Read KITAB SUCI ZABUR INJIL ROMA 7 Bible Online

ROMA 7 - KITAB SUCI ZABUR INJIL bible

ROMA 7

¹Semeton-semeton tiang! Side pade sampun nenaoq Hukum Taurat. Jari side pade nenaoq bahwe kekuasean hukum tipaq sopoq dengan berlaku cume sewaktu dengan nike idup.

²Misalne sopoq dengan nine saq bedowé semame, ie harus teriket léq hukum kance semamene saq masih idup. Laguq lamun semamene ninggal, dengan nine nike bébas léman hukum saq ngiket ie tipaq semamene.

³Lamun dengan nine nike idup kance dengan mame lain sewaktu semamene masih araq, make dengan nine nike teparan bezinah. Laguq lamun semamene ninggal, make menurut hukum ie sampun bébas, dait lamun ie merariq malik kance dengan mame saq lain, make ie ndéq bezinah.

⁴Maraq nike éndah halne side pade, semeton tiang senamian. Side pade sampun ninggal tipaq Hukum Taurat langan rage Deside Isa Almasih dait jari dowé-Ne saq sampun teidupang malik léman ninggal. Deside Isa teidupang léman ninggal adéq ite ngasilang buaq saq solah bagi Allah léq dalem idupte.

⁵Séngaq, laéq ite idup menurut keméléq awak saq bedose. Léq waktu nike keméléq nike timbul séngaq araq Hukum Taurat saq pengaruhin diriqte. Nike jari penyebap ite ngelaksaneang hal-hal saq jauq akibat kematéan.

⁶Laguq mangkin ite sampun tebébasang léman Hukum Taurat. Ite sampun ninggal umaq hukum saq laéq nguasein ite. Ite ndéq malik ngelayanin menurut hukum saq tetulis nike. Mangkin ite ngelayanin dalem keadaan saq baru dalem Roh Allah.

⁷ Lamun maraq nike, napi saq bau ite ucapang malik? Napi Hukum Taurat nike dose? Pasti ndéq! Laguq setetune hukum nike saq ngajah tiang mengenai dose. Tiang ndéq gen nenaoq napi artine melét nike, lamun ndéq tebadaq siq hukum nike, “Ndaq melét.”

⁸Langan hukum nike, dose mauq kesempatan jari nimbulang macem-macem keméléq léq dalem atén tiang; séngaq lamun Hukum Taurat nike ndéq araq, make dose éndah maté.

⁹Laéq tiang idup ndéq kadu Hukum Taurat. Laguq sesampun araq préntah léman hukum nike dose mulai idup

¹⁰dait tiang maté. Make préntah nike saq maksutne mule jari ngicanin idup malahan datengang kematéan tipaq tiang.

¹¹ Séngaq langan préntah nike, dose bait kesempatan nipu dait nyematéq tiang.

¹²Hukum Taurat nike suci dait sebilang préntah léq dalem hukum nike éndah suci, adil dait solah.

¹³Mangkin, napi niki artine bahwe saq solah nike datengang kematéan tipaq tiang? Pasti ndéq! Dose nike saq datengang kematéan tipaq tiang kadu saq solah nike, adéq jari sayan nyate éndah kejahatan dose nike. Dait langan préntah-préntah nike sayan nyate berembé jahatne dose nike.

¹⁴Séngaq ite nenaoq bahwe Hukum Taurat nike mengenai hal-hal saq berubungan kance roh; laguq tiang niki manusie siq keméléq awak saq bedose saq sampun tejual jari panjak dose.

¹⁵ Séngaq tiang mésaq ndéq ngerti perbuatan tiang. Hal-hal saq melét tiang laksaneang nike, ndéq tiang laksaneang; laguq hal-hal saq tiang meriq, malahan nike saq tiang laksaneang.

¹⁶Mangkin lamun tiang laksaneang hal-hal saq betentangan kance keméléq tiang, nike artine tiang setuju bahwe Hukum Taurat nike solah.

¹⁷Jari, setetune ndéqne tiang saq ngelaksaneang nike, laguq dose saq nguasein diriq tiang.

¹⁸Séngaq tiang nenaoq bahwe ndéq araq sopoq juaq saq solah léq dalem diriq tiang; nike keméléq awak tiang saq bedose. Séngaq araq angen tiang piaq hal saq solah, laguq tiang ndéq sanggup laksaneang.

¹⁹Tiang ndéq ngelaksaneang saq solah saq tiang melét laksaneang, laguq tiang ngelaksaneang hal-hal saq jahat, saq ndéq mélé tiang laksaneang.

²⁰Lamun tiang ngelaksaneang hal-hal saq ndéq mélé tiang laksaneang, nike artine ndéqne tiang saq ngelaksaneang hal-hal nike, laguq dose saq nguasein diriq tiang.

²¹Jari, tiang ndait hukum niki: Lamun tiang mélé ngelaksaneang saq solah, make cume saq jahat doang saq timbul léman diriq tiang.

²²Mule batin tiang suke léq hukum Allah,

²³laguq tiang sadar bahwe léq dalem bagian-bagian awak tiang araq éndah hukum lain saq pengaruhin tiang -- nike hukum saq ngelawan hukum akal budi tiang. Keranaq nike tiang teriket dalem hukum dose saq araq léq bagian-bagian awak tiang.

²⁴Tiang manusie celake! Sai saq gen nyelametang tiang léman awak saq jauq tiang tipaq kematéan niki? Syukur tipaq Allah! Langan Junjungante Saq Mulie Deside Isa Almasih. Jari, siq hukum akal budi tiang, tiang ngelayanin hukum Allah, laguq léman keméléq awak tiang saq bedose, tiang ngelayanin hukum dose!