Read KITAB SUCI ZABUR INJIL ROMA 5 Bible Online

ROMA 5 - KITAB SUCI ZABUR INJIL bible

ROMA 5

¹Mangkin ite sampun tejariang kenaq léq arepan Allah sehingge hubungante kance Allah jari solah malik lantaran imante. Dait lantaran nike ite bedowé damé sejahtere kance Allah langan Junjungante Saq Mulie Deside Isa Almasih.

²Séngaq ite beriman léq dalem Deside Isa, langan Ie ite bau tame ojok dalem rahmat Allah, dait mangkin siq rahmat nike ite idup. Keranaq nike ite besukecite dait beharep bahwe ite gen nerimaq kemuliean Allah!

³Malahan luwéqan malik, ite éndah besukecite léq dalem penderitean, séngaq ite nenaoq bahwe penderitean miaq dengan jari tekun.

⁴Dait ketekunan miaq dengan jari tahen uji; niki saq nimbulang pengharepan.

⁵Dait pengharepan saq maraq niki ndéq gen ngecéweang ite, séngaq aténte sampun teisiq siq Allah siq kasih-Ne. Hal nike telaksaneang siq Allah langan Roh Suci-Ne, saq sampun teicanin tipaq ite.

⁶Léq waktu ite dalem keadaan lemah, Almasih ninggal umaq ite dengan-dengan saq durhake, léq waktu saq tepat saq tetentuang siq Allah.

⁷Séngaq ndéqne mudaq sopoq dengan réde maté umaq dengan saq kenaq, laguq sang umaq dengan saq solah araq dengan saq bani maté.

⁸Laguq Allah nyatayang kasih-Ne léq ite sewaktu Deside Isa ninggal umaq ite, léq waktu ite masih bedose.

⁹Mangkin ite sampun tejariang kenaq léq arepan Allah sehingge hubungante kance Allah jari solah malik langan ninggal-Ne Almasih; keranaq nike pasti ite gen teselametang éndah léman murke Allah siq Almasih.

¹⁰Lamun léq waktu ite masih jari musuh Allah, ite tedaméang kance Allah siq ninggal Bije-Ne, lebih-lebih mangkin sesampun hubungante kance Allah solah malik, pasti ite gen teselametang éndah langan idup Almasih.

¹¹Dait luwéqan malik, ite éndah besukecite léq dalem Allah langan Junjungante Saq Mulie Deside Isa Almasih, séngaq langan Ie ite sampun nerimaq pendaméan.

¹² Dose tame ojok dalem dunie langan sopoq dengan, dait léman dose nike sampun datengang kematéan, akibatne, selapuq umat manusie gen ngalamin kematéan, lantaran selapuq dengan bedose.

¹³Sendéqman Hukum Taurat teturunang, dose sampun araq léq dalem dunie. Laguq dose ndéqne teperitungang, séngaq ndéq araq hukum saq bau telanggar.

¹⁴Timaq maraq nike, kematéan nguasein selapuq manusie léman jaman Adam jangke jaman Musa, malahan dengan-dengan saq ndéq miaq pelanggaran maraq saq telaksaneang siq Adam, dengan-dengan nike milu éndah tekuasein siq kematéan. Adam nike jari gambaran sopoq dengan saq gen rauh.

¹⁵Laguq paice Allah tetu-tetu béde kance pelanggaran saq tepiaq siq Adam. Pelanggaran Adam jari penyebap luwéq dengan maté, laguq jaoq beléqan malik rahmat léman Allah saq teicanin tipaq dengan luwéq, langan sopoq dengan, nike Deside Isa Almasih.

¹⁶Rahmat Allah éndah jaoq beléqan léman dose sopoq dengan nike, séngaq penghakiman léq sopoq pelanggaran saq tepiaq siq Adam, nike jari penyebap penghukuman. Laguq rahmat Allah tipaq luwéq pelanggaran, nike jari penyebap manusie tejariang kenaq léq arepan Allah.

¹⁷Langan sopoq pelanggaran saq tepiaq siq Adam kematéan nguasein selapuq dengan. Laguq selapuq dengan saq nerimaq kelimpahan rahmat dait paice tejariang kenaq léq arepan Allah langan Deside Isa Almasih, gen idup dait bekuase.

¹⁸Séngaq sopoq pelanggaran saq tepiaq siq Adam, sampun datengang penghukuman tipaq sebilang manusie. Laguq sopoq karye Almasih saq jariang manusie kenaq léq arepan Allah, miaq selapuq dengan kenaq léq arepan Allah dait ngicanin ie pade idup.

¹⁹Dait maraq luwéq dengan jari dengan bedose lantaran sopoq dengan saq ndéq taat, maraq nike éndah luwéq dengan gen bau tejariang kenaq léq arepan Allah lantaran sopoq dengan lain taat léq Allah.

²⁰Allah ngicanin Hukum Taurat adéq selapuq dengan bau serioq berembé bedosene ie pade, laguq sayan manusie bedose, sayan belimpah-limpah rahmat Allah.

²¹Pade maraq dose nguasein selapuq dengan dait datengang kematéan, mangkin rahmat Allah bekuase dait jariang ite kenaq léq arepan Allah, sehingge ite nerimaq idup sejati dait kekel langan Junjungante Saq Mulie Deside Isa Almasih.