Read KITAB SUCI ZABUR INJIL ROMA 8 Bible Online

ROMA 8 - KITAB SUCI ZABUR INJIL bible

ROMA 8

¹Ndéqne araq malik penghukuman léq dengan-dengan saq sampun idup léq dalem Deside Isa Almasih.

²Séngaq hukum Roh Allah saq miaq ite idup léq dalem Deside Isa Almasih sampun bébasang tiang léman hukum saq jauq dose dait kematéan.

³Napi saq ndéq mungkin telaksaneang siq Hukum Taurat lantaran kelemahan manusie, sampun telaksaneang siq Allah. Dose saq araq léq dalem tabiat manusie nike sampun tekalahang siq Allah langan pengurbanan Bije-Ne mésaq saq rauh ojok dunie jari maraq manusie saq bedose, jari ngapus dose.

⁴Hal nike telaksaneang siq Allah adéq pekayunan-Ne saq tenyatayang dalem Hukum Taurat nike bau telaksaneang léq dalem diriqte saq idup menurut Roh Allah, dait ndéqne menurut tabiat manusie.

⁵Dengan-dengan saq idup menurut tabiat manusie, gen tetep mikirang napi saq jari keméléq tabiat manusiene, laguq dengan-dengan saq idup menurut Roh Allah, ie gen tetep mikirang napi saq jari pekayunan Roh Allah.

⁶Lamun pikirande tekuasein siq keméléq tabiat manusie, make akibatne kematéan, laguq lamun pikirande tekuasein siq Roh Allah, make akibatne idup dait damé sejahtere kance Allah.

⁷Dengan saq pikiranne tekuasein siq keméléq tabiat manusie, dengan nike bemusuhan kance Allah; lantaran dengan nike ndéqne taat léq hukum Allah; dait mule ie ndéq iniq patuh léq hukum Allah.

⁸Dengan-dengan saq idup menurut tabiat manusie, ndéqne mungkin nyenengang Allah.

⁹Laguq side pade ndéq idup menurut tabiat manusie, side pade idup menurut Roh Allah -- lamun, Roh Allah tetu-tetu araq léq dalem diriqde. Dengan saq ndéq bedowé Roh Almasih, ie ndéqne dowén Almasih.

¹⁰Laguq lamun Almasih idup léq dalem diriqde, make timaq awakde gen ninggal lantaran dose, laguq Roh Allah ngicanin idup tipaq side, séngaq hubungande kance Allah sampun solah.

¹¹ Lamun Roh Allah saq ngidupang Almasih léman ninggal idup léq dalem diriqde, make Ie saq ngidupang Almasih léman ninggal gen ngidupang éndah awakde saq iniq binase nike siq Roh-Ne saq idup léq dalem diriqde.

¹²Keranaq nike semeton senamian, ite bedowé tanggung jawab, laguq tanggung jawab nike ndéqne léq tabiat manusie; ite ndéq perlu idup menurut keméléqne.

¹³Séngaq lamun side pade idup menurut tabiat manusie, make side pade gen maté; laguq lamun siq kuase Roh Allah side pade terus doang nyematéq perbuatan-perbuatande saq bedose, make side pade gen idup.

¹⁴Dengan-dengan saq tebimbing siq Roh Allah, ie jari bije-bije dowén Allah.

¹⁵ Séngaq Roh saq teicanin siq Allah tipaq side pade, ndéq gen miaq side jari hambe sehingge side pade idup dalem ketakutan, laguq Roh Allah nike jariang side bije-bije dowén Allah. Dait siq kuase Roh Allah nike ite bau nyebut Allah nike, “Bapa, ya Bapa!”

¹⁶Roh Allah bareng kance rohte nyatayang bahwe ite niki jari bije-bije dowén Allah.

¹⁷Nah, lamun ite bije dowén Allah, make ite éndah ahli waris-Ne saq gen nerimaq berkah-berkah saq tesedieang siq Allah jari bije-bije dowé-Ne. Ite gen nerimaq bareng-bareng kance Almasih napi saq sampun tesedieang siq Allah umaq Ie; séngaq lamun ite milu menderite bareng kance Almasih, ite gen milu temulieang bareng kance Ie.

¹⁸Selapuq penderitean saq ite alamin mangkin niki, menurut pendapet tiang, tetu-tetu ndéqne bau tebandingang siq kemuliean saq gen tenyatayang tipaq ite.

¹⁹Selapuq mahluk melét gati ngantih piran waktune Allah nyatayang bije-bije saq jari dowé-Ne.

²⁰ Séngaq selapuq mahluk araq léq bawaq pikiran saq sie-sie, ndéqne lantaran keméléqne mésaq, laguq siq pekayunan-Ne, siq pengharepan bahwe:

²¹Selapuq mahluk gen tebébasang léman kuase saq binaseang dait gen tebébasang serte temulieang bareng kance bije-bije dowén Allah.

²²Ite nenaoq bahwe jangke mangkin selapuq mahluk ngeluh lantaran menderite, maraq dengan nine saq menderite sewaktune nganak.

²³ Ndéqne selapuq mahluk doang saq ngeluh, laguq ite mésaq éndah ngeluh léq dalem aténte. Ite saq sampun nerimaq paice léman hasil penembéq Roh Allah, ite masih doang ngantih piran Allah bébasang diriqte selapuqne dait jariang ite bije-bije dowé-Ne.

²⁴Séngaq siq beharep, make ite teselametang. Laguq lamun napi saq ite harepang nike sampun ite serioq, make nike ndéqne malik harepan. Séngaq sai saq masih beharep léq napi saq sampun ie serioq?

²⁵Laguq lamun ite beharep léq hal saq ndéqman ite serioq, make ite gen sabar ngantih.

²⁶Maraq nike éndah Roh Allah nulung ite lamun ite ndéq kuat. Séngaq ite ndéq nenaoq berembé setetune ite bedo'e; Roh nike mésaq saq do'eang ite tipaq Allah siq keluhan-keluhan saq ndéq bau ite ucapang.

²⁷Make Allah saq selidik até manusie, wikan pekayunan Roh nike, séngaq Roh nike do'eang dengan-dengan saq tehususang bagi Allah, pade maraq pekayunan Allah.

²⁸Ite nenaoq mangkin bahwe Allah milu bekarye ngatur selapuq hal, sehingge ngasilang saq solah umaq dengan-dengan saq ngasihin Ie dait saq tepiléq menurut rencane-Ne.

²⁹Séngaq selapuq dengan saq tepiléq siq Allah léman penembéq sampun tetentuang bahwe ie pade gen jari maraq Bije-Ne. Bije-Ne nike jari saq penembéq léq antare semeton-semeton senamian.

³⁰Allah miléq dengan-dengan saq sampun tetentuang juluan; dait dengan-dengan saq tepiléq nike tejariang kenaq léq arepan-Ne sehingge hubungan ie pade kance Allah jari solah malik dait ie pade temulieang éndah.

³¹Mangkin, napi saq gen teraosang malik mengenai selapuqne nike? Lamun Allah léq pihak ite, sai saq bau ngelawan ite?

³²Allah rédeang Bije-Ne mésaq, malahan Ie nyerahang Bije nike umaq ite selapuq. Segerah Allah nénten gen ngicanin secare cume-cume tipaq ite selapuq hal saq lainne?

³³Sai saq gen nuntut ite, dengan-dengan saq tepiléq siq Allah? Allah mésaq nyatayang bahwe ite tejariang kenaq léq arepan-Ne sehingge hubungante kance Ie jari solah malik.

³⁴Napi araq dengan saq mélé ngukum ite? Malahan Deside Isa Almasih do'eang ite! Ie saq sampun ninggal dait saq sampun teidupang malik léman ninggal dait melinggih léq sedi kanan Allah.

³⁵Napi araq saq bau misahang kasih Junjungante Saq Mulie Deside Isa Almasih kance ite? Napi bau kesusahan, kesengsarean, penganiayean, kelapahan, kemiskinan, bahaye atao kematéan gen jari penghalang?

³⁶ Dalem Kitab Suci tetulis maraq niki, “Sejeloan tiang pade idup léq dalem bahaye maut lantaran Deside. Tiang pade teanggep maraq dombe saq gen tesembeléh.”

³⁷Setetune ndéq! Malahan léq keadaan saq maraq nike ite lebihan léman dengan-dengan menang, langan Ie saq ngasihin ite!

³⁸Séngaq tiang yakin gati bahwe léq seantéro dunie, kematéan dait kehidupan, malaékat dait penguase dait anceman-anceman saq araq éraq; atao kekuatan-kekuatan saq lainne;

³⁹saq araq léq langit atao léq bawaq gumi atao éndah hal-hal napi doang saq lain, selapuqne ndéq gen bau misahang kasih Allah léq ite, maraq saq sampun tenyatayang léq dalem Deside Isa Almasih, Junjungante Saq Mulie.