Read KITAB SUCI ZABUR INJIL ROMA 6 Bible Online

ROMA 6 - KITAB SUCI ZABUR INJIL bible

ROMA 6

¹Lamun maraq nike napi saq bau ite raosang malik? Napi ite tetep doang gawéq dose, adéq rahmat Allah sayan beromboq?

²Pasti ndéqne maraq nike; dose ndéq bekuase malik léq ite, jari segerah ite bau terus-terusan idup dalem dose?

³Semeton senamian, napi side pade ndéq nenaoq bahwe sewaktu ite tebaptis léq dalem Almasih, artine ite tebaptis dalem ninggal-Ne.

⁴ Siq baptisan ite tekubur bareng kance Almasih dait milu ninggal bareng Ie, adéqne pade maraq Almasih teidupang léman ninggal-Ne siq kemuliean Bapa saq mulie, maraq nike éndah ite gen idup dalem idup saq baru.

⁵Lamun ite sampun jari sopoq kance Almasih dalem ninggal-Ne, ite éndah gen jari sopoq kance Ie dalem idup-Ne saq sampun teidupang malik.

⁶Selapuqte sampun nenaoq, bahwe tabiat ite saq laéq sampun tematéqang bareng Almasih léq kayuq salib adéq awakte saq bedose nike telang kuasene, adéq ite ndéqne malik tekuasein siq dose.

⁷Séngaq lamun sopoq dengan ninggal, dengan nike tebébasang léman kuase dose.

⁸Laguq lamun ite sampun ninggal kance Almasih, ite percaye bahwe ite éndah gen idup bareng kance Ie.

⁹Séngaq ite nenaoq bahwe Almasih sampun idup malik léman ninggal, dait Ie nénten gen ninggal malik; kematéan nénten bekuase malik léq diriq-Ne.

¹⁰Ninggal saq Ie alamin, nike ninggal tipaq dose, hal nike telaksane cume sekali doang jari selaéq-laéqne. Dait kehidupan-Ne nike idup bagi Allah.

¹¹Maraq nike éndah side pade harus anggep bahwe diriq side pade sampun ninggal tipaq dose, laguq idup bagi Allah dalem Deside Isa Almasih.

¹²Ndaq malik alurang dose nguasein awakde saq iniq binase, adéq side pade ndaq turut keméléqne saq jahat.

¹³Ndaq éndah side pade nyerahang bagian-bagian awakde tipaq kuase dose jari tekadu léq maksut-maksut jahat. Laguq serahang diriqde tipaq Allah sebagé dengan saq sampun tealihang léman kematéan tipaq idup. Dait serahang bagian-bagian awakde tipaq Allah adéqne tekadu jari maksut-maksut saq kenaq léq arepan Allah.

¹⁴Dose ndéqne kanggo nguasein side pade, séngaq side pade ndéq malik idup léq bawaq Hukum Taurat, laguq léq bawaq rahmat Allah.

¹⁵Mangkin napi kesimpulante? Napi ite gen gawéq dose lantaran ite ndéq léq bawaq Hukum Taurat, laguq léq bawaq rahmat Allah? Pasti ndéqne maraq nike!

¹⁶Napi side pade nenaoq bahwe lamun side pade nyerahang diriq tipaq sopoq dengan jari taat léq ie, make artine side pade jari pelayan dengan nike — léq dalem dose saq jauq side pade ojok kematéan, atao dalem ketaatan saq jariang side pade kenaq léq arepan Allah sehingge hubungan side pade kance Allah jari solah malik.

¹⁷Laguq syukur tipaq Allah, séngaq laéq side pade jari panjak dose, laguq mangkin siq sepenoq angen side pade taat léq pengajahan saq sampun teajahang tipaq side pade.

¹⁸Side pade sampun tebébasang léman dose, dait sampun jari hambe saq tejariang kenaq léq arepan Allah.

¹⁹Lantaran penenaoq side pade kurang gati, tiang kadu conto-conto mengenai hambe, adéq side pade bau ngerti. Laéq side pade sampun nyerahang bagian-bagian awakde sebagé panjak hal-hal saq kotor dait jahat. Hal nike jauq side pade tipaq maksut-maksut saq jahat. Maraq nike éndah mangkin side pade harus nyerahang awak side pade sebagé hambe saq tejariang kenaq léq arepan Allah. Hal nike jauq side pade tipaq penyucian.

²⁰Sewaktu side pade jari hambe dose, side pade ndéq léq bawaq kuase saq jariang side pade kenaq léq arepan Allah.

²¹Napi saq jari keuntungan side pade léq waktu nike? Mangkin selapuqne jari hal saq merilaq, séngaq perbuatan-perbuatan side pade nike cume jauq kematéan.

²²Laguq mangkin side pade sampun tebébasang léman dose, dait side pade jari pelayan Allah, keuntungan saq side pade mauq mangkin, penyucian saq ahirne jauq side pade tipaq idup sejati dait kekel.

²³Séngaq upaq dose nike kematéan; laguq paice Allah nike idup sejati dait kekel dalem Junjungante Saq Mulie Deside Isa Almasih.