade, tiang yakin bahwe tiang gen dateng siq penoq berkah Almasih umaq side pade.

³⁰Demi Junjungante Saq Mulie Deside Isa Almasih dait demi kasih Roh Suci, sanget siq tiang tunas léq side pade, semoge side pade bedo'e bareng kance tiang léq arepan Allah mengenai perjuangan tiang.

³¹Do'eang adéq Allah nyelametang tiang léman dengan-dengan saq ndéq percaye saq araq léq Yudea, adéq tugas tiang ngatong sumbangan ojok Yerusalem niki teterimaq secare bagus siq dengan-dengan saq tehususang bagi Allah saq araq léq derike.

³²Siq pekayunan Allah, tiang gen dateng tipaq side pade siq sukecite dait gen merase tehibur léq tengaq-tengaq side pade.

³³Semoge Allah, sumber damé sejahtere gen bareng kance side pade selapuq! Amin.