Read KITAB SUCI ZABUR INJIL 1 KORINTUS 16 Bible Online

1 KORINTUS 16 - KITAB SUCI ZABUR INJIL bible

1 KORINTUS 16

¹Mangkin mengenai képéng saq side pade mélé sumbang tipaq dengan-dengan soléh, tiang anjurang adéq side pade laksaneang menurut petunjuk saq tiang béng tipaq jemaah-jemaah léq Galatia.

²Léq jelo penembéq sebilang minggu, side pade sopoq-sopoq harus kelin képéng sesuai penghasilanne. Toloq képéng nike jangke tiang dateng, adéq léq waktu nike ndéqne perlu malik tekumpulang.

³Laun lamun tiang dateng, tiang gen ngutus dengan-dengan saq sampun side pade anggep patut. Tiang gen ngebéng surat léq ie pade, adéq ie pade jauq képéng sumbangan nike ojok Yerusalem.

⁴Dait lamun teanggep kenaq tiang milu éndah bareng kance ie pade, make tiang gen lalo bareng kance ie pade.

⁵ Tiang gen jangoq side pade sesampun tiang liwat léq Makedonia, séngaq tiang beniat gen liwat léq derike.

⁶Sang tiang gen madéq piro jelo ngonéqne kance side pade, atao sang sengonéq musim telih. Sesampun nike side pade bau tulung tiang ngelanjutang kelampan tiang ojok taoq saq lainne.

⁷Tiang ndéq mélé jangoq side pade sekedar nyelaloq doang. Lamun Tuhan ngijinang, tiang gen ndot ngonéqan malik kance side pade.

⁸ Laguq tiang gen ndot léq Epesus, jangke jelo Pentakosta,

⁹séngaq léq deriki luwéq kesempatan jari ngelaksaneang pegawéan saq bemanpaat, timaq luwéq éndah dengan saq nentang pegawéan nike.

¹⁰ Lamun Timotius dateng, terimaq ie bagus-bagus adéq ie beridap betah léq antare side pade, séngaq ie maraq tiang éndah begawéan bagi Tuhan.

¹¹Ndaq jangke araq saq ngeréméhang ie. Tulung ie adéqne bau selamet ngelanjutang kelampanne malik tulak ojok tiang, séngaq tiang ngantih kedatenganne bareng kance semeton-semeton saq lainne.

¹²Mengenai semetonte Apolos, sampun pire kali tiang suruq ie adéq bareng kance semeton saq lainne lumbar jangoq side pade. Laguq ie ndéqman merase yakin bahwe ie harus lumbar mangkin. Laguq laun lamun araq kesempatan, ie pasti gen dateng.

¹³Side pade harus waspade dait kuat léq dalem iman. Ndaq takut dait harus tetep kuat.

¹⁴Selapuq saq side pade laksaneang, laksaneang nike léq dalem kasih.

¹⁵ Side pasti kenal kance Stepanus dait keluargene; ie pade saq penembéq jari percaye tipaq Almasih léq Akaya. Ie pade sepenoq angenne begawéan husus jari ngelayanin dengan-dengan saq tehususang bagi Allah.

¹⁶Keranaq nike, pade taat léq dengan-dengan saq maraq nike, dait dengan-dengan lain saq begawéan dait ngelayanin bareng ie pade.

¹⁷Tiang seneng siq kedatengan Stepanus, Portunatus dait Akaikus, séngaq ie pade saq nyukupang napi saq masih kurang léq side pade.

¹⁸Ie pade sampun miaq angen tiang jari seneng, maraq ie pade nyenengang angen side. Keranaq nike, side pade harus hargein dengan-dengan saq maraq nike.

¹⁹ Jemaah-jemaah léq Asia Kodéq nyampéang salam tipaq side pade. Akwila kance Priskila dait jemaah saq bekumpul léq balé ie pade éndah ngirim salam tipaq side pade.

²⁰Selapuq semeton léq deriki nyampéang salam tipaq side pade. Pade besalam-salaman sebagé semeton seiman.

²¹Tiang romboq léq deriki salam saq tiang tulis mésaq: Salam léman tiang, Paulus.

²²Dengan saq ndéq ngasihin Tuhan, pasti ie tekutuk! Tuhan gen gelis rauh!

²³Rahmat Junjungan Saq Mulie, Deside Isa Almasih araq bareng kance side.

²⁴Kasih tiang araq bareng kance side selapuq léq dalem Deside Isa Almasih.