Read KITAB SUCI ZABUR INJIL 1 KORINTUS 15 Bible Online

1 KORINTUS 15 - KITAB SUCI ZABUR INJIL bible

1 KORINTUS 15

¹Dait mangkin, semeton senamian, tiang mélé adéq side pade inget malik léq Kabar Solah léman Allah saq tiang beriteang tipaq side laéq. Side pade nerimaq dait percaye tipaq Almasih lantaran Kabar Solah nike.

²Lamun side percaye sepenoq angen léq napi saq tiang beriteang nike, make Kabar Solah nike nyelametang side pade; kecuali lamun side percaye ndéqne siq pengertian.

³ Napi saq tiang sampéang tipaq semeton senamian nike, nike sampun tiang terimaq éndah. Saq paling penting, tiang sampéang tipaq side bahwe Almasih ninggal lantaran dose-dosente maraq saq tetulis léq dalem Kitab Suci, tiang sampéang tipaq side bahwe Almasih ninggal lantaran dose-dosente;

⁴ bahwe Ie temakamang, laguq sesampun nike teidupang malik léq jelo saq ketelu. Nike éndah tetulis léq Kitab Suci.

⁵ Tiang badaq éndah léq side bahwe Almasih saq teidupang malik nike nyatayang éndah diriq-Ne léq Kepas, dait sesampun nike tipaq kedue olas rasul.

⁶Sesampun nike Ie nyatayang diriq éndah sekaligus tipaq lebih léman lime ratus pengiring-Ne. Luwéq léman dengan-dengan nike masih idup jangke mangkin, cume pire dengan saq sampun ninggal.

⁷Sesampun nike Almasih nyatayang diriq éndah tipaq Yakub dait sesampun nike tipaq selapuq rasul.

⁸ Saq penutuq gati Ie nyatayang diriq léq tiang éndah -- tiang saq maraq bebéaq saq teanakang sendéqman wayene!

⁹ Tiang niki rasul Tuhan saq paling hine. Tiang ndéq patut tesebut rasul, séngaq tiang sampun nganiaye jemaah Allah.

¹⁰Laguq lantaran rahmat Allah tiang jari maraq keadaan tiang saq mangkin. Dait ndéq sie-sie Allah ngicanin rahmat-Ne léq tiang. Malahan tiang saq lelahan begawéan ketimbang selapuq rasul saq lainne. Laguq nike setetune ndéqne usahe tiang; nike rahmat Allah saq ngasihin tiang dait saq bekarye bareng kance tiang.

¹¹Jari, léman sai side nerimaq Kabar Solah nike -- timaq nike léman tiang atao léman rasul-rasul saq lain -- nike ndéqne jari soal. Saq penting tiang pade beriteang Kabar Solah nike dait side percaye.

¹²Lamun saq tiang pade beriteang nike bahwe Almasih sampun teidupang malik léman ninggal, kembéq araq léq antare side saq bebase bahwe dengan ninggal ndéqne gen teidupang malik?

¹³Lamun tetu dengan ninggal ndéq gen teidupang malik, nike artine Almasih éndah nénten teidupang malik léman ninggal.

¹⁴Dait lamun misalne Almasih nénten teidupang malik léman ninggal, make sie-sie napi saq tiang pade beriteang dait sie-sie éndah side pade percaye.

¹⁵Lebih léman nike, ternyate bahwe tiang pade beduste mengenai Allah, séngaq tiang pade beriteang bahwe Allah sampun ngidupang malik Almasih léman ninggal, padahal Allah nénten ngidupang Ie malik -- lamun seandéne tetu, bahwe dengan ninggal ndéq teidupang malik!

¹⁶Séngaq lamun dengan ninggal ndéq teidupang malik, make Almasih éndah nénten teidupang malik léman ninggal.

¹⁷Dait lamun Almasih nénten teidupang malik, make sie-sie side pade percaye; nike artine side pade masih dalem keadaan bedose.

¹⁸Siq care nike artine bahwe dengan-dengan saq sampun ninggal léq dalem Almasih, ndéq bedowé harepan éndah.

