Read KITAB SUCI ZABUR INJIL 1 KORINTUS 3 Bible Online

1 KORINTUS 3 - KITAB SUCI ZABUR INJIL bible

1 KORINTUS 3

¹Semeton senamian, setetune tiang ndéq tao ngeraos kance side pade maraq kance dengan saq idup menurut Roh Allah. Tiang cume tao ngeraos kance side maraq kance dengan saq ndéq bedowé Roh Allah; maraq kance dengan saq masih bebéaq dalem percayenne tipaq Almasih.

² Tiang cume bau ngebéng side keloran bebéaq, ndéqne keloran dengan déwase; lantaran side pade ndéqman kuat nerimaq. Laguq mangkin éndah side pade masih ndéqman kuat nerimaq hal nike,

³séngaq side pade dengan saq ndéq bedowé Roh Allah. Séngaq lamun side pade masih talon até dait besiaq sopoq kance saq lainne, napi nike ndéq buktiang bahwe side pade dengan saq ndéq bedowé Roh Allah dait idup secare duniawi?

⁴ Lamun araq saq bebase, “Tiang léman golongan Paulus”, dait saq lain bebase, “Tiang léman golongan Apolos”, napi nike ndéq buktiang bahwe side dengan saq ndéq bedowé Roh Allah?

⁵Setetune sai Apolos nike? Dait sai Paulus? Tiang pade cume pelayan-pelayan Allah, saq sampun bimbing side pade jari percaye tipaq Almasih. Tiang pade cume ngelaksaneang pegawéan saq tetugasang siq Tuhan tipaq tiang pade sopoq-sopoq.

⁶ Tiang nenalet dait Apolos saq nyiram, laguq Allah mésaq saq niwoqang.

⁷Jari saq paling penting nike Allah, séngaq Ie saq niwoqang. Saq nalet dait saq nyiram ndéqne penting;

⁸deduaqne nike pade kedudukanne. Sopoq-sopoq gen nerimaq upaq menurut lelahne begawéan.

⁹Tiang pade dengan-dengan saq bareng-bareng begawéan bagi Allah; dait side pade, lendang Allah, gedung Allah éndah.

¹⁰Menurut rahmat Allah, tiang sebagé ahli bangunan sampun noloq dasar gedung nike, dait dengan lain penganjeng gedung léq atas dasar nike. Sebilang dengan harus merhatiang bagus-bagus berembé ie miaq gedung léq atas dasar nike.

¹¹Séngaq Allah mésaq sampun nyedieang Deside Isa Almasih sebagé sopoq-sopoqne dasar jari gedung nike; ndéq araq dasar saq lain.

¹²Araq saq miaq gedung léq atas dasar nike kadu emas, araq saq kadu perak, araq saq kadu batu permate, araq éndah saq kadu kayuq, pupaq gero atao jami.

¹³Pegawéan sebilang dengan éraq gen penggitan léq waktu Almasih rauh malik. Séngaq léq jelo Tuhan nike api gen miaq pegawéan sopoq-sopoq dengan gen penggitan. Api gen nguji dait nentuang mutu pegawéan nike.

¹⁴Lamun gedung saq tepiaq siq dengan léq atas dasar nike bau tahen api, dengan nike gen nerimaq upaqne.

¹⁵Laguq lamun pegawéanne julat, ie gen rugi; ie mésaq gen selamet, laguq maraq dengan saq selamet sugul léman api.

¹⁶ Napi side pade ndéq nenaoq bahwe side pade gedéng Allah dait Roh Allah araq léq dalem side pade?

¹⁷Lamun araq dengan saq nyédaq gedéng Allah, Allah éndah gen nyédaq dengan nike. Séngaq Gedéng Allah nike husus bagi Allah doang, dait side pade gedéng Allah nike.

¹⁸Ndaq sopoq dengan juaq nipu diriqne mésaq. Lamun araq dengan léq antare side merase diriqne bijaksane menurut ukuran dunie niki, alurang dengan nike jari bodo, adéq ie jari tetu-tetu bijaksane.

¹⁹ Séngaq saq teanggep bijaksane siq dunie, hal nike bodo bagi Allah. Léq Kitab Suci araq tetulis, “Dengan-dengan bijaksane tebau siq Allah kadu kepinteranne mésaq.”

²⁰ Araq tetulis maraq niki éndah, “Tuhan wikan bahwe pikiran dengan-dengan saq bijaksane, nike pikiran saq ndéq araq manpaatne.”

²¹Keranaq nike, ndaq sopoq dengan juaq saq ngajum manusie, séngaq selapuq-lapuqne sampun teicanin jari dowénde:

²²Paulus, Apolos, Kepas, dunie niki, kehidupan dait kematéan, jaman niki atao jaman saq gen dateng, selapuq-lapuqne dowénde.

²³Dait side pade jari dowén Almasih, dait Almasih dowén Allah.