Read KITAB SUCI ZABUR INJIL 1 KORINTUS 7 Bible Online

1 KORINTUS 7 - KITAB SUCI ZABUR INJIL bible

1 KORINTUS 7

¹Mangkin tiang gen sampéang masalah-masalah saq side pade sebut léq dalem suratde. Lamun sopoq dengan mame ndéq merariq, nike solah.

²Laguq, adéq ndéq tegode jari gawéq perbuatan saq cabul, solahan sebilang dengan mame bedowé seninene mésaq, dait sebilang dengan nine bedowé semamene mésaq.

³Semame harus ngelaksaneang kewajibanne sebagé semame tipaq seninene, maraq nike éndah senine harus ngelaksaneang kewajibanne sebagé senine tipaq semamene.

⁴Senine ndéq bedowé kuase léq awakne mésaq; saq bekuase léq awakne nike, semamene. Maraq nike éndah semame ndéq bedowé kuase léq awakne mésaq; saq bekuase léq awakne nike, seninene.

⁵Ndaq saling jaoqin sopoq kance saq lain sebagé senine semame. Kecuali jari sementare waktu, asal deduaqne sampun setuju. Siq care nike sopoq-sopoq bau bedo'e. Laguq sesampun nike, side pade harus rukun malik dait idup berembé seharusne senine semame. Lamun ndéq maraq nike, side pade gen kene rayuan Belis, séngaq side pade ndéq kuat nahen napsu.

⁶Tiang sampéang hal niki ndéqne sebagé préntah, laguq cume ngebéng naséhat.

⁷Setetune tiang demenan lamun selapuq dengan jari maraq tiang. Laguq sopoq-sopoq dengan sampun nerimaq paice saq husus léman Allah. Sopoq dengan bedowé paice maraq niki, saq lain bedowé paice maraq nike.

⁸Tipaq dengan-dengan saq ndéqman merariq dait tipaq dengan-dengan nine saq sampun bebalu, niki naséhat tiang: Solahan side tetep idup mésaq maraq tiang.

⁹Laguq lamun side ndéq bau nahen napsu, solahan side merariq. Séngaq solahan side merariq ketimbang napsunde beléq.

¹⁰ Tipaq ie pade saq sampun merariq, niki préntah tiang: (Setetune ndéqne tiang saq ngebéng préntah niki, laguq Tuhan.) Sopoq dengan nine saq sampun merariq ndaq séang semamene.

¹¹Laguq lamun ie sampun séang semamene, ie harus tetep ndéq besemame, atao tulak ojok semamene. Dait sopoq semame ndéqne kanggo séang seninene.

¹²Tipaq saq lain-lainne, maraq niki naséhat tiang -- niki naséhat tiang mésaq, ndéqne léman Tuhan -- lamun araq sopoq semeton besenine kance dengan nine saq ndéq percaye léq Almasih, dait seninene setuju idup bareng kance ie, dengan nike ndéqne kanggo séang seninene.

¹³Dait lamun sopoq dengan nine besemame kance dengan saq ndéq percaye léq Almasih, dait semamene setuju jari idup bareng kance ie, make senine nike ndéqne kanggo séang semamene.

¹⁴Séngaq semame saq ndéq percaye léq Almasih tesuciang lantaran ie merariq kance dengan saq sampun beriman léq Almasih. Maraq nike éndah senine saq ndéq percaye léq Almasih tesuciang lantaran ie merariq kance semame saq sampun beriman léq Almasih. Lamun ndéq maraq nike, bije-bije ie pade gen teparan bije-bije najis, padahal mangkin bije-bije nike sampun tesuciang.

¹⁵Laguq lamun dengan saq ndéq percaye nike séang senine atao semamene, ndaq balaq ie. Léq dalem hal niki saq nine atao saq mame bébas. Séngaq Allah manikang side jari idup léq dalem damé sejahtere.

¹⁶Séngaq side sebagé senine -- saq sampun percaye léq Almasih -- berembé side bau nenaoq secare pasti bahwe side ndéq bau nyelametang semamende? Maraq nike éndah side sebagé semame saq percaye léq Almasih, berembé side bau nenaoq secare pasti bahwe side ndéq bau nyelametang seninende?

¹⁷Sopoq-sopoq harus ngatur kehidupanne menurut bimbingan Tuhan, maraq saq sampun tetentuang siq Allah tipaq ie léq waktu Allah ngemanikang ie jari percaye léq Allah. Nike aturan saq tiang ajahang léq sebilang jemaah.

¹⁸Umpamene, lamun sopoq dengan sampun tesunat léq waktu ie nerimaq Allah, make dengan nike ndaq berusahe telangang tande-tande sunat nike. Maraq nike éndah lamun sopoq dengan ndéqman tesunat léq waktu ie nerimaq Allah, ndaq dengan nike belakoq tesunat.

¹⁹Séngaq turut atao ndéq aturan sunat, deduaqne pade-pade ndéq araq artine. Saq penting turut hukum-hukum Allah.

²⁰Sebilang dengan harus tetep idup dalem keadaan maraq waktu ie temanikang siq Allah.

²¹Lamun léq waktu side pade temanikang, side pade jari hambe, ndaq side pade susah-susah mikirang hal nike. Laguq lamun laun side pade mauq kesempatan jari dengan bébas, kadu kesempatan nike.

²²Séngaq sopoq dengan saq temanikang siq Tuhan waktu ie masih jari hambe, ie jari dengan saq bébas léq arepan Tuhan. Dait sopoq dengan bébas saq temanikang siq Almasih, ie jari hambe Almasih.

²³Side sampun tebeli siq Allah dait sampun lunas tebayah. Keranaq nike, ndaq side nyerahang diriqde jari hambe manusie.

²⁴Jari, semeton senamian, timaq berembé keadaan side sewaktu temanikang, side harus tetep idup maraq nike bareng kance Allah.

²⁵Mangkin mengenai dengan-dengan nine saq ndéqman merariq. Mengenai hal nike, tiang ndéq nerimaq préntah napi-napi léman Tuhan. Laguq sebagé dengan saq patut tepercaye lantaran rahmat Tuhan, tiang mélé nyampéang naséhat tiang.

²⁶Lamun inget selapuq kesusahan saq ngancem mangkin niki, tiang rase solahan lamun dengan tetep idup maraq keadaanne saq mangkin.

²⁷Lamun side sampun bedowé senine ndaq berusahe séang seninende nike. Lamun side ndéqman bedowé senine ndaq boyaq senine.

²⁸Laguq lamun side merariq, nike ndéqne dose. Maraq nike éndah lamun sopoq dedare merariq, ndéqne berarti ie bedose. Cume, ie pade saq merariq nike gen hadepin luwéq kesusahan. Dait tiang melét adéq side pade ndéq tetimpe siq kesusahan-kesusahan nike.

²⁹Maksut tiang maraq niki, semeton senamian: Ite ndéq bedowé luwéq waktu malik. Mulai léman mangkin, sebilang dengan saq sampun bedowé senine, adéqne idup maraqne ie ndéq bedowé senine;

³⁰dengan saq nangis, idup maraqne ie ndéq sedih angenne; dengan saq réréq, maraqne ie ndéq gembire; dengan saq sampun beli, maraqne ie ndéq bedowé napi-napi;

³¹dait dengan-dengan saq ngadu barang-barang saq araq léq dunie niki, harus idup maraqne ie ndéq ngadu hal-hal nike. Séngaq ndéqne ngonéq malik dunie niki, dalem keadaanne saq mangkin, gen musnah!

³²Tiang melét adéq side pade ndéq idup léq dalem kekuatiran. Dengan saq ndéq bedowé senine gen hususang pikiranne léq hal-hal mengenai Tuhan, lantaran ie mélé nyenengang Tuhan.

³³Laguq dengan saq bedowé senine gen luwéq mikirang hal-hal dunie niki, séngaq ie melét nyenengang seninene;

³⁴akibatne perhatianne tebagi-bagi. Sopoq dengan nine saq ndéq bedowé semame, atao sopoq dedare gen luwéq mikirang hal-hal mengenai Tuhan, séngaq ie melét adéq awak dait rohne jari dowén Tuhan. Laguq sopoq dengan nine saq sampun bedowé semame, hususang pikiranne léq hal-hal dunie niki, séngaq ie melét nyenengang semamene.

³⁵Tiang nulis selapuqne nike jari kesolahande mésaq, ndéqne siq maksut halangin kebébasande. Saq tiang melétang cume adéq side ngelaksaneang saq kenaq dait patut, dait adéq side bau hususang pikirande tipaq Tuhan.

³⁶Lamun sopoq dengan merase ndéq ngelaksaneang hal saq sepatutne tipaq berayene, lamun ie ndéq bau nahen napsune, dait ie merase perlu merariq kance dedare nike, alurang ie laksaneang napi saq bagus menurut ie. Ie ndéq bedose, lamun ie pade merariq.

³⁷Laguq lamun sopoq dengan sampun miaq keputusan léq dalem angenne ndéq gen merariq kance berayene dait keputusanne nike ndéqne tepaksaq, make saq ie laksaneang nike solah, asal ie kuat ngelaksaneang hal nike.

³⁸Jari, dengan saq merariq solah perbuatanne, dait dengan saq ndéq merariq solahan malik perbuatanne.

³⁹Sopoq dengan nine saq sampun merariq teriket tipaq semamene cume sengonéq semamene idup. Lamun semamene sampun milinang, dengan nine nike bébas merariq malik kance dengan saq ie demenang; asal dengan nike dengan saq percaye léq Almasih.

⁴⁰Laguq ie gen lebih bahagie lamun ie ndéq merariq malik. Nike pendapet tiang mésaq, laguq tiang rase bahwe saq tiang ucapang niki siq kuase Roh Allah.