Read KITAB SUCI ZABUR INJIL 1 KORINTUS 4 Bible Online

1 KORINTUS 4 - KITAB SUCI ZABUR INJIL bible

1 KORINTUS 4

¹Anggep bahwe tiang pade pelayan-pelayan Almasih, saq betanggung jawab beriteang rencane-rencane Allah saq ndéqman tetaoq siq dunie.

²Saq pertame-tame tetuntut léman pelayan saq maraq nike, bahwe ie setie léq majikanne.

³Bagi tiang, ndéqne jari soal napi saq side pade -- atao sai juaq -- pikirang éndah mengenai diriq tiang. Malahan napi saq tiang mésaq pikirang mengenai diriq tiang nike ndéqne jari soal.

⁴Tiang ndéq merase salaq dalem hal napi juaq, laguq nike ndéqne bukti bahwe tiang mule ndéq salaq. Tuhan mésaq saq nentuang tiang salaq atao ndéq.

⁵Keranaq nike, ndaq side pade becat-becat nentuang bahwe sopoq dengan salaq atao ndéq, séngaq ndéqman waktune. Antih jangke Tuhan rauh éraq. Ie saq gen bukaq selapuq rahasie-rahasie saq teseboq léq dalem peteng. Ie saq gen bungkar selapuq niat saq araq léq dalem até manusie. Léq waktu nike baruq sebilang dengan nerimaq pujian léman Allah maraq saq patut ie terimaq.

⁶Semeton senamian! Jari kepentingande, tiang sampun laksaneang selapuqne nike tipaq Apolos dait léq diriq tiang mésaq. Maksutne adéq conto léman tiang pade nike, side pade bau berajah napi arti ucapan niki, “Pade patuh léq aturan saq araq”, siq care nike ndéq araq sopoq dengan juaq léman side pade saq kanggo bangge-banggeang sopoq dengan, terus menghine saq lain.

⁷Sai saq jariang side lebihan léman dengan lain? Tekan selapuqne side terimaq léman Allah? Jari, kembéq mélé nyombongang diriq, maraqne napi saq araq léq side nike side anggep léman diriqde mésaq?

⁸Mule side ndéq merluang napi-napi malik! Side pade sampun sugih! Side pade sampun jari raje! Dait tiang pade ndéq. Mule bagus gati lamun side pade sampun jari raje, adéq tiang pade bau mréntah bareng side.

⁹Séngaq menurut pendapet tiang, tiang pade rasul-rasul, sampun tejariang pantoan siq Allah léq julun manusie dait pare malaékat. Tiang pade maraq dengan-dengan hine saq tehukum siq hukuman maté léq julun dengan luwéq dait tesurak-surak siq dunie.

¹⁰Lantaran Almasih, tiang pade niki jari dengan bodo, laguq side pade bijaksane léq dalem Almasih! Tiang pade lemah, laguq side pade kuat! Tiang pade tecele, dait side pade teajum-ajum!

¹¹Jangke mangkin niki tiang pade kelapahan dait bedak; kelambi tiang pade masih saq léq awak doang; tiang pade tesiksaq siq dengan; tiang pade ndéq bedowé taoq ndot;

¹² tiang pade gawéq pegawéan saq berat gati jari boyaq napkah. Lamun tiang pade tekutuk, tiang pade bales siq berkah; lamun tiang pade teaniaye, tiang pade sabar;

¹³lamun tiang pade telengé-lengéang siq dengan, tiang pade bales kadu ucapan-ucapan saq solah. Tiang pade ndéqne lebih léman dedoro dunie niki; jangke mangkin tiang pade masih teanggep maraq dedoro gumi.

¹⁴Surat niki tiang tulis tipaq side pade, ndéqne jari miaq side pade ilaq, laguq jari peringetin side pade maraq anak-anak tiang mésaq.

¹⁵Séngaq timaq side pade sampun bedowé sepulu iyu guru léq dalem Almasih, laguq side pade ndéq bedowé luwéq bapaq. Léq dalem idupde sebagé dengan-dengan saq araq léq dalem Almasih, tiang saq jari bapaqde, séngaq tiang saq jauq Kabar Solah mengenai Almasih tipaq side.

¹⁶ Keranaq nike sanget siq tiang tunas adéq side pade turut teladan tiang.

¹⁷Léq hal nike tiang sampun ngutus Timotius ojok side, tiang ngasihin ie maraq anak tiang mésaq. Ie kanak saq bau tesaduq. Laun ie gen ngingetang side pade mengenai care idup saq tiang turut sesampun percaye tipaq Almasih, care idup nike saq tiang ajahang tipaq sebilang jemaah saq araq léq mbé-mbé.

¹⁸Pire dengan léq antare side sampun jari sombong, séngaq ie pade paran tiang ndéq gen dateng ojok side.

¹⁹Laguq lamun Tuhan ngijinang, ndéqne ngonéq malik tiang gen dateng éndah ojok side. Léq waktu nike, tiang gen serioq éndah kekuatan dengan-dengan saq sombong nike; ndéqne cume ucapanne doang.

²⁰Séngaq Kerajaan Allah ndéqne mengenai ucapan doang, laguq éndah mengenai kuase.

²¹Jari, piléq doang napi saq side pade melétang! Napi side pade mélé tiang dateng jari ngajah side pade secare keras atao secare alus dait kasih sayang?