Read KITAB SUCI ZABUR INJIL ROMA 3 Bible Online

ROMA 3 - KITAB SUCI ZABUR INJIL bible

ROMA 3

¹Lamun maraq nike napi keuntunganne jari dengan Yahudi? Dait napi manpaatne taat tipaq aturan sunat?

²Pasti luwéq gati manpaatne! Penembéqne, séngaq tipaq dengan Yahudi Allah percayeang manik-Ne.

³Laguq berembé lamun separo léman dengan Yahudi ndéq setie léq Allah? Napi lantaran nike Allah jari ndéq setie?

⁴ Tetu-tetu ndéqne maraq nike! Séngaq sampun jelas Allah tetep kenaq timaq selapuq manusie salaq, léq Kitab Suci araq tetulis, “Adéq Deside terbukti kenaq léq selapuq saq Deside manikang, dait Deside menang sewaktu teadilin.”

⁵Laguq lamun kesalaqante nyatayang kebenaran Allah, napi saq mélé ite ucapang malik? Bahwe Allah nénten adil lamun Ie nyatayang murke-Ne? (Mule napi saq teketuanang niki wajar secare manusie.)

⁶Tetu-tetu ndéqne maraq nike! Séngaq lamun Allah nénten adil, berembé Ie bau hakimin dunie niki?

⁷Laguq lamun lantaran perbuatan saq salaq, kebenaran Allah jari sayan nyate sehingge Ie tepuji, kembéq dengan saq piaq kejahatan nike masih tehakimin sebagé dengan saq bedose?

⁸Kembéq ite ndéq kanggo bebase, “Solahan ite piaq hal saq jahat, adéqne timbul hal saq kenaq.” Mule araq dengan-dengan saq pitnah tiang, ie paran tiang ngeraos maraq nike. Dengan-dengan saq maraq nike sepatutne tehukum siq Allah.

⁹Nah, napi kedudukante sebagé dengan Yahudi solahan ketimbang kedudukan bangse lain? Tetu-tetu ndéqne maraq nike! Sampun tiang sampéang bahwe dengan Yahudi dait maraq nike éndah dengan bangse-bangse lain, selapuqne sampun tekuasein siq dose.

¹⁰ Maraq saq tetulis léq dalem Kitab Suci, “Ndéq araq sopoq dengan juaq saq kenaq léq arepan Allah,

¹¹ndéq araq sopoq dengan saq ngerti dait ndéq araq sopoq dengan juaq saq nyembah Allah.

¹²Selapuq dengan sampun jaoqang diriqne léman Allah; selapuqne sampun sesat. Ndéq araq sopoq dengan saq gawéq hal saq solah, timaq sopoq dengan juaq!

¹³ Kerongkongan ie pade maraq kuburan saq ngangaq, tipu muslihat sugul léman élaq ie pade dait biwih ie pade nyebarang pitnah, maraq racun ulah.

¹⁴ Biwih ie pade penoq siq kutukan dait sumpaq senaq.

¹⁵ Naén ie pade becat gati lamun mélé nyiksaq dait nyematéq dengan.

¹⁶Kesusahan dait keancuran, turut ie pade ojok mbé doang ie pade laiq.

¹⁷Ie pade ndéq kenal kance napi nike langan damé,

¹⁸ dait rase takut léq Allah tetu-tetu ndéq araq léq dengan nike.”

¹⁹Mangkin ite nenaoq bahwe selapuq saq tetulis dalem Hukum Taurat nike tetujuang tipaq dengan-dengan saq araq léq bawaq kekuasean hukum nike, jari ndéq araq sopoq dengan juaq saq bau ngebéng alasan napi-napi, dait Allah berhak nuntut selapuq isi dunie niki.

²⁰ Séngaq ndéq sopoq dengan juaq saq bau tejariang kenaq léq arepan Allah, sehingge hubunganne kance Allah jari solah malik lantaran ngelaksaneang Hukum Taurat. Sebalikne hukum nike cume nyatayang tipaq manusie bahwe manusie bedose.

²¹Laguq mangkin ndéqne kadu Hukum Taurat, Allah sampun nyatayang langan berembé manusie tejariang kenaq léq arepan-Ne. Hukum Taurat dait kitab nabi-nabi sampun nyatayang hal nike,

²² bahwe Allah ngicanin langan tipaq manusie berembé tejariang kenaq léq arepan-Ne, cume lamun manusie beriman léq dalem Deside Isa Almasih. Allah piaq hal nike umaq selapuq dengan saq percaye tipaq Almasih. Allah nénten béde-bédeang dengan.

²³Séngaq selapuq dengan sampun bedose dait ndéqne bau dateng ojok kemuliean Allah.

²⁴Laguq cume lantaran rahmat-Ne, Allah jariang manusie kenaq léq arepan-Ne secare cume-cume langan penebusan léq dalem Deside Isa Almasih.

²⁵Allah ngurbanang Deside Isa Almasih, adéq Allah ngalihang murke-Ne léman manusie, dait Deside Isa nanggung hukuman dose-dose manusie. Manusie tejariang kenaq léq arepan Allah lamun ie percaye bahwe Deside Isa Almasih numpahang daraq-Ne dait ngurbanang idup-Ne umaq manusie. Allah piaq maraq nike jari nyatayang keadilan-Ne. Séngaq léq waktu saq laéq Allah sampun sabar tipaq selapuq dose manusie, sehingge Allah nénten hukum ie pade.

²⁶Laguq mangkin, Allah buktiang keadilan-Ne tipaq dose-dose manusie nike, Allah buktiang bahwe diriq-Ne kenaq dait sebilang dengan saq beriman léq dalem Deside Isa Almasih tenyatayang sebagé dengan saq kenaq léq arepan Allah.

²⁷Keranaq nike, ite ndéq bedowé alasan malik jari nyombongang diriq. Kembéq maraq nike? Napi lantaran ite ngelaksaneang saq tetulis dalem Hukum Taurat? Ndéq! Laguq lantaran imante.

²⁸Séngaq kesimpulanne maraq niki: Manusie tenyatayang sampun tejariang kenaq léq arepan Allah sehingge hubunganne kance Allah jari solah malik, ndéqne lantaran ie ngelaksaneang napi saq tetulis dalem Hukum Taurat, laguq lantaran ie beriman léq dalem Deside Isa Almasih.

²⁹Napi Allah nike Allahne dengan Yahudi doang? Napi Ie Allah dengan bangse-bangse lain éndah? Tetu. Mule Ie éndah Allahne dengan bangse-bangse lain!

³⁰ Séngaq Allah cume sopoq. Ie gen jariang kenaq léq arepan-Ne, dengan-dengan Yahudi langan iman dait éndah dengan bangse-bangse lain langan iman.

³¹Napi niki artine bahwe lantaran ite beriman léq dalem Deside Isa Almasih, ite batalang Hukum Taurat? Tetu-tetu ndéqne maraq nike! Malahan siq imante léq dalem Deside Isa Almasih nike, ite ngukuhang hukum nike.