¹⁹Lamun pengharepante tipaq Almasih cume sewaktu ite masih idup léq dunie niki doang, make ite niki dengan saq paling rugi léman selapuq umat manusie léq dunie niki!

²⁰Laguq nyatene Almasih sampun teidupang malik léman ninggal. Ie jari saq penembéq léman ie pade saq sampun ninggal.

²¹Séngaq kematéan tame ojok dalem dunie siq perantarean sopoq dengan, maraq nike éndah idup malik léman kematéan teicanin tipaq manusie siq perantarean sopoq dengan éndah.

²²Séngaq pade maraq léq dalem Adam selapuq manusie ninggal, maraq nike éndah léq dalem Almasih selapuq dengan gen teidupang.

²³Laguq sopoq-sopoq gen teidupang menurut giliranne: Almasih jari saq penembéq; beterus éraq léq waktu Ie rauh malik, sesampun nike giliran dengan-dengan saq jari dowén Almasih.

²⁴Sesampun nike baruq kiamat. Léq waktu nike Almasih gen binaseang selapuq pemréntahan, selapuq kekuasean, dait selapuq kekuatan; terus Ie gen nyerahang kekuasean-Ne sebagé Raje, tipaq Allah, Bapante.

²⁵ Almasih harus tetep mréntah jangke Allah jariang selapuq musuh Almasih takluk léq Almasih.

²⁶Musuh saq paling penutuq saq gen tebinaseang nike kematéan.

²⁷ Léq dalem Kitab Suci tetulis maraq niki, “Allah sampun jariang selapuq-lapuqne takluk léq Almasih.” Jelas bahwe saq temaksut “selapuq-lapuqne” nike ndéq termasuk Allah, saq miaq selapuq-lapuqne nike takluk léq Almasih.

²⁸Laguq sesampun selapuqne tetaklukang léq Almasih, make Bije saq asalne léman Allah nike, gen taklukang diriq-Ne tipaq Allah saq sampun jariang selapuq-lapuqne takluk léq Allah. Make Allah mésaq gen jari selapuq-lapuqne léq dalem selapuq-lapuqne.

²⁹Lamun dengan ninggal ndéq teidupang malik, kembéq araq dengan saq tebaptis umaq dengan ninggal? Napi manfaatne ie pade ngelaksaneang hal nike? Lamun mule dengan ninggal tetu-tetu ndéq gen teidupang malik, kembéq ie pade ngelaksaneang hal nike?

³⁰Dait kembéq éndah tiang pade mélé hadepin bahaye sebilang waktu?

³¹Semeton senamian! Sebilang jelo tiang berandangan kance bahaye saq ngancem jiwe tiang, laguq hal nike jari kebanggean tiang léq dalem Deside Isa Almasih, Junjungante Saq Mulie lantaran side pade, napi saq tiang sampéang niki kenaq.

³² Lamun nike cume léman pikiran manusie doang, napi untungne umaq tiang bejuang maraqne ngelawan binatang saq galak léq kote niki, léq Epesus? Lamun mule dengan ninggal ndéq teidupang malik, make, “Silaqte bekelor dait nginem dait beseneng-seneng, séngaq lémaq ite gen ninggal.”

³³Ndaq jangke tetipu! Pergaulan saq lengé nyédaq kebiasean saq bagus.

³⁴Pade sadar mangkin, dait ndaq gawéq dose malik. Sepatutne side pade harus ilaq, bahwe léq antare side araq saq ndéq kenal Allah.

³⁵Sang araq saq beketuan, “Berembé dengan ninggal teidupang malik? Awak saq berembé saq teicanin léq ie pade sesampun ie pade teidupang malik?”

³⁶Bodo gati! Lamun side nalet binéq léq dalem tanaq, binéq nike ndéq gen tiwoq, lamun binéq nike ndéqman maté juluq.

³⁷Dait binéq saq side talet léq dalem tanaq nike -- sang binéq gandum atao binéq lain -- ie cume tolang binéq nike doang, laun ndéqne selapuq tetaletan saq gen tiwoq.

