Read KITAB SUCI ZABUR INJIL 1 KORINTUS 11 Bible Online

1 KORINTUS 11 - KITAB SUCI ZABUR INJIL bible

1 KORINTUS 11

¹ Turut teladan tiang, maraq tiang éndah turut teladan Almasih.

²Tiang puji side pade séngaq side pade tetep inget léq tiang dait turut perajahan saq tiang ajahang tipaq side pade.

³Laguq tiang mélé side pade nenaoq sopoq hal malik, bahwe saq jari kepale léq sebilang dengan mame nike, Almasih; saq jari kepale léq senine nike, semame dait saq jari kepale léq Almasih nike, Allah.

⁴Lamun sopoq dengan mame léq waktu bedo'e atao léq waktu benubuat léq julun dengan luwéq, ngengadu kerudung, make dengan nike menghine Almasih.

⁵Dait lamun sopoq dengan nine léq waktu bedo'e atao benubuat léq julun dengan luwéq ndéq ngengadu kerudung, make ie menghine semamene saq jari kepale léq diriqne. Nike pade doang maraqne ulu dengan nine nike sampun tepeleng bulune.

⁶Séngaq lamun sopoq dengan nine ndéq mélé ngengadu kerudung, solahan bulune tepeleng. Laguq lamun sopoq dengan nine begunting atao tepeleng bulune, make nike sopoq penghinean tipaq ie. Keranaq nike bagusan ie ngengadu kerudung.

⁷ Dengan mame ndéqne perlu ngengadu kerudung, séngaq ie nyatayang pribadi dait kemuliean Allah. Laguq dengan nine jari nyatayang kemuliean dengan mame,

⁸ séngaq dengan mame ndéqne tejariang léman dengan nine, dengan nine saq tejariang léman dengan mame.

⁹Dengan mame ndéqne tecipteang lantaran dengan nine, laguq dengan nine tecipteang lantaran dengan mame.

¹⁰Lantaran hal nike, dait lantaran pare malaékat, dengan nine harus kadu kerudung saq nyatayang wibawene.

¹¹Timaq maraq nike dalem kehidupante léq dalem Tuhan, ndéq araq dengan mame saq ndéq merluang dengan nine, dait ndéq araq dengan nine saq ndéq merluang dengan mame.

¹²Séngaq timaq dengan nine penembéq tecipteang léman dengan mame, laguq sesampun nike dengan mame tebijeang léman dengan nine; dait selapuq hal asalne léman Allah.

¹³Cobaq semeton senamian timbang mésaq hal niki: Napi solah sopoq dengan nine bedo'e tipaq Allah léq julu dengan luwéq, ndéqne ngengadu kerudung?

¹⁴Léman pengalaman saq biase, side pade sampun teajah bahwe sopoq hal saq merilaq lamun dengan mame bélo bulune.

¹⁵Laguq bagi dengan nine, bulu nike teicanin jari penutup ulune dait bulu saq bélo jari kebanggeanne.

¹⁶Nah, lamun araq saq mélé nentang mengenai masalah niki, tiang pade dait jemaah-jemaah Allah lainne ndéq bedowé kebiasean saq maraq nike.

¹⁷Mengenai hal saq selanjutne niki, tiang ndéq puji side pade. Kumpulan-kumpulan ibadahde ndéqne ngasilang saq solah, laguq saq ndéq solah.

¹⁸Penembéqne tiang dengah, bahwe léq dalem kumpulan-kumpulan ibadahde araq golongan-golongan saq saling béde paham. Dait tiang yakin bahwe kabar nike kenaq.

¹⁹Mule harus araq perpecahan léq antare side, adéq laun penggitan sai-sai dengan saq tahen léq dalem ujian.

²⁰Laguq léq waktu side pade bekumpul, saq side pade araqang nike ndéqne Perjamuan Tuhan.

²¹Séngaq léq waktu bekelor, side pade sopoq-sopoq berebutan bait keloranne mésaq, jangke araq saq ndéq mauq napi-napi, laguq saq lainne jari bowos.

²²Kembéq jangke maraq nike? Tekan side bedowé balé? Side bau bekelor dait nginem léq derike! Atao side mélé menghine jemaah Allah dait perilaq dengan-dengan miskin? Napi saq harus tiang ucapang léq side pade? Napi harus tiang puji side pade? Ndéq! Tiang ndéq gati gen puji side pade.

²³Séngaq saq tiang ajahang léq side, nike tiang terimaq léman Tuhan mésaq: Bahwe léq kelem nike sewaktu Deside Isa, Junjungante Saq Mulie tehianatin, Ie bait ruti,

²⁴dait sesampun Ie ngucapang syukur tipaq Allah léq ruti nike, Ie peleng-peleng ruti nike kadu gading-Ne, terus bemanik, “Niki ragen Tiang saq teserahang umaq side pade. Laksaneang niki jari nginget Tiang.”

²⁵ Maraq nike éndah sesampun inggas medaran, Deside Isa bait cawan saq berisi anggur terus bemanik, “Cawan niki perjanjian Allah saq baru, saq tesahang kadu daraq Tiang. Sebilang side pade nginem anggur niki, laksaneang niki jari nginget Tiang.”

²⁶Mule sebilang side pade ngelorang ruti dait nginem anggur niki, side pade beriteang ninggal-Ne Junjungante Saq Mulie, jangke Ie rauh.

²⁷Keranaq nike, dengan saq ngelorang ruti atao nginem léman cawan Tuhan siq care saq ndéq patut, dengan nike bedose tipaq Tuhan saq sampun ngurbanang rage dait daraq-Ne.

²⁸Jari, sebilang dengan harus meriksaq diriqne juluq, baruq ie kanggo ngelorang ruti dait nginem anggur nike.

²⁹Séngaq lamun dengan ngelorang ruti dait nginem anggur ndéqne ngakuq ragen Tuhan, dengan nike ngelor dait nginem jari nerimaq hukuman Allah tipaq diriqne mésaq.

³⁰Keranaq nike luwéq léq antare side pade saq sakit dait lemah, dait araq éndah saq ninggal.

³¹Laguq lamun ite nguji diriqte mésaq juluq, ite ndéq gen tehukum siq Allah.

³²Laguq lamun ite tehukum siq Allah, Ie gen ngajah ite, adéq ite ndéq kene hukuman bareng kance dunie niki.

³³Keranaq nike, semeton-semeton tiang, lamun side pade bekumpul jari bekelor léq perjamuan Tuhan, side pade harus saling antih.

³⁴Lamun araq saq lapah, ie harus bekelor juluq léq balé. Lamun side pade perhatiang hal niki, make kumpulan-kumpulan ibadahde ndéqne gen datengang hukuman léman Allah léq diriqde mésaq. Mengenai masalah-masalah saq lain, laun gen tiang jelasang tipaq side, lamun tiang dateng.