Read KITAB SUCI ZABUR INJIL ROMA 4 Bible Online

ROMA 4 - KITAB SUCI ZABUR INJIL bible

ROMA 4

¹Lamun maraq nike napi pendapet ite mengenai Ibrahim, leluhur bangsente? Berembé pengalamanne?

²Lamun hal-hal saq ie laksaneang miaq ie tejariang kenaq léq arepan Allah sehingge hubunganne kance Allah jari solah malik, make araq éndah alasan Ibrahim jari nyombongang diriqne, laguq ie ndéq bau nyombongang diriqne léq arepan Allah.

³Léq Kitab Suci araq tetulis, “Ibrahim percaye tipaq Allah, dait lantaran percayene nike ie teterimaq siq Allah sebagé dengan saq tejariang kenaq léq arepan Allah.”

⁴Dengan saq begawéan nerimaq upaq dait upaqne nike ndéqne teanggep jari hadiah séngaq nike hakne.

⁵Sebalikne dengan saq ndéq begawéan laguq percaye léq Allah saq bau jariang dengan jahat tejariang kenaq léq arepan-Ne, nike lantaran imanne ndéqne lantaran hasil perbuatanne mésaq.

⁶Pade maraq basen Daud éndah, bahagie dengan saq sampun teterimaq sebagé dengan saq tejariang kenaq léq arepan Allah sehingge hubunganne kance Allah jari solah malik, ndéqne lantaran perbuatanne,

⁷ “Bahagie dengan saq kesalaqanne teampunin dait dose-dosene sampun teapus siq Allah!

⁸Bahagie dengan saq dose-dosene ndéq tetuntut siq Allah!”

⁹Napi ucapan bahagie niki cume tetujuang tipaq dengan-dengan Yahudi doang? Atao tipaq dengan bangse-bangse lain éndah? Sendéqmanne sampun tiang sebut bahwe Ibrahim teterimaq siq Allah sebagé dengan saq tejariang kenaq léq arepan-Ne, séngaq Ibrahim beriman léq Ie.

¹⁰Nah, piran Allah nyatayang hal nike tipaq Ibrahim? Sendéqman atao sesampun Ibrahim tesunat sesuai préntah Allah? Mule sendéqman ie tesunat, ndéqne sesampun ie tesunat.

¹¹ Ie tesunat mudian, dait sunatne nike jari tande bahwe Allah sampun nerimaq ie tejariang kenaq léq arepan Allah, séngaq ie beriman tipaq Allah. Ie teterimaq siq Allah sewaktu ie ndéqman ngelaksaneang sunat saq tepréntahang siq Allah. Dait Ibrahim jari bapaq selapuq dengan percaye saq ndéq besunat, dait ie pade teterimaq siq Allah sebagé dengan saq tejariang kenaq léq arepan-Ne.

¹²Ibrahim éndah bapaq dengan-dengan saq besunat, nike dengan-dengan saq ndéq cume taat tipaq aturan sunat, laguq lantaran ie pade éndah idup beriman tipaq Allah, pade maraq Ibrahim saq beriman sendéqman ie ngelaksaneang sunat saq tepréntahang siq Allah.

¹³ Allah bejanji tipaq Ibrahim dait keturunanne bahwe dunie niki gen jari dowéne. Allah bejanji maraq nike ndéq lantaran Ibrahim taat léq Hukum Taurat, laguq lantaran ie beriman tipaq Allah sehingge ie teterimaq siq Allah sebagé dengan saq tejariang kenaq léq arepan-Ne sehingge hubunganne kance Allah jari solah malik.

¹⁴ Séngaq lamun cume dengan-dengan saq taat tipaq Hukum Taurat doang saq gen nerimaq napi saq tejanjiqang siq Allah, make ndéq araq artine dengan beriman tipaq Allah, dait janji Allah niki éndah batal.

¹⁵Hukum Taurat datengang murke Allah, laguq lamun ndéq araq hukum nike make ndéq gen araq éndah pelanggaran.

¹⁶ Keranaq nike, janji Allah jari dasar dengan beriman tipaq Allah. Hal nike jari jaminan umaq selapuq keturunan Ibrahim. Janji nike teicanin tipaq ie pade langan rahmat léman Allah, ndéq cume jari dengan saq taat tipaq Hukum Taurat doang, laguq umaq ie pade saq beriman tipaq Allah, pade maraq Ibrahim nike sebagé bapaqte selapuq.

¹⁷ Séngaq maraq niki Allah bemanik tipaq Ibrahim, “Tiang sampun jariang side umaq selapuq bangse.” Ibrahim nike bapaqte léq arepan Allah. Dait Ibrahim percaye tipaq Allah. Ie Allah saq ngidupang dengan ninggal, Ie éndah Allah saq cipteang siq manik-Ne napi saq ndéq araq jari araq.

¹⁸ Timaq sampun ndéq araq harepan malik, laguq Ibrahim tetep doang beharep dait percaye. Keranaq nike ie jari bapaq luwéq bangse. Pade maraq saq tetulis dalem Kitab Suci, “Keturunan side gen jari luwéq gati.”

¹⁹ Ibrahim nenaoq léq waktu nike bahwe ie ndéq mungkin malik gen bedowé keturunan, séngaq ragene sampun lingsir gati dait umurne gen satus taun; maraq nike éndah Sarah, sebiniqanne nike bangkol, laguq iman Ibrahim ndéq jari kurang.

²⁰Ie tetep percaye dait ndéq ragu-ragu tipaq janji Allah, malahan imanne jariang ie sayan kuat -- sehingge ie mulieang Allah.

²¹Ie yakin gati bahwe Allah pasti bau ngelaksaneang napi saq sampun Ie janjiqang nike.

²²Keranaq nike Ibrahim teterimaq siq Allah sebagé dengan saq tejariang kenaq léq arepan Allah sehingge hubunganne kance Allah jari solah malik.

²³Manik Allah léq dalem Kitab Suci, “Teterimaq siq Allah sebagé dengan saq tejariang kenaq léq arepan Allah sehingge hubunganne kance Allah jari solah malik,” tetulis ndéq umaq Ibrahim doang,

²⁴laguq umaq ite éndah. Ite éndah gen teterimaq siq Allah sebagé dengan saq tejariang kenaq léq arepan Allah sehingge hubungante kance Allah jari solah malik, séngaq ite percaye tipaq Allah saq ngidupang Junjungante Saq Mulie Deside Isa léman ninggal.

²⁵ Deside Isa niki sampun teserahang jari tematéq lantaran dose-dosente; terus Ie teidupang malik siq Allah adéq ite bau tejariang kenaq léq arepan-Ne sehingge hubungante kance Allah jari solah malik.