³⁸Allah mésaq saq gen ngicanin binéq nike rue saq solah menurut pekayunan-Ne. Léq sebilang macem binéq, Allah ngicanin rue taletanne sopoq-sopoq.

³⁹Awak mahluk-mahluk saq bedowé nyawe ndéqne pade selapuqne. Ruen awak manusie béde kance ruen awak binatang-binatang, dait ruen awak kedit-kedit béde éndah kance ruen awak empaq-empaq.

⁴⁰Maraq nike éndah araq awak sorge dait araq awak dunie, laguq kemuliean awak sorge béde kance awak dunie.

⁴¹Kemuliean jelo lain kance kemuliean bulan. Bintang-bintang éndah bedowé kemulieanne mésaq. Malahan bintang-bintang nike sopoq-sopoq lain éndah kemulieanne.

⁴²Maraq nike halne éraq dengan-dengan ninggal saq teidupang malik. Awak saq tekubur nike, awak saq iniq séde, laguq awak saq teidupang malik nike awak saq ndéq iniq séde.

⁴³Léq waktu awak nike tekuburang, awak nike hine; laguq teidupang malik dalem kemuliean. Léq waktu tekubur, awak nike lemah; laguq teidupang malik léq dalem kekuatan.

⁴⁴Awak saq tekubur, nike awak léman dunie; laguq sesampun idup malik, make awak nike awak saq teicanin siq Roh Allah. Araq awak saq léman dunie, araq éndah awak saq léman Roh Allah.

⁴⁵ Dalem Kitab Suci tetulis maraq niki, “Manusie saq penembéq, Adam, jari mahluk saq idup,” laguq Adam saq penutuq nike Roh saq ngicanin idup.

⁴⁶Saq dateng juluan nike saq jasmani, ndéq saq rohani. Saq rohani dateng mudian.

⁴⁷Adam saq penembéq tejariang léman tanaq, laguq Adam saq kedue asalne léman sorge.

⁴⁸Dengan-dengan dunie niki maraq Adam saq penembéq, saq tejariang léman tanaq, laguq dengan-dengan sorge nike maraq Ie saq rauh léman sorge.

⁴⁹Pade maraq ite mangkin, maraq Adam saq tejariang léman tanaq, make éraq ite gen jari maraq Ie saq léman sorge nike.

⁵⁰Maksut tiang, semeton senamian: Awak saq tejariang léman daraq dait daging ndéq mauq taoq léq dalem Kerajaan Allah; dait awak saq iniq binase ndéqne iniq jari kekel.

⁵¹ Pade perhatiang rahasie niki: Ndéqne selapuqte gen ninggal, laguq ite selapuqne gen berobah.

⁵²Hal niki gen selung-selung telaksane sepengkejep mate, sewaktu terompét penutuq tetiup. Séngaq sewaktu kedengahan suare terompét nike, dengan-dengan ninggal gen teidupang malik kadu awak saq kekel, dait ite selapuqne gen terobah.

⁵³Awakte saq iniq ninggal niki harus tegentiq siq awak saq ndéq iniq ninggal, dait awak saq léman dunie harus tegentiq siq awak saq léman sorge.

⁵⁴ Lamun awak saq iniq ninggal sampun tegentiq siq awak saq ndéq iniq ninggal, dait awak saq léman dunie sampun tegentiq siq awak saq léman sorge, léq waktu nike baruq telaksane napi saq tetulis léq dalem Kitab Suci, “Kematéan sampun temusnahang; kemenangan sampun dateng!”

⁵⁵ “Wahai maut, léq mbé kemenangande? Wahai maut, léq mbé racunde?”

⁵⁶Racun maut nike dose, dait dose ngelaksaneang kuasene langan Hukum Taurat.

⁵⁷Laguq syukur tipaq Allah; Ie ngicanin ite kemenangan langan Deside Isa Almasih, Junjungante Saq Mulie.

⁵⁸Keranaq nike, semeton senamian saq tiang kasihin, side pade harus kuat dait kukuh. Pade terus pacu-pacu begawéan bagi Tuhan. Séngaq side pade nenaoq bahwe selapuq saq side pade laksaneang bagi Tuhan, ndéqne sie-sie.