Read KITAB SUCI ZABUR INJIL 1 KORINTUS 10 Bible Online

1 KORINTUS 10 - KITAB SUCI ZABUR INJIL bible

1 KORINTUS 10

¹ Semeton senamian! Side pade harus inget napi saq telaksane tipaq leluhurte sewaktu ie pade ngiring Musa. Ie pade selapuq telindungin siq awan, dait selamet mbelat Segare Béaq.

²Adéqne bau jari pengiring-pengiring Musa, ie pade selapuq tebaptis léq dalem awan dait léq dalem segare nike.

³ Ie pade selapuq ngelor keloran rohani saq pade,

⁴ dait nginem ineman rohani saq pade. Ie pade selapuq nginem léman gunung batu rohani saq araq bareng kance ie pade; gunung batu nike Almasih mésaq.

⁵ Timaq maraq nike, luwéq léman ie pade saq Allah nénten suke, dait lantaran nike mayit-mayit ie pade begelanyat léq padang gurun.

⁶ Selapuqne nike jari conto umaq ite, jari ngingetang ite adéq ndaq melétang hal-hal saq jahat maraq ie pade.

⁷ Dait adéq ite éndah ndaq nyembah berhale maraq saq tegawéq siq separo léman ie pade. Léq dalem Kitab Suci tetulis, “Make bangse nike mulai ngelor dait nginem, dait ngigel jari nyembah berhale.”

⁸ Ite ndéq kanggo gawéq hal-hal saq cabul maraq saq telaksaneang siq separo léman ie pade. Sehingge dalem sejelo doang, telu likur iyu dengan léman ie pade ninggal.

⁹ Ite ndéq kanggo cobe Tuhan maraq saq telaksaneang siq separo léman ie pade laéq, sehingge ie pade ninggal tekakoq siq ulah saq beracun.

¹⁰ Ite ndéq kanggo éndah ngerumun; maraq saq telaksaneang siq separo léman ie pade laéq, sehingge ie pade tematéq siq malaékat maut.

¹¹Selapuq hal nike telaksane tipaq ie pade adéqne jari conto bagi dengan-dengan lain. Dait selapuqne nike tetulis éndah adéqne jari peringetan tipaq ite. Séngaq mangkin ite idup léq ahir jaman.

¹²Dengan saq paran diriqne kuat nganjeng, harus onyaq-onyaq; ndaq jangke ie geriq.

¹³Sebilang cobe saq side alamin, nike cobe saq biase tealamin siq manusie. Laguq Allah setie léq janji-Ne. Ie nénten gen menengang side tecobe lebihan léman kekuatande. Léq waktu side tetimpe siq cobe, Ie gen ngicanin side langan sehingge side bau nahen cobe nike.

¹⁴Keranaq nike, semeton senamian saq tiang kasihin, jaoqang diriqde léman penyembahan berhale.

¹⁵Tiang ngeraos léq side maraq tipaq dengan-dengan saq bijaksane. Side pade harus timbang mésaq ucapan tiang niki.

¹⁶ Sewaktu ite nginem anggur siq ucapan syukur tipaq Allah, napi hal nike ndéq nyatayang bahwe ite niki besopoq kance daraq Almasih? Dait sewaktu ite bagi-bagiang ruti jari tekelorang bareng-bareng, napi nike ndéq nyatayang bahwe ite besopoq dalem rage Almasih?

¹⁷Séngaq cume araq sopoq ruti, dait selapuqte ngelor léman ruti saq sopoq nike éndah, make ite saq luwéq niki jari sopoq awak.

¹⁸Cobaq perhatiang bangse Israel. Tekan ie pade saq ngelor keloran saq teaturang nike bareng-bareng mauq bagian léman méje taoq kurban nike?

¹⁹Napi maksut tiang léq hal nike? Berhale atao keloran saq teaturang tipaq berhale nike ndéq bedowé arti napi-napi.

²⁰ Napi saq teaturang tipaq berhale, nike ndéqne teaturang tipaq Allah, laguq tipaq roh-roh jahat. Dait tiang ndéq mélé side pade besopoq kance roh jahat.

²¹Side pade ndéq kanggo nginem léman cawan léq méje perjamuan Tuhan dait éndah léman cawan léq méje perjamuan Belis. Side pade ndéq kanggo kelorang ruti léq méje perjamuan Tuhan, dait éndah léq méje perjamuan Belis.

²²Atao ite mélé piaq Tuhan talon até? Napi ite kuatan tebanding Tuhan?

²³ “Ite kanggo piaq napi doang saq ite melétang.” Mule kenaq! Laguq ndéqne selapuq saq ite melétang nike araq manpaatne. “Ite kanggo piaq napi doang saq ite melétang” -- laguq ndéqne selapuq saq ite melétang nike bau pesolah idupte.

²⁴Ndaq sopoq dengan juaq bejuang jari kepentingan diriqne mésaq. Sebilang dengan harus bejuang jari kepentingan dengan lain.

²⁵Side pade kanggo ngelorang napi doang saq tejual léq peken. Ndéqne perlu teperiksaq juluq, timaq araq keberatan-keberatan léq dalem até nurani side.

²⁶ Séngaq dalem Kitab Suci tetulis, “Gumi dait selapuq isine dowén Tuhan.”

²⁷Lamun side pade tepesilaq bekelor siq sopoq dengan saq ndéq percaye léq Almasih, dait side pade terimaq pesilaqan nike, kelorang napi saq tepesajiq umaq side. Ndaq side periksaq léman mbé asalne keloran nike, adéq ndéq araq keberatan-keberatan léq dalem até nurani side.

²⁸Laguq lamun araq saq bebase léq side, “Keloran niki sampun teaturang tipaq berhale,” ndaq kelor keloran nike, lantaran merhatiang kepentingan dengan nike dait lantaran suare até nurani.

²⁹Maksut tiang ndéqne suare até nurani side, laguq suare até nurani dengan nike. Sang araq saq beketuan, “Kembéq kebébasan tiang harus tebatesin siq suare até nurani dengan lain?

³⁰Lamun tiang ngelor keloran siq rase syukur tipaq Allah, kembéq dengan ngewade tiang lantaran keloran nike, padahal tiang sampun ngucap syukur tipaq Allah?”

³¹Napi juaq saq side laksaneang -- side bekelor atao side nginem -- laksaneang selapuqne nike jari mulieang Allah.

³²Pade idup maraq nike sehingge side ndéq jari penyebap dengan lain piaq dose; napi ie pade dengan Yahudi atao dengan bangse-bangse lain, atao jemaah Allah.

³³Pade idup maraq tiang. Tiang berusahe nyenengang angen selapuq dengan dalem selapuq hal. Tiang ndéq araq bedowé maksut jari kepentingan tiang mésaq. Saq jari tujuan tiang cume adéq ie pade selapuq teselametang.