Read KITAB SUCI ZABUR INJIL 1 KORINTUS 13 Bible Online

1 KORINTUS 13 - KITAB SUCI ZABUR INJIL bible

1 KORINTUS 13

¹Timaqne tiang tao ngeraos kadu macem-macem base malaékat, laguq lamun tiang ndéq bedowé kasih, make napi saq tiang raosang nike cume jari maraq suaren gong beléq ongkatne doang.

² Timaq tiang bedowé paice jari benubuat dait tiang nenaoq selapuq rahasie dait bedowé selapuq penenaoq, dait timaq tiang bedowé iman saq sempurne sehingge tiang bau miaq gunung ngalih, laguq lamun tiang ndéq bedowé kasih, make tiang ndéq bedowé arti napi-napi!

³Maraq nike éndah seandéne selapuq dowén tiang, tiang sedekahang tipaq dengan miskin, dait tiang serahang diriq tiang jari tetunuq, laguq lamun tiang ndéq bedowé kasih, make selapuqne nike ndéq araq manpaatne umaq tiang.

⁴Kasih nike sabar, kasih nike murah até, ie ndéq talon até. Ie ndéq girang sesumbar, dait ndéqne sombong.

⁵Ie ndéq angkuh, ndéqne kasar, ie ndéq maksaq dengan lain harus turut keméléqne mésaq, ndéq becat sili, dait ndéq dendem.

⁶Ie ndéqne seneng léq hal saq ndéq adil, laguq ie cume seneng léq hal saq kenaq.

⁷Ie tahen menderite dalem selapuq hal, percaye léq selapuq hal, beharep léq selapuq hal, dait tekun léq dalem selapuq hal.

⁸Kasih nike ndéqne gen uwah araq tutuqne, nubuat gen tutuq. Base saq ajaip gen tutuq, penenaoq gen musnah.

⁹Séngaq penenaoqte dait nubuatte ndéqne sempurne.

¹⁰Laguq lamun saq sempurne sampun dateng, make saq ndéq sempurne nike gen musnah.

¹¹Sewaktu tiang masih kodéq, tiang ngeraos maraq kanak kodéq, tiang bedowé perasaan maraq kanak kodéq dait pikiran tiang éndah maraq kanak kodéq. Laguq mangkin tiang sampun déwase, kelakuan tiang saq maraq kanak kodéq sampun tiang tetéh.

¹²Napi saq ite serioq mangkin niki maraq lingon saq saru léq dalem kesene. Laguq éraq ite gen serioq langsung secare jelas. Mangkin tiang ndéqman nenaoq selapuqne, laguq éraq tiang gen nenaoq selapuqne, maraq Allah wikan selapuqne mengenai diriq tiang.

¹³Jari, ketelu hal niki saq tetep araq: Iman, pengharepan, dait kasih. Saq paling beléq léq antare ketelune nike kasih.