Read KITAB SUCI ZABUR INJIL 1 KORINTUS 1 Bible Online

1 KORINTUS 1 - KITAB SUCI ZABUR INJIL bible

1 KORINTUS 1

¹ Semeton senamian jemaah Allah léq Korintus! Side sampun temanikang siq Allah jari dengan-dengan saq tehususang bagi Allah séngaq side dowén Deside Isa Almasih, bareng kance selapuq dengan léq embé juaq saq nyembah Junjungante Saq Mulie Deside Isa Almasih, saq jari Tuhan ie pade dait Tuhante éndah. Tiang, Paulus, dait semetonte Sostenes, beharep semoge Allah Bapante dait Junjungan Saq Mulie Deside Isa Almasih ngicanin side rahmat dait damé sejahtere. Tiang nulis surat niki sebagé rasul Deside Isa Almasih, saq teangkat siq Allah dait siq pekayunan-Ne éndah.

⁴Tiang tetep besyukur tipaq Allah mengenai side pade, séngaq side pade sampun nerimaq rahmat léman Allah langan Deside Isa Almasih.

⁵Lantaran side pade sampun araq léq dalem Almasih, make idupde sugih léq dalem selapuq hal. Penenaoqde mengenai selapuq hal sampun dalem gati, dait side pade ceket ngajahang penenaoq nike.

⁶Hal nike nyatayang bahwe berite mengenai Almasih sampun tetu-tetu tepahamin jangke dalem aténde,

⁷sehingge side pade ndéq kekurangan sopoq paice juaq, dait side pade kenyeke ngantos kerauhan Junjungante Saq Mulie Deside Isa Almasih.

⁸Almasih mésaq gen jamin side pade jangke dateng penutuqne; adéq léq waktu jelo Tuhan, side pade tedait ndéq araq cacat cele.

⁹Allah nike setie. Ie sampun ngemanikang dait pesopoq side kance Bije-Ne, nike Deside Isa Almasih, Junjungante Saq Mulie.

¹⁰Semeton senamian! Siq peséngan Junjungante Saq Mulie Deside Isa Almasih, tiang tunas adéq side pade selapuq idup rukun; adéq ndaq araq perpecahan léq antare side. Adéq side pade besopoq, sopoq angen dait sopoq pikiran.

¹¹Séngaq, dengan-dengan léman keluarge Kloe ngelaporang tipaq tiang bahwe araq pegejuhan léq antare side.

¹² Saq tiang maksut nike, bahwe léq antare side araq saq bebase, “Tiang léman golongan Paulus”, araq éndah saq bebase, “Tiang léman golongan Apolos”. Saq lain bebase, “Tiang léman golongan Kepas”. Saq lainne malik bebase, “Tiang léman golongan Almasih.”

¹³Segerah Almasih tebagi-bagi? Napi Paulus tepakuq léq kayuq salib umaq side pade? Tekan side pade ndéq tebaptis adéqne jari pengiring-pengiring Paulus?

¹⁴ Syukur ndéq araq sopoq dengan juaq saq tiang baptis léq antare side, selain Krispus dait Gayus.

¹⁵Ndaq jangke araq sopoq dengan saq bebase bahwe tiang sampun baptis ie adéqne jari pengiring tiang. (

¹⁶ Mule tetu, Stepanus dait keluargene, mule tiang saq baptis ie pade. Laguq lainan siq ie pade, seinget tiang, ndéq araq malik dengan lain saq tiang baptis.)

¹⁷Almasih ngutus tiang ndéqne jari baptis dengan, laguq jari nyampéang Kabar Solah léman Allah; dait nike éndah harus tiang laksaneang ndéq kadu kepinteran ngeraos secare manusie, adéq kuase ninggal-Ne Almasih léq kayuq salib ndéq sie-sie.

¹⁸Séngaq bagi dengan-dengan saq mule gen binase, berite mengenai ninggal-Ne Almasih léq kayuq salib nike teanggep jari sopoq hal saq bodo. Laguq, bagi ite saq teselametang siq Allah, berite nike kekuatan Allah.

¹⁹ Séngaq léq dalem Kitab Suci, Allah bemanik, “Kebijaksanean dengan arip gen Tiang binaseang, dait pengertian dengan-dengan berilmu gen Tiang musnahang.”

²⁰ Lamun maraq nike, léq mbé dengan-dengan saq arip nike? Léq mbé ahli-ahli Taurat nike? Léq mbé dengan-dengan saq girang nentang nike? Tekan Allah sampun miaq kebijaksanean dunie niki jari sopoq hal saq bodo?

²¹Séngaq timaq berembé ceketne manusie, ie ndéq bau kenal kance Allah kadu kepinteranne mésaq. Laguq malahan lantaran Allah bijaksane, make Ie kayun nyelametang dengan-dengan saq percaye léq Ie langan berite saq tiang pade sampéang, saq teanggep hal saq bodo siq dunie.

²²Dengan Yahudi nuntut keajaipan jari bukti, dait dengan Yunani ngutameang kebijaksanean dunie niki.

²³Laguq tiang pade cume nyampéang Almasih saq ninggal tepakuq léq kayuq salib. Berite nike nyinggung perasaan dengan Yahudi, dait teanggep hal saq bodo siq dengan bangse-bangse lain.

²⁴Laguq bagi dengan-dengan saq sampun temanikang siq Allah -- dengan Yahudi dait dengan bangse-bangse lain -- Almasih nike kekuatan dait kebijaksanean Allah.

²⁵Séngaq napi saq ruene bodo laguq léman Allah, nike lebih bijaksane tebanding kebijaksanean manusie; dait saq ruene lemah laguq léman Allah, nike kuatan tebanding kekuatan manusie.

²⁶Semeton senamian! Cobaq inget berembé keadaande léq waktu Allah ngemanikang side pade. Cume sekediq doang léq antare side saq bijaksane, atao bekuase atao saq atas kedudukanne menurut pandangan manusie.

²⁷Séngaq mule Allah sediah miléq saq teanggep bodo siq dunie niki, adéq dengan-dengan pinter jari ilaq. Dait Allah miléq éndah saq teanggep lemah siq dunie niki, adéq dengan-dengan saq gagah perkase jari ilaq.

²⁸Allah miléq saq teanggep rendah, hine, dait malahan saq teanggep ndéq araq artine siq dunie niki, adéq Allah ngancurang saq teanggep penting siq dunie.

²⁹Siq care nike ndéq araq sopoq dengan juaq saq bau nyombongang diriqne léq arepan Allah.

³⁰Allah mésaq saq miaq side araq léq dalem Deside Isa Almasih. Langan Almasih ite tejariang bijaksane. Dait langan Ie éndah Allah miaq ite tejariang kenaq léq arepan-Ne sehingge hubungante kance Allah jari solah malik, jariang ite dengan-dengan saq tehususang bagi Allah dait bébasang ite.

³¹ Jari, maraq saq tetulis dalem Kitab Suci, “Dengan saq mélé bangge, harus bangge léq dalem Tuhan.”