Read KITAB SUCI ZABUR INJIL ROMA 9 Bible Online

ROMA 9 - KITAB SUCI ZABUR INJIL bible

ROMA 9

¹Napi saq tiang ucapang niki kenaq séngaq tiang ngeraos léq arepan Almasih. Tiang ndéq beduste, até nurani tiang saq tebimbing siq Roh Suci ngeyakinang tiang éndah napi saq tiang sampéang niki kenaq.

²Atén tiang sedih gati dait menderite gati

³lantaran semeton-semeton tiang saq sebangse kance tiang, nike bangse Israel. Séngaq umaq ie pade tiang mésaq réde tekutuk siq Allah dait tekelin léman Almasih.

⁴ Ie pade dengan-dengan saq tepiléq siq Allah dait tejariang bije-bije dowé-Ne, Ie nyatayang kemuliean-Ne tipaq ie pade dait ngaraqang perjanjian-perjanjian kance ie pade dait ngebéng ie pade Hukum Taurat. Ie pade tepréntahang siq Allah berembé entan beribadah, dait ie pade sampun nerimaq janji-janji-Ne.

⁵Ie pade keturunan léman leluhurte. Secare jasmani Almasih asalne léman bangse ie pade. Ie atasan malik léman selapuqne. Ie Allah saq harus tepuji jangke selaéq-laéqne. Amin!

⁶Laguq Manik Allah ndéq mungkin gagal; ndéqne selapuq dengan saq asalne léman Israel nike dengan Israel.

⁷ Ndéqne selapuq keturunan Ibrahim nike bije-bije Ibrahim, séngaq Manik Allah tipaq Ibrahim, “Cume keturunan Ishak doang saq gen tesebut keturunande.”

⁸Nike artine bahwe keturunan Ibrahim saq jari bije-bije dowén Allah cume keturunanne saq tebijeang lantaran janji Allah.

⁹ Séngaq maraq niki janji Allah nike, “Léq waktu saq tetentuang, Tiang gen tulak, dait Sarah gen bedowé bije mame.”

¹⁰Dait niki éndah: Ribkah bijeang due bije mame léman sopoq amaq, Ishak leluhurte.

¹¹Sendéqman kedue bije nike tebijeang, Allah sampun nentuang piléqan-Ne, adéq rencane-Ne mengenai sai saq Ie piléq tetep berlaku. Séngaq léq waktu kedue bije Ribkah nike ndéqman tao ngelaksaneang napi-napi saq solah atao saq jahat,

¹² Allah sampun bemanik tipaq Ribkah, “Saq beléqan gen jari pelayan saq kodéqan.”

¹³ Léq dalem Kitab Suci tetulis Allah bemanik maraq niki, “Yakub Tiang kasihin laguq Esau Tiang meriq.”

¹⁴Napi kesimpulante mangkin? Allah nénten adil? Ndéqne mungkin!

¹⁵ Séngaq Allah bemanik tipaq Musa, “Tiang gen nyatayang rahmat tipaq dengan saq Tiang suke nyatayang rahmat, dait Tiang gen nyatayang belas kasihan tipaq dengan saq Tiang suke nyatayang belas kasihan.”

¹⁶Jari, keputusan Allah nike nénten teicanin lantaran keméléq manusie atao usahe manusie, laguq menurut rahmat Allah.

¹⁷ Séngaq léq dalem Kitab Suci tetulis, “Allah bemanik tipaq raje Mesir, ‘Tiang jariang side raje siq sopoq maksut niki, adéq langan side Tiang nyatayang kekuasean dait miaq aran Tiang kesohor léq seantéro dunie.’ ”

¹⁸Jari, Allah nyatayang rahmat-Ne tipaq sopoq dengan, lamun Allah kayunang hal nike. Dait Allah miaq dengan jari pagah, lamun Allah kayunang hal nike éndah.

¹⁹Nah, side pade gen bebase léq tiang, “Lamun maraq nike kembéq Allah masih nyalahang manusie? Tekan ndéq araq sopoq dengan juaq saq bau halangin pekayunan Allah?”

²⁰ Laguq side pade, side pade cume manusie biase, dait side pade ndéq patut nimbal tipaq Allah! Napi bau barang saq tepiaq beketuan léq dengan saq miaq, “Kembéq side piaq tiang maraq niki?”

²¹Napi dengan saq miaq keméq nike ndéq bedowé hak miaq tanaq malit nike semélé angenne? Léman sebongkah tanaq malit, dengan nike berhak miaq due macem rue: Saq sopoq tekadu jari tujuan saq mulie, dait saq sopoqne malik tekadu jari tujuan biase.

²²Maraq nike éndah napi saq tecipteang siq Allah. Allah nyatayang murke-Ne dait nyatayang kekuasean-Ne. Laguq Allah éndah sabar tipaq ie pade saq harus tehukum lantaran perbuatanne miaq Allah jari murke.

²³Malahan Allah sabar jari nyatayang kesugihan dait kesolahan-Ne saq belimpah-limpah tipaq dengan-dengan saq Ie kasihin, saq sampun Ie siepang sendéqmanne jari nerimaq kemuliean-Ne,

²⁴termasuk ite saq sampun temanikang siq Allah, ndéqne léman bangse Yahudi doang, laguq léman bangse-bangse lain éndah.

²⁵ Séngaq léq dalem kitab Nabi Hosea, Allah bemanik, “Dengan-dengan saq ndéq dowén Tiang, gen Tiang sebut ‘Bije-bije dowén Tiang’. Bangse saq ndéq Tiang kasihin, gen Tiang sebut ‘Kekasih Tiang’.

²⁶ Dait léq taoq léq mbé tebadaq tipaq dengan, ‘Side pade ndéqne dengan-dengan dowén Tiang’, gen tesebut, ‘Bije-bije dowén Allah saq idup.’ ”

²⁷ Nabi Yesaya éndah bebase secare tegas mengenai bangse Israel, “Timaq jumlah bangse Israel nike maraq gerés léq segare, cume sekediq doang saq gen selamet;

²⁸séngaq Tuhan gen gelis ngukum selapuq isi dunie, adil dait sempurne.”

²⁹ Yesaya éndah bebase maraq niki, “Seandéne Tuhan penguase alam semeste ndéq ngadéqang ite keturunan, pasti ite selapuq sampun maraq Sodom dait Gomora.”

³⁰Jari, kesimpulanne: Bangse-bangse lain saq ndéq uwah berusahe adéqne jari kenaq léq arepan Allah, mangkin tejariang kenaq léq arepan Allah sehingge hubungan ie pade kance Allah jari solah malik langan iman ie pade.

³¹Sebalikne dengan-dengan Yahudi tetep berusahe taat léq hukum adéq tejariang kenaq léq arepan Allah. Laguq malahan ie pade ndéq berhasil.

³²Kembéq ie pade ndéq berhasil? Séngaq ie pade ngelaksaneang hal nike ndéqne lantaran beriman tipaq Allah, laguq siq usahene mésaq. Make ie pade geriq kedantuk léq “Batu Sandungan”.

³³ Mengenai batu nike tetulis léq Kitab Suci maraq niki, “Perhatiang niki: Léq Sion sampun Tiang toloq sopoq batu saq gen miaq dengan kedampes; sopoq batu saq miaq dengan geriq. Laguq dengan saq percaye léq Ie, ndéq gen teperilaq